Read Fulfulded Gurtaaki 34 Bible Online

Gurtaaki 34 - Fulfulded bible

Gurtaaki 34

¹Jawmiraawo wi'i Muusa: “Sehu alluhaaje kaa'e ɗiɗi bana aranndeeje go. Mi winndan dow maaje bolle gonnooɗe dow aranndeeje ɗe pusɗa.

²Taaskana jaŋngo fajiri. Nden fajiri a wa'a dow hooseere Sina, dara ton yeeso am haa yeereere hooseere.

³Taa goɗɗo wa'oda bee ma, taa koo gooto yi'e dow hooseere fuu. Koo dammooji e na'i boo, taa ɗi ndura les hooseere nde'e.”

⁴Muusa sehi alluhaaje kaa'e ɗiɗi bana aranndeeje. Jaŋngo maajum o dawi cub, o wa'i dow hooseere Sina bana Jawmiraawo umri mo. O hoo'i alluhaaje kaa'e ɗiɗi go haa juŋngo.

⁵Jawmiraawo jippi nder ruulde, dari kommbi maako. O ewni innde Jawmiraawo.

⁶Jawmiraawo saali yeeso maako, o ɗon wooyna: “Jawmiraawo, Jawmiraawo, Allah marɗo enɗam e hinnuye, mo tikkataa law, mo mbooɗeeŋga e gooŋgaaku mum ɗuuɗi.

⁷Mi tokkoto waŋgingo mbooɗeeŋga am haa yotto gide ujineere. Mi yaafoto aybe e tuurtol e hakke. Ammaa mi laarataa aybuɗo bana laaɓɗo sam. Mi hiitoto aybe baabiraaɓe haa ɓiɓɓe e taaniraaɓe haa yidere tataɓre e nayaɓre.”

⁸Law Muusa turi haa lesdi, o sujidi.

⁹O wi'i: “Yaa Jawmiraawo, to a yerdake yam, yah caka amin, koo nde yimɓe ummaatoore nde'e ɓe saata-ko'e'en. Yaafa aybeeji amin e hakkeeji amin. Jaɓ min, min laato maral ma!”

¹⁰Jawmiraawo wi'i: “Ndaa, mi haɓɓan alkawal bee mooɗon. Mi waɗan yeeso ummaatoore ma fuu kaayeefiiji ɗi meeɗaay waɗeego nder duniyaaru e caka ummaatooje fuu. Ummaatoore nde ngonɗa caka maare yi'an kuugal ngal kuuwanmi bee ma yeeso maare, ngal kulniiŋgal.

¹¹Ɗowtane ko umran mi on hannde. Ndaa, mi riiwan Amoori'en e Kanaani'en e Heti'en e Perezzi'en e Hewi'en e Yebusi'en yeeso ma.

¹²Ndeente, taa kaɓɓe alkawal bee jooɗiiɓe haa lesdi ndi on nastata, ngam taa ɓe laatano on tuuforgol.

¹³Ammaa ngibbine kirsirɗe maɓɓe, puse kaa'e ciftinorɗe maɓɓe e pe'e daŋraŋge labbi Aseraaji maɓɓe.

¹⁴Taa cujidane ɗowanteeɗo feere, ngam Jawmiraawo mo innde muuɗum Kaajuɗo, o Allah mo yiɗaa on tokko ɗowanteeɗo feere sam.

¹⁵Ndeente, taa kaɓɓe alkawal bee jooɗiiɓe haa lesdi ndi'i. Ngam to ɓe ɗon ɗakkotira bee labbi maɓɓe, ɓe ɗon lii'ano ɗi kirseteeɗi, ɓe ewnan on on nyaaman kirsaaɗum maɓɓe.

¹⁶To on te'ani ɓiɓɓe mooɗon worɓe ɓiɓɓe maɓɓe rewɓe, rewɓe ɓe'e estan ɓiɓɓe mooɗon worɓe haa ɓe zammbo yam bee ɗakkotirgo bee labbi ɗi rewɓe ɓe'e ndewata.

¹⁷Taa mbaɗane ko'e mon labbi ɓolinaaɗi.

¹⁸Kakkilane juulde tamseeje ɗe ufnaaka. Nyalɗe joweeɗiɗi nyaamoton tamseeje ɗe ufnaaka, bana mi umri on, nder saa'iire tabitiinde haa lewru Abiiba. Ngam nder lewru man ngurtiiɗon Misra.

¹⁹Mo aarti danyeego fuu, min jeyi. Non boo afi gorɗi haa dabbaaji mon fuu diga na'i e dammooji.

²⁰Cootte afre wamnde bee jawgel. To on coottaay nde, on ngewa daande maare. Cootte boo afɓe mon worɓe fuu. Taa ngare yeeso am juuɗe meere.

²¹Nyalɗe joweego kuuwoton, ammaa nyalaade joweeɗiɗawre sey on ciwto, koo nder wakkati remugo e wakkati sodugo boo.

²²Ngaɗe juulde asaweeje, waato juulde ƴaamnde alkamaari ma aartundi e juulde teɓki ɓiɓɓe leɗɗe haa timmoode hitaande.

²³Hitaande fuu nde tati, worɓe fuu ngara yeeso Jawmiraawo Allah Isra'iila.

²⁴Mi riiwan ummaatooje yeeso mooɗon, mi yaajinan lesdi mon boo. Walaa konneejo ukkanto lesdi mon, saa'i ngaroton yeeso Allah Jawmiraawo mooɗon, hitaande fuu nde tati.

²⁵Taa lii'aneeɗam ƴiiƴam kirsaaŋga hawtaade bee tamseere ufnaande. Taa cige kusel kirsaaŋga juulde Paska haa jaŋngo fajiri.

²⁶Ngadde ɓurɗum wooɗugo haa ƴaamnde mon aartunde nder suudu Jawmiraawo Allah mon. Taa ndefe jawgel nder kosam daada maagel.”

²⁷Jawmiraawo wi'i Muusa: “Winndu bolle ɗe'e. Ngam dow bolle ɗe'e kaɓɓumi alkawal bee maaɗa e bee ummaatoore Isra'iila.”

²⁸Muusa wondi ton bee Jawmiraawo nyalawmaaje e jemmaaje cappanɗe nayi. O nyaamaay nyaamdu, o yaraay ndiyam. O winndi umrooje sappo go dow alluhaaje.

²⁹Muusa jippi diga hooseere Sina, o ɗon jogi alluhaaje alkawal ɗiɗi. O anndaa laral yeeso maako ɗon yayna ngam o wolidi bee Jawmiraawo.

³⁰Haruna e Isra'iila'en fuu ndaari Muusa. Ndaa, laral yeeso maako ɗon yayna. Ɓe kuli ɓadaago mo.

³¹Muusa ewni ɓe, Haruna e ardiiɓe jama'aare fuu ngari haa maako. Muusa wolwani ɓe.

³²Ɓaawo man Isra'iila'en fuu ɓaditi. O umri ɓe ko Jawmiraawo wolwani mo dow hooseere Sina fuu.

³³Nde Muusa timmini wolwugo bee maɓɓe, o waɗi suddaare dow yeeso maako.

³⁴Koo ndey Muusa wari yeeso Jawmiraawo ngam o wolida bee maako fuu, o suddito haa to o wurtake. To o wurtake, o anndina Isra'iila'en ko Jawmiraawo umri mo.

³⁵Isra'iila'en ngi'i no laral yeeso Muusa yaynirta. Ɓaawo man, Muusa wartira suddaare dow yeeso muuɗum haa to o yehi ngam wolididgo bee Jawmiraawo.