Read Fulfulded Gurtaaki 37 Bible Online

Gurtaaki 37 - Fulfulded bible

Gurtaaki 37

¹Becaleel waɗi sundukru bee leggal gawaral. Njuutirka maaru waɗi meetir gootel bee reetita, njaajirka maaru boo meetir gootel reetita walaa, towirka maaru boo meetir gootel reetita walaa.

²O suddi ndu bee kaŋŋeeri laaɓndi, nder e yaasi fuu. O taarni sera maaru bee fawne kaŋŋeeri.

³O ɓolini ngam maaru kalagaaje kaŋŋeeri nayi ngam coɓɓuli maaru nayi, kalagaaje ɗiɗi haa wuttudu wooru, non boo kalagaaje ɗiɗi haa wuttudu nduya.

⁴O waɗi cabbi leggal gawaral, o suddi ɗi bee kaŋŋeeri.

⁵O nastini cabbi nder kalagaaje haa buttuli sundukru, ngam roondaago ndu.

⁶O waɗi jooɗorde ngam kefergal nde kaŋŋeeri laaɓndi. Njuutirka maare meetir gootel bee reetita, njaajirka maare boo meetir gootel reetita walaa.

⁷O waɗi keruba'en ɗiɗo bee kaŋŋeeri tappaandi haa seɓattooji jooɗorde ngam kefergal ɗiɗi,

⁸keruba gooto haa seɓatto wuttudu wooru, keruba feere boo haa seɓatto wuttudu nduya. O waɗi keruba'en ɗiɗo, ɗum laati kuuwaaɗum gootum bee seɓattooji maare ɗiɗi fuu.

⁹Keruba'en mbeeɗi bileeji muuɗum'en haa dow, ɓe mbaɗi ɗowdi dow jooɗorde ngam kefergal bee bileeji maɓɓe. Geese maɓɓe tiitotiri, ɗon ndaara jooɗorde ngam kefergal.

¹⁰O waɗi taabal bee leggal gawaral. Njuutirka maagal meetir gootel, njaajirka maagal, reeta meetir, towirka maagal boo meetir gootel reetita walaa.

¹¹O suddi ngal bee kaŋŋeeri laaɓndi, o taarni sera maagal bee fawne kaŋŋeeri.

¹²O waɗani ngal faddorde nde hapakaare, haa buttuli nayi fuu. O taarni sera faddorde bee fawne kaŋŋeeri.

¹³O ɓolini ngam maagal kalagaaje kaŋŋeeri nayi. O feɗi ɗe haa coɓɓuli nayi gonɗi haa kosɗe maagal.

¹⁴Kalagaaje man laati ɓadiiɗe faddorde, ɗe njogo cabbi ngam roondaago taabal.

¹⁵O waɗi cabbi leggal gawaral, o suddi ɗi bee kaŋŋeeri, ngam roondaago taabal.

¹⁶O waɗi kuuje gonɗe dow taabal: Taasaaje e taasahoy e jarduɗe e bulki ngam lii'aago dokke dufeteeɗe. O waɗi ɗum fuu bee kaŋŋeeri laaɓndi.

¹⁷O waɗi jo'inirɗum pittirlaaji bee kaŋŋeeri laaɓndi tappaandi. O waɗi ɗum bee kuugal tappoowo, jooɗorɗum bee dubbeere e taasahoy e morle e pinndi haa maajum fuu. Ɗum fuu ɗum laati kuuwaaɗum gootum.

¹⁸Lice joweego ngurti haa buttuli maajum, lice jo'inirɗum tati haa wuttudu ndu'u, non boo lice tati haa wuttudu nduya.

¹⁹Taasahoy tatoy bana ɓiɓɓe lawjahi haa lisal gootal bee morlere e pinndiri. Non boo taasahoy tatoy bana ɓiɓɓe lawjahi haa lisal ɗiɗaɓal, bee morlere e pinndiri, bana non lice joweego fuu gurtotooɗe haa jo'inirɗum pittirlaaji.

²⁰Haa dubbeere jo'inirɗum boo, taasahoy nayoy bana ɓiɓɓe lawjahi bee morle maare e pinndi maare.

²¹Morlere woore les lice maare ɗiɗi, kadiboo morlere woore les lice maare ɗiɗi, fahin morlere woore les lice maare ɗiɗi, ngam lice joweego gurtotooɗe haa jo'inirɗum pittirlaaji.

²²Morle e lice e jo'inirɗum pittirlaaji fuu laati kuuwaaɗum gootum, ɗum kaŋŋeeri tappaandi laaɓndi.

²³O waɗi pittirlaaji maajum joweeɗiɗi e mekefje maajum e taasahoy ndoondi maajum fuu bee kaŋŋeeri laaɓndi.

²⁴O waɗi kuuwruɗe maajum fuu bee kaŋŋeeri laaɓndi baakin kilo cappanɗe tati.

²⁵O waɗi gulduɗum uurle bee leggal gawaral. Njuutirka maajum reeta meetir, njaajirka maajum boo reeta meetir, waato tolɗi nayi potanɗi, towirka maajum boo meetir gootel. Ɗum laati kuuwaaɗum gootum bee luwe maajum.

²⁶O suddi ɗum bee kaŋŋeeri laaɓndi, dow maajum e buttuli maajum e luwe maajum fuu. O taarni sera maajum bee fawne kaŋŋeeri.

²⁷O waɗi ngam maajum kalagaaje kaŋŋeeri ɗiɗi les fawne sera maajum. O waɗi ɗe haa buttuli maajum ɗiɗi, ɗe njogo cabbi ngam roondaago ɗum.

²⁸O waɗi cabbi leggal gawaral, o suddi ɗi bee kaŋŋeeri.

²⁹O waɗi nebbam cenirɗam e baɗoowo uurle boo waɗi uureteeɗum laaɓɗum.