Read Fulfulded Gurtaaki 5 Bible Online

Gurtaaki 5 - Fulfulded bible

Gurtaaki 5

¹Ɓaawo man Muusa e Haruna njehi haa Firawna, mbi'i mo: “Ndaa nii Jawmiraawo, Allah Isra'iila wi'i: Accu yimɓe am njaha, ɓe mbaɗanammi juulde nder ladde.”

²Firawna jaabi: “Moy woni Jawmiraawo oo, haa mi ɗowtano mo, mi acca Isra'iila'en ndilla? Mi anndaa mo, mi accataa Isra'iila'en ndilla!”

³Muusa e Haruna mbi'i: “Allah Ibraniŋke'en, Jawmiraawo amin waŋgani min. Duŋan min min njaha nder ladde jahaaŋgal nyalɗe tati, haa min lii'ano Jawmiraawo Allah amin kirseteeɗi, ngam taa o mbara min bee nyawu kalluŋgu ndaaɓoowu malla bee kaafahi.”

⁴Laamiiɗo Misra wi'i ɓe: “Onon, Muusa e Haruna, koni cottinton Isra'iila'en diga kuugal muuɗum'en? Lorte haa kuugal mooɗon!”

⁵Firawna ɓesdi wi'ugo: “Jonta, yimɓe ɓe'e ɓe ɗuuɗɓe. On ngiɗi siwtingo ɓe diga kuuɗe maɓɓe na?”

⁶Nyalaade man Firawna hokki umroore nde'e haa Misra'en ardaniiɓe kuuɗe doole dow Isra'iila'en e Isra'iila'en laatiiɓe kaliifa'en dow deerɗum'en, o wi'i ɓe:

⁷“Taa ndokke Isra'iila'en geene ngam tappugo birikje fahin. Sey ɓe njaha, ɓe tefa geene bee ko'e maɓɓe!

⁸Ndoole ɓe tappugo limgal birikje bana ngal ɓe ɗonno tappa naane. Taa uste ngal sam. Ngam ɓe mbaateendam'en! Kanjum waɗi ɓe ɗon ngooka, ɓe ɗon mbi'a: Sey min njaha, min lii'ano Allah amin kirseteeɗi.

⁹Kuugal teddana ɓe haa ɓe cuklo bee man, taa ɓe kakkilana bolle pewooje!”

¹⁰Ardaniiɓe kuuɗe doole e kaliifa'en go ngurti, njehi ɓe mbi'i Isra'iila'en: “Ndaa nii Firawna wi'i: Mi hokkataa on geene fahin.

¹¹Njehe bee ko'e mooɗon, tefe geene haa on tawata ɗe fuu. Ammaa limgal birikje ɗe ɓe ƴami on boo ustataako!”

¹²Nden Isra'iila'en caŋkiti nder lesdi Misra fuu ngam tefugo geene ngam birikje.

¹³Ardaniiɓe kuuɗe doole dow Isra'iila'en go njaawɗini ɓe, mbi'i: “Timmine kuugal mon kal-kal bana naane nde keɓnooɗon geene!”

¹⁴Yimɓe Firawna, waato ardiiɓe kuuɗe doole go piyi kaliifa'en ɓe ɓe ndarni dow Isra'iila'en. Ɓe ƴami ɓe: “Ngam ɗume nyalɗe ɗe'e on cikitinaay limgal birikje ɗe on ɗonno tappa naane?”

¹⁵Ardiiɓe dow Isra'iila'en njehi haa Firawna, ɓe ciŋki, ɓe mbi'i: “Ngam ɗume mbaɗata maccuɓe ma bana nii, barkaama?

¹⁶Ɓe ndokkataa min huɗo fahin, ammaa ɓe ɗon mbi'a min: Tappe birikje! Ɓe ɗon piya min boo. Ummaatoore ma ɗon bee aybe[4].”

¹⁷Firawna jaabi: “On mbaateendam'en, mbaateendam'en on fuu! Ngam man on ɗon mbi'a: Sey min njaha, min lii'ano Jawmiraawo kirseteeɗi.

¹⁸Lorte haa kuugal mon! Ɓe ndokkataa on geene fahin, ammaa sey on cikitina limgal birikje ɗe ɓe ta'ani on!”

¹⁹Ardiiɓe Isra'iila'en ngi'i ɓe ɗon nder bone. Ngam ɓe mbi'i ɓe: “Taa uste limgal birikje ɗe ɓe ta'ani on nyalaade fuu!”

²⁰Yaake ɓe ɗon ngurto saare Firawna, ɓe potti bee Muusa e Haruna, ɓe ɗonno ndeena ɓe.

²¹Ɓe mbi'i ɓe: “Jawmiraawo laara ko mbaɗɗon, o hiito on! Ngam on laatini min wanyaaɓe Firawna e wonduɓe bee muuɗum. On ndokki ɓe kaafahi haa ɓe mbara min!”

²²Nden Muusa tori Jawmiraawo, wi'i: “Yaa Jawmiraawo, ngam ɗume mbaɗɗaa ummaatoore nde'e kalluɗum? Ngam ɗume nelɗaami haa ɗo?

²³Nde njahmi haa Firawna ngam wolwango mo bee innde ma fuu, o ɗon yarna ummaatoore nde'e bone, an boo walaa ko a waɗi ngam hisnugo ummaatoore ma.”