Read Fulfulded Ayuba 20 Bible Online

Ayuba 20 - Fulfulded bible

Ayuba 20

¹Nden Cofar Na'amatiijo wi'i:

²Ko a wi'i, ɗum ɓulni numooji am, haala maajum fuu ummini ɓernde am.

³Mi ɗon nana feloore huɗannde yam. Ndaa jaawaabu ngu'u iwi haa anndal am:

⁴An a anndi fakat, diga ɓooyma fuu, diga yimɓe ɗon dow lesdi,

⁵jaalorgal halluɓe neeɓataa, seyo naafiki'en timman tippungel.

⁶Koo o mawni haa o yotti asama, hoore maako boo nasti nder duule ton,

⁷bana mbuuwri o majjirta haa foroy, anndunooɓe mo ƴaman: “E toye mo?”

⁸Bana koyɗol jemmaare o majjirta, o diiweteeɗo diga lesdi bana wahayu jemma, walaa keɓtanɗo mo.

⁹Koo moy yi'i mo, meetataa yi'ugo mo, nokkuure haa o jooɗino boo meetataa yi'ugo mo.

¹⁰Jawdi ndi o wujji haa laafuɓe, sey ɓiyiiko'en lorna ndi, ndokkita ɓe.

¹¹Ɓanndu maako semmbiɗndu bana suka, ammaa yeeso seɗɗa ndu waaloto nder mbulwuldi.

¹²To halleende welani hunnduko maako, to o ɗon suuɗa nde les ɗemŋgal,

¹³to o ɗon sigo nde ton bilaa accugo nde, to o ɗon jogito nde haa nder hunnduko,

¹⁴nyaamdu maako nyolan nder reedu maako, wartan tooke culanndi.

¹⁵O moɗino jawdi woɗɓe, o tuutan ndi, koo haa reedu boo Allah wurtinan ndi.

¹⁶Ngam o tahi tooke, ɗe mbaran mo, tooke foosokre mbaran mo.

¹⁷O meetataa yi'ugo maaje nebbam e njumri e kosam boo.

¹⁸Ko o faggi fuu, sey o lorna ɗum, walaa dabare sam haa o nyaama ɗum, o seyortaako riba filu maako.

¹⁹Ngam o ɓilluno laafuɓe, o faalaay ɓe, goɗɗo mahino saare, o jaɓti nde.

²⁰Suuno maako anndaano haarannde sam, ko o seyorto fuu, walaa ko o hisnataa.

²¹Walaa kisɗum e suuno nyaamoowo oo, kanjum risku maako duurataa boo.

²²Caka ɗuuɗal hayruuji o ɓilloto, torra waran dow maako bee semmbe fuu.

²³Saa'i o ɗon hebbina reedu maako, Allah ukkanan mo ɓernuki muuɗum fuu, bana iyeende ki toɓan dow goɗɗo oo.

²⁴To o doggi kaafaaje njamndiije, lagaawal njamndi mboɗeeri sumpitan mo.

²⁵O ittan kurol gurtiiŋgol ɓaawo maako, non boo balmol ceekŋgol heŋre maako. Kulol maayde waran dow maako.

²⁶Walaa siga ngam maako, sey nyiɓre tan, yiite nyaaman mo, koo nge fuufaaka sam. Koo moy lutti nder saare, nge nyaaman ɗum.

²⁷Asamanji kollan mo aybe maako fuu, duniyaaru boo honan mo.

²⁸Ko o mari nder suudu, ɗum dahete, nyannde ɓernuki Allah, ɗum wiftete.

²⁹Kanjum Allah ɗon ukkana kalluɗo, kanjum geɗal ngal Allah yeɗi mo.