Read Fulfulded Ayuba 24 Bible Online

Ayuba 24 - Fulfulded bible

Ayuba 24

¹Koni Allah Baawɗo ta'aay nyalɗe ɗe o waɗata kiita? Koni yimɓe maako ngi'ataa nyalɗe man?

²Woɗɓe cottinan keeri gese mum'en, woɗɓe njaɓtan dammooji, nden ɓe ndura ɗi.

³Woɗɓe coggan koo wamnde atiimeejo boo, debbo jurumɗo boo, ɓe koocan nagge maako jeŋngina[18].

⁴Ɓe ɗon ndiiwa talaka'en diga laawol, ɓe ɗon ndoola laafuɓe lesdi ɓe nyukko.

⁵Bana bamɗe ladde, laafuɓe ɗon ndawana kuugal, haa ɓe tefana ɓikkoy maɓɓe ko nyaame nder ladde.

⁶Sey ɓe mba'a huɗo haa geese, ɓe ittana kalluɗo inabooje.

⁷Ɓe ɗon mbaala ɓe holɓe, bilaa limce boo, saa'i jaaŋgol ɓe ngalaa ko ɓe cuddorto.

⁸To ɓe ɗon nder kooseeje, iyeende soofnan ɓe, ɓe ɗon karla tapaaje bana hisrude.

⁹Woɗɓe ɗon mbifta atiimeyel, ɓe ɗon kooca jawdi laafuɗo bana jeŋngina.

¹⁰Laafuɓe ngiiloto ɓe holɓe, koo ɓe ɗon ndoondi cammeeje alkamaari, dolo naawan ɓe.

¹¹Caka jarne ɓe ɓiɗɗan nebbam[19] halluɓe, koo haa ɓiɗɗirde njaram, ɗomka torran ɓe.

¹²Ndaa, yimɓe ɗon uuma nder berniwol. Ndaa, balmaaɓe ɗon ngooka ngam naaweeŋga. Ɓe ɗon torro, ammaa walaa ko yaali Allah.

¹³Woodi woɗɓe, ɓe caloto annoora fuu, ɓe anndaa laabi maako, ɓe laataaki tokkiiɓe ka sam.

¹⁴Hidde weeta mbaroowo ko'e ummoto haa o mbara talakaajo e laafuɗo. Bee jemma boo o laatoto gujjo.

¹⁵Daakaareejo ɗon reena garki jemma tan, o ɗon wi'a: “Walaa mo yi'atammi.”

¹⁶Bee jemma wuyɓe ngasata cuuɗi yimɓe, bee nyalawma ɓe majjitan, ɓe nyukkoto. Ɓe anndaa haala jayŋgol.

¹⁷Ɓe ɗon kula fajiri bee annoora mum, ammaa nyiɓre hulnataa ɓe sam.

¹⁸Goɗɗo kalluɗo fuu, ilamji ilnan ɗum. Maral maako haa lesdi boo, yimɓe naali ɗum. O tokkataako laawol gese inabooje sam.[20]

¹⁹Bana nguli ceeɗu yartirta ndiyam nduŋngu, non joonde maayɓe boo moɗata baɗɗo hakke.

²⁰Reedu danyɗo mo yejjitan mo, gilɗi timminan kusel ɓanndu maako fuu. Walaa ciftorki innde maako ɓaawoɗon, Allah yewan halleende bana leggal non.

²¹Kanjum laatanto mo toonyi dimaro, mo woonanaay debbo jurumɗo boo.

²²Allah bee baawɗe mum halkan marɓe baawɗe fuu. To o ummake, yoŋki maɓɓe wemmboto.

²³Koo o hokki ɓe de'ere, o munyi, ammaa boo o ɗon ayna laabi maɓɓe.

²⁴Ɓe ɓaŋgoto seɗɗa, nden ɓe leesan, ngam ɓe njanan, ɓe ɗaylan fuu bana geene, ɓe ɗon bana cammeeje ta'aaɗe.

²⁵Kadi naa bana nii na? Moy fewnatammi? Moy waawata meeriɗingo bolle am?