Read Fulfulded Ayuba 27 Bible Online

Ayuba 27 - Fulfulded bible

Ayuba 27

¹Ayuba tokkitini haala muuɗum, wi'i:

²Mi ɗon hunoro innde Allah geeto, mo sottini adilaaku am, Allah Baawɗo hebbini ɓernde am bee mettamɓeram.

³To mi ɗon bee yoŋki, to poofɗe Allah boo ɗon lutti nder am,

⁴bolle kalluɗe ngurtataako hunnduko am, walaa fewre koo woore haa ɗemŋgal am.

⁵Mi meeɗataa gooŋɗingo ko mbi'ɗon yam! Haa mi maaya mi seedoto laaɓeeŋga am.

⁶Mi jogoto adilaaku am, numo ɓernde am laaɓi, felataa yam sam.

⁷Sey konneejo am laato bana kalluɗo, ummaniiɗo yam boo bana faasikiijo.

⁸Nyannde maayde, noy naafikiijo tammorto, saa'i Allah ta'i mo poofɗe?

⁹Kadi Allah ɗon nana to o wooki na, to ɓillaare ɗon heɓa mo bee juhuki?

¹⁰Nyannde man nden Baawɗo laatanto mo seyo na? Goɗɗo heɓan toraago mo koo ndey na?

¹¹Sey mi faamna on haala kuuɗe Allah fuu. Mi suuɗataa ko Allah Baawɗo nufoto.

¹²Ammaa onon bee ko'e mon on ngi'i ɗum. Ɗume waɗi on ɗon mbolwa bolle meere non?

¹³Ndaa geɗal ngal Allah yeɗi kalluɗo, ndaa kiita maako keɓanka toonyotooɗo boo:

¹⁴Ɓiɓɓe maako ɗon ɗuuɗa ngam mbareego tan, danygol maako haarataa bee nyaamduuji sam.

¹⁵Nyawuji kalluɗi mbaran ɓiɓɓe luttuɓe, rewɓe maako yurumɓe boo mboyataa ɓe.

¹⁶To o waagi cardi bana mbulwuldi, limce bana loope boo,

¹⁷ɗum adiliijo ɓornoto ɗe, cardi maako boo, gooŋga'en cenndan ndi.

¹⁸Suudu maako ndu o nyiɓi walaa semmbe, ndu tampundu bana bukkaaru aynordu.

¹⁹O waaloto o diskuɗo. To o fini, walaa ko o tawata.

²⁰Bana ilam, non kultoreeŋgol naŋngirta mo, nder jemmaare, henndu saatundu waran, ruuyna mo.

²¹Henndu fuunaaŋge efta mo, haa ndu yahra mo daayiiɗum bee saare maako.

²²Bilaa enɗam ndu faɗɗan mo bee caatal, koo to kaŋko o ɗaɓɓiti daɗugo ndu.

²³Yimɓe kellan juuɗe to ɓe ngi'i ko heɓi mo, ɓe njancan mo haa pellel ngel o jooɗino.