Read Fulfulded Ayuba 31 Bible Online

Ayuba 31 - Fulfulded bible

Ayuba 31

¹Ndaa, mi kaɓɓuɗo alkawal bee gite am, taa mi laara bee suuno heedi paanyo sam.

²Geɗal ngale mi heɓanno diga asama, Maral ngale Allah Baawɗo gonɗo nder ɓaŋgiiɗum neldantammino?

³Kadi halkere walaa ngam baɗɗo ɓeetaare na? Walaa sarru haa baɗɗo zunuubaaji na?

⁴Kuuɗe ɗe mi huuwi fuu, Allah anndi ɗe, palanɗe am koo ɗeye, o limi ɗe.

⁵To on numi mi huuwtiniri fewjere malla kosɗe am tokki laawol rikici,

⁶Allah kilammi dow awnorɗum gooŋgaajum, nden o annditan law mi walaa aybe sam!

⁷To palanɗe am celi laawol darnuŋgol malla ɓernde am jaɓi esto gite am malla aybewol lutti, takki juuɗe am,

⁸nden ko aawanmi, goɗɗo feere nyaama ɗum, ɗum ko fuɗantammi, woɗɓe ngara, ɗoofa ɗum.

⁹To mi duŋake debbo esta ɓernde am, to mi reeni mo haa yolnde keeddiɗɗam,

¹⁰nden kam debbo am namana goɗɗo feere, goɗɗo feere waaldo bee maako!

¹¹Ngam fakat, irin maajum woni nyidduɗum, kanjum he'i haa hiitooɓe kiito ɗum.

¹²Ngam ɗum nanndi bee yiite nder jahannama, haa nge halka ko laatani yam nafuuda fuu.

¹³To mi salino gooŋɗingo jeyaaɓe am, nde ɓe ngardi bee ngaaba maɓɓe yeeso am,

¹⁴nden kam noy mbaɗannoomi yeeso Allah am? Ɗume njaabotoomi Allah to o ƴami yam?

¹⁵Allah gooto oo tagi min bee maɓɓe fuu, kaŋko wurtini min reedu daada boo.

¹⁶Mi salaaki fortango talaka'en, mi salaaki wallititgo rewɓe yurumɓe.

¹⁷Mi meeɗaay nyaamugo nyaamdu am min feere am, tum atiime'en nyaami haa nder le'al am.

¹⁸Bana baaba mi nyaamni ɓe nyalɗe fuu diga mi derkeejo, foroy mi ɗowi rewɓe yurumɓe.

¹⁹Koo ndey ngi'mi ɓilliiɗo cooyɗo limce malla laafuɗo cooyɗo koo mojaare,

²⁰min mi ɓorni mo limce gaasa baali am, koo to o yettaay yam, o barkiɗinaay innde am.

²¹To mi sappi gooŋɗuɗo bee juŋngo am, ngam mi gi'ɗo seedotooɓe wallooɓe yam,

²²nden kam balawal fiista diga ɓaawo, non boo juŋngo am yewa haa soɓɓundu!

²³Mi ɗon hula taa kiita Allah do'a yam, maŋngu maako kayɗiniiŋgu ɓuri semmbe am.

²⁴Mi tuugtaaki dow jawdi ndi kaŋŋeeri am, mi wi'aay ndi: “An laati hoolɗinaare am.”

²⁵Mi meeɗaay seyoraago ɗuuɗki risku am, kuuje ɗuuɗɗe ɗe mooɓtumi bee juuɗe am.

²⁶Koo ndey ngi'mi no jayŋgol naaŋge ɗelkirta e no lewru yaynirta nder yahdu mum,

²⁷mi meeɗaay jaɓugo esto haa nder ɓernde am bee sirri, haa mi teddina naaŋge malla lewru man.

²⁸Kaanduɗum irin aybe man hiite, ngam ɗum yeddugo Allah mo asama!

²⁹Mi seyoraaki do'ere konneejo am, mi yimaay boo nde sarru naawŋgu heɓi mo,

³⁰tum mi haɗiti hunnduko am waɗugo aybe, taa mi ɗaɓɓira mbarugo konneejo am bee naalugo mo.

³¹Koo moy hoɗi haa saare am, seedoto: “Nde mi wari haa maako, mi nyaami kusel haa mi safti.”

³²Walaa koɗo baalɗo yaasi, haa waɗooɓe jahaale mi maɓɓiti zawleeru am.

³³Mi meeɗaay suuɗugo aybe am bana ɗuuɗɓe cuuɗirta ɗi, mi nyukkinaay zunuuba sam.

³⁴Mi meeɗaay hulugo haala mooɓre yimɓe sam, mi jeeɗaaki, mi hulaay wurtaago suudu am ngam daliila jancoore nde ɓe njanci yam.

³⁵Toy mi heɓata gooto haa o nanammi? Ndaa ɗo haala am! Jonta Baawɗo jaabammi! Toy wullaandu ndu konne'en am mbinndi ɗum?

³⁶Haa mi wakka wullaandu man dow balbe am, sey mi waɗa ndu meetaleewol hoore am!

³⁷Nden mi limtana Allah ko mi waɗi fuu, bana laamiiɗo mi tammi ɓaditaago mo!

³⁸To mi toonyake ngesa haa ka wulli yam, kaatorooji boo mballiti ka woyugo,

³⁹to mi nyaami haa maaka bilaa yoɓugo remɓe ka, to mi yoɓaay ko haandani remɓe ka,

⁴⁰taa ka fuɗna sa'iiruuri, sey gi'e tan e ciŋgirri boo mbattudi[27] sa'iiruuri. Bolle Ayuba timmi.