Read Fulfulded Ayuba 37 Bible Online

Ayuba 37 - Fulfulded bible

Ayuba 37

¹Kanjum umminta diwŋgol nder ɓernde am, nde ɗon fiya bee semmbe nder am.

²Sey on nana no Allah men riggirta, sawtu maako no telɓirta!

³Ma'e maako ɗon njaynina asama fuu, ɗe ɗon njotto haa keeri duniyaaru.

⁴Ɓaawo maaje pelmaali ɗon pelma tum, Allah ɗon hoola bee sawtu mum cemmbiɗɗo. Ma'e maako, o jogitittaako ɗe, daande maako boo, koo moy ɗon nana nde.

⁵Sawtu Allah ɗon rigga, ɗum kayɗiniiɗum! Kuuɗe maako ɗe mawɗe. Moy waawata faamugo ɗe?

⁶Allah umran iyeende toɓugo, kaŋko umrata mallimallooje boo.

⁷Nii o haɗirta koo moy kuugal mum, yimɓe anndita kaŋko o waɗi ɗum.

⁸Dabbaaji ladde fuu nastan nder nyukkorde, haa ɗe ndeena, ɗe mbaalo nokkuure nde'e.

⁹Ndaa, duluuru ɗon iwa haa fombina, jaaŋgol boo haa woyla iwata.

¹⁰Poofɗe Allah ɗon kattina ndiyam, ndiyam maaje jaasɗe ɗon caata bana kaa'e.

¹¹Kaŋko rimdata duule bee ndiyam boo, duule keewɗe ma'e ɗe'e, o ɗon saŋkita ɗe.

¹²Ɗe ɗon njaha, ɗon taaro taaraago nii, muuyo Jawmiraawo ɗon ɗowa ɗe, haa ɗe timmina ɗum ko o umri fuu, haa nder taarde duniyaaru ndu'u koo toy fuu.

¹³Allah ɗon huuwtinira ɗum ngam eltugo yimɓe e ngam waŋgingo alaama mo'ere maako boo.

¹⁴An Ayuba, sey a nana ɗum! Dara, laar kuuɗe Allah kayɗiniiɗe.

¹⁵A anndi no o umrata ɗe e no o yayninta ma'e nder duule na?

¹⁶Malla a paamɗo no duule man leerdata? Ɗe ɗon mbaŋgina anndal kaayeefiiwal.

¹⁷An kam, limce ma takkoto ɓanndu ma, saa'i henndu ɗon wula dow lesdi ma.

¹⁸Bana Allah a we'itan asamaawu haa ngu saata bana daarorgal njamndi na?

¹⁹Sey a anndina min ko min mbi'ata mo. Sooynde anndal ɗon haɗa min wolwugo.

²⁰Goɗɗo wi'an mo: “Accu mi wolwa na”? Sey ɓe mbi'a mo goɗɗo wolwi na?

²¹Saa'i feere en ngi'ata naaŋge, nge ɗon wiirni nder duule ɓaleeje, nden henndu ɗon ummo laɓɓina asama.

²²Ɗelko bana kaŋŋeeri ɗon iwa diga woyla, maŋngu Allah ɗon waŋga, ɗon hulna en.

²³Allah Baawɗo, en mbaawataa ɓaditaago mo, o mawɗo, o mari semmbe e kiita ngooŋɗuka, o nattintaa adiliijo timmuɗo.

²⁴Ngam daliila man sey yimɓe fuu kula mo. O laarataa yikkanɓe ɓe hikma'en.