Read Fulfulded Ayuba 39 Bible Online

Ayuba 39 - Fulfulded bible

Ayuba 39

¹An a anndi ndey jabaaje ndimata na? Malla a giiɗo no lelji debbi ndimirta?

²Lebbi noye ɗi ndeedata, a limi na? Wakkatiiji ɗi ndimata, a anndi na?

³Saa'i rimugo, sey ɗi ɗappina. Luuwe nduurataa, law ɗe timmirta.

⁴Ɓikkoy maaji ɗon mawna, ɗon keɓa semmbe, nden koy ngurtoto yaasi, koy ngartataa fahin.

⁵Moy rimɗini wamnde ladde, yoofti nde? Moye fiisti toŋngorde maare, itti nde?

⁶Min mi hokki nde ladde bana jooɗorde, lesdi mannda boo laatani nde wonorde.

⁷Nde ɗon jala hoolo berniiji, nde nanataa koo telɓuki coggoowo.

⁸Nde ɗon wa'o kooseeje haa nde dura ton, nde ɗon wiɗito koo toy, teema keccum ɗon.

⁹Kadi mbana huuwante kuugal na? Malla jemma nga waalan haa nder suudu dabbaaji ma?

¹⁰Daande maaga, a haɓɓan nde bee ɓoggol, haa nga tokko ma remugo kaatorooji na?

¹¹An a hooloto maŋngu semmbe maaga, haa a acca nga huuwugo kuugal maaɗa na?

¹²A ɗon hoolo nga haa nga hoorane alkamaari maaɗa, haa nga mooɓtane ƴaamle ma haa laarre na?

¹³Bee ceyiiɗum bileeji ndawu liilirta. Ɗi ɗon nanndi bileeji ngaasiyoowal na[34]?

¹⁴Nder mbulwuldi ngu wallinta geeraaɗe, lesdi wulna ɗe, wurtina ɓiɓɓe boo.

¹⁵Ndaa ngu yejjiti kosŋgal waawan fusgo ɗe malla ndabbaawa ladde waran, yaaɓa ɗe.

¹⁶Bana njanannoy ngu saatanta ɓiyiigu'en, kuugal maagu, to meere, ngu faalaaka ɗum.

¹⁷Min mi sooyni ngu hikma, saa'i tagmi ngu, mi hokkaay ngu hakkiilo, koo seɗɗa.

¹⁸Bee non fuu, to ngu ummake ngam doggugo, ngu ɗon jala koo puccu e ba'iiɗo ngu.

¹⁹An hokki puccu semmbe muuɗum na? An ɓorni ngu damsali haa daande na?

²⁰Haa ngu diwa bana mbaɓɓattu, an waɗi ɗum na? To ngu hiji bee semmbe, naa kulniiɗum na?

²¹Ngu ɗon ficca nder waadiwol, ngu seyoto, bee semmbe ngu nastirta nder haɓre boo.

²²Ngu ɗon jala kulniiɗum, ngu hulataa sam, koo to ndaa kaafahi, puccu lorataako sam.

²³Haa dow puccu man ɓaaru kuri sonyata, bana naaŋge, non labbe ceeɓɗe ɗelkirta.

²⁴Nden ngu naarja, moɗa laawol fuu, to ɓe puufi luwal, ngu de'ataa.

²⁵Puccu jaaboto fuufre fuu bee forgo, diga daayiiɗum ngu luuɓnata konuuji e hoolo mawɓe honooɓe e gookaali.

²⁶Fodde sawari maaɗa ciilal fiirata, to ngal weeɗi bileeji heedi fombina na?

²⁷An a umminan dutal bee umroore ma, haa ngal jo'ina saɓɓo haa ɓaŋgiiɗum na?

²⁸Dow tapaaje ngal jooɗata, ngal waalo dow yeereere maaje ngal waɗa saɓɓo maagal semmbiɗŋgo.

²⁹Diga ton ngal ɗon laara kuuje nyaamugo, gite maagal ɗon eewa ɗe daayiiɗum.

³⁰Ɓikkoy maagal ɗon njara ƴiiƴam tan, haa mbaraaɓe ɗon mbaali, ton ngal wonata.