Read Fulfulded Ayuba 7 Bible Online

Ayuba 7 - Fulfulded bible

Ayuba 7

¹Ngeendam neɗɗo haa duniyaaru laati bana ngeendam soojeejo. O ɗon bana kuuwoowo kuugal ngeenaari,

²bana maccuɗo gonɗo nder naaŋge yenwirta ɗowdi, bana kuuwoowo deenanɗo ngeenaari mum.

³Lebbi ɗuuɗɗi nder naaworlaaji, kanjum woni mardi am, koo bee jemma boo torra accataa yam sam.

⁴To mi waalake, mi ɗon numa: “Ndey mi ummoto?” Ammaa to jemma timmataa, mi talloto dow be'itte haa weeta, haa mi safta boo.

⁵Tuundi loope e gilɗi cuddi ɓanndu am. Laral ɓanndu am ɗon seeka, ɗon ila mbordi.

⁶Nyalɗe ɗon ndogga ko ɓuri horde cannyargal, ɗe ɗon njinna, walaa tammunde!

⁷Siftor, ngeendam am laati bana henndu! Mi meetataa yi'ugo balɗe hayru am.

⁸Koo moy yi'i yam jonta, meetataa yi'ugo yam fahin. A tefatam ammaa mi tawataake.

⁹Bana ruuldere saŋkitirta, jinna, non goɗɗo jipporto haa joonde maayɓe, lorataako fahin.

¹⁰O wartata saare maako kadiboo, saare maako annditittaa mo fahin.

¹¹Ngam maajum mi naŋgtataa hunnduko, mi wolwan. Mi waŋginan ɗum ko ɓillata ruuhu am. Mi siŋkan nder mettamɓeram am.

¹²Mi mbeela malla kuuŋga nder mbeela na, haa njo'ina goɗɗo aynoowo yam?

¹³Nde mbi'mi: “Be'itte am nde'itintam, sey waalorde hoyna siŋkuye am”,

¹⁴a neldi yam koyɗi, a hulni yam, bee gi'ki nder jemma a diwni yam.

¹⁵Ɓe ɗeɗɗammi, ɓurantam wooɗugo, ngam am — ndikka maayugo!

¹⁶Mi yiɗaa a juttina balɗe am fahin, ɗe nafataa yam, accam, taa ɓillam.

¹⁷Ɗume neɗɗo maayanɗo haa ɓaŋgta mo, haa a hakkilana mo masin?

¹⁸A laarndoto neɗɗo nde weeti fuu, saa'iije fuu a ɗon linya mo.

¹⁹Ndey accata laarugo yam? Ndey accata yam mi moɗa tuuɗe am?

²⁰To mi waɗi hakke, ɗume ɗum waɗete, an kakkilanoowo ɓii-Aadama? Ngam ɗume cuɓɗa mi ngam kuri ma? Mi teddani ma bana doŋngal na?

²¹A sali yaafaago aybeeji am. Ngam ɗume a ittataa hakke am? Neeɓataa mi waaloto nder lesdi boo. A ɗaɓɓatam, ammaa mi tawataake fahin.