Read Fulfulded Ayuba 9 Bible Online

Ayuba 9 - Fulfulded bible

Ayuba 9

²Gooŋga kam, mi anndi ko mbi'ɗa ɗum gooŋga. Noy neɗɗo laatorto adiliijo yeeso Allah?

³To goɗɗo yiɗi hujjotirgo bee Allah, o jaabataako mo koo nde woore dow ƴamɗe ujineere!

⁴Walaa ko o anndaa, o Baawɗo. Moy tuurtanta mo bilaa halkugo?

⁵O sottinan kooseeje bilaa anndaaŋgal maaje, nder ɓernuki maako o hippan ɗe.

⁶O dimmbinan duniyaaru haa pellel mum, o diwninan caɓɓaaje maaru.

⁷O haɗan koo naaŋge boo yaynugo, o nyiɓɓinan koode haa asama.

⁸Sey kaŋko tan we'iti asama, o yaaɓan dow ƴuuge ndiyamji.

⁹O tagi Nyiiwaaje e ɗaccuki e dulooje e koode haa fombina.

¹⁰O ɗon waɗa kuuje mawɗe ɗe paamataake. Walaa mo waawata limugo kuuje kayɗiniiɗe ɗe'e.

¹¹Mi waawataa yi'ugo mo koo to o ɗon saalo kommbi am. To o dilli, mi waawataa heɓtugo.

¹²To o jaɓti huunde, moy waawata hoosititgo ɗum? Moy wi'ata Allah: “Ɗume mbaɗata ɗo?”

¹³To Allah ɓerni, o faasitittaa ɓernuki maako, koo ɓen walluɓe Rahab[7] boo maati ɗum.

¹⁴Kadi noy min mi heɓrata mi jaabo mo? Bolle ɗeye mi suɓata ngam wolwugo yeeso maako?

¹⁵Koo mi adiliijo, mi jaabataako sam, ngam sey mi ɗaɓɓita enɗam haa kiitoowo yam.

¹⁶Koo to mi ewni mo, kaŋko boo o jaabi yam, noy mi anndirta kaŋko o nanatam?

¹⁷Ngam o neldan duluuru, o namatam, meere non o ɗon ɗuɗɗina naawnere am.

¹⁸O accataa mi foofa foofaaŋgo am, ammaa o ɗon haarnammi torra e bone tan.

¹⁹Mi waawataa haɓugo bee maako, ngam o cemmbiɗɗo masin. Haa kiita boo, moy foti ewnugo mo ngam haa mi waŋgina hujja am?

²⁰Koo to hujja am laaɓi, bolle am ndo'atam. Koo mi adiliijo, bolle am aybintam.

²¹Fakat mi adiliijo kam na? Min bee hoore am, mi anndaa. Mi ɗon miccita ngeendam am.

²²Ɗum fuu ɗum gootum! Ngam maajum mi wi'an: Allah nattinan adiliijo e kalluɗo boo.

²³To sarru wari bee juhuki, ɗon mbara, Allah jalan dow saklere laaɓɓe.

²⁴Nde duniyaaru ɗon les baawɗe kalluɗo, Allah ɗon wumna gite hiitooɓe! To naa Allah waɗi ɗum, ɗum moy kadi?

²⁵Nyalɗe am caali law ɓuri doggoowo, ɗe ɗon ndogga bilaa yi'ugo hayru sam.

²⁶Bana koommbowal[8] kewe ɗe njaawɗoto, bana dutal ngal suuyanto keɓal mum.

²⁷To mi wi'i: “Mi yejjitan bojji am, mi seyo, mi nyobbita yeeso am”,

²⁸nden kam naaworlaaji am kulnatam. Mi anndi, an Allah a laarataa laaɓeeŋga am.

²⁹Min laatoto aybuɗo! Ngam ɗume mi ɗon torro meere?

³⁰To mi yiiwakeno bee saabulu, mi hoo'ino cukkuri ngam laɓɓingo juuɗe,

³¹a nastintam nder loope. Nden kam, koo limce am elnatam.

³²Ngam Allah naa o neɗɗo bana am haa mi jaabo mo, min ndarodo yeeso kiitoowo.

³³Ngam walaa mo narrinta mo bee am, mo wallinta juŋngo dow amin ɗiɗo fuu.

³⁴O acca ɓoccugo yam bee ɓoccol maako, o acca boo hulnugo yam.

³⁵To non kam, mi hulataa wolwugo, ammaa nde mi waawaay irin maajum sam, mi lutti feere am.