Read Fulfulded Jabuura 102 Bible Online

Jabuura 102 - Fulfulded bible

Jabuura 102

¹Tornde toskaaɗo, tampuɗo mo waddi siŋkuye mum yeeso Jawmiraawo!

²Yaa Jawmiraawo, nan do'a am! Nan wookaandu am!

³Taa wiirnam gite ma nder nyalaade ɓillaare am! Heɗitam! To mi torake ma, jaabam law!

⁴Ngam balɗe am ɗon majja bana cuurka, i'e am ɗon ngula bana jamnere yiite.

⁵Ɓernde am naawnaande ɗon ɗayla bana huɗo wa'aako, mi ɗon yejjita koo nyaamugo.

⁶Mi foo'i daliila uumaali am, mi warti i'e e laral tan.

⁷Mi laati bana sonndu nyiddundu nder ladde, bana duujiire nder bille.

⁸Mi heɓataa ɗaanaago, mi laati bana sonndu yeewaandu haa dow suudu.

⁹Nyalɗe fuu konne'en am ɗon kuɗammi, jancooɓe yam ɗon kuuwtinira innde am ngam naalugo woɗɓe.

¹⁰Ndoondi laati nyaamdu am, gonɗi am ɗon ndufa nder njaram am.

¹¹Kanjum ngam daliila ɓernuki ma, ngam a efti yam, a sakkini.

¹²Balɗe am ɗon njinna bana ɗowdi asiri, mi ɗon yoora bana huɗo.

¹³Ammaa an, yaa Jawmiraawo, a laamiiɗo haa foroy. Yimɓe ciftorte diga yidere haa yidere.

¹⁴A ummoto, a hinnoto Siyona, saa'i waɗi haa a woonana berniwol ma, fakat wakkati man yottake.

¹⁵Maccuɓe ma ngiɗi ngol, ɗon njurmina winnde maagol.

¹⁶Ummaatooje fuu kulan innde Jawmiraawo, laamiiɓe lesɗe fuu kulan tedduŋgal maako.

¹⁷To Jawmiraawo nyiɓtake Siyona, to o waŋgi nder tedduŋgal maako,

¹⁸o nanan tornde yimɓe maako jaɓtaaɓe, o heɗititto tornde maɓɓe.

¹⁹Mbinnde ɗum ngam zamanuuru waranndu, ngam haa ummaatoore tageteende maŋgta Jawmiraawo.

²⁰Jawmiraawo ɗon laara duniyaaru diga nokkuure mum seniinde ɓaŋgiinde, diga asama Jawmiraawo ɗon laara lesdi.

²¹ngam nanugo uumaali haɓɓaaɓe, ngam hisnugo mbareteeɓe,

²²ngam haa yimɓe ngeyna innde Jawmiraawo nder Siyona, maŋgta mo nder Urusaliima,

²³saa'i ummaatooje e laamuuji mooɓoto, ngam jagganaago Jawmiraawo.

²⁴Saa'i mi siwaa naywugo, Jawmiraawo tampini semmbe am, rammini balɗe am.

²⁵Ngam maajum mi wi'i: Yaa Allah am, taa a wifto yam nder nderkaaku am, an woni duumiiɗo diga yidere haa yidere.

²⁶A tagi lesdi diga ɓooyma, juuɗe ma tagi asamanji boo.

²⁷Kanji ɗi kalkan, ammaa an, a duumoto. Ɗi fuu ɗi kiiɗan bana limce, a sannjan ɗi bana toggoore, a ittan ɗi.

²⁸Ammaa an a waylataako, a geeto haa foroy.

²⁹Ɓiɓɓe jaggiiɓe ma njooɗoto bee de'ere, danygol maɓɓe boo tabitan yeeso maaɗa.