Read Fulfulded Jabuura 103 Bible Online

Jabuura 103 - Fulfulded bible

Jabuura 103

¹Yimre Daawuda. Sey mi maŋgta Jawmiraawo, mi maŋgta innde maako seniinde bee ɓernde am fuu!

²Sey mi maŋgta Jawmiraawo, taa mi yejjita kuuɗe booɗɗe ɗe o huuwani yam fuu.

³O jaafoowo aybeeji am fuu, o kurgoowo nyawuji am fuu,

⁴o hisnan yoŋki am e halkere, o taarnatam gooŋgaaku e o woonantam,

⁵o haarnatam bee hayru, haa nderkaaku am tabita bana ngu dutal.

⁶Jawmiraawo ɗon huuwa kuuɗe adiliije, o ɗon waɗana toonyaaɓe kiita ngooŋɗuka.

⁷O anndini Muusa laabi maako, yimɓe Isra'iila boo kuuɗe maako mawɗe.

⁸Jawmiraawo woni marɗo enɗam e hinnuye, mo tikkataa law, mo mbooɗeeŋga mum ɗuuɗi.

⁹O tokkataako felugo goɗɗo foroy, ɓernuki maako duumataako.

¹⁰O hiitataako en fodde hakkeeji meeɗen, o warjataako en fodde aybeeji men.

¹¹Bana asama towri dow lesdi, bana non mbooɗeeŋga maako mawniri dow hulɓe mo.

¹²Bana fuunaaŋge daayori hiirnaaŋge, bana non o daaynirta hakkeeji men e tuurtolji men.

¹³Bana baaba enɗirta ɓiyum'en, bana non Jawmiraawo enɗirta hulɓe mo.

¹⁴Ngam o anndi bee ɗume en tagra, o yejjitittaa en mbulwuldi'en.

¹⁵Neɗɗo kam, balɗe mum nanndi bana ɗe huɗo, ɗe nduurataa, o finnan bana pinndi ladde.

¹⁶To henndu wifi dow maari, ndi majjan, walaa mo anndititta haa ndi wonno.

¹⁷Ammaa mbooɗeeŋga Jawmiraawo ɗon dow hulɓe mo haa abada, adilaaku maako duumanto ɓiɓɓe haa taaniraaɓe,

¹⁸haa jogotooɓe alkawal maako, ɓen ngejjitittaa ɗowtanaago sarɗiiji maako.

¹⁹Jawmiraawo tabitini leeso laamu mum nder asamanji, baawɗe laamu maako ɗon dow koo ɗume fuu.

²⁰Maŋgte Jawmiraawo, onon malaa'ika'en maako, Onon semmbiɗɓe, ɗowtaniiɓe wolde maako, heɗitooɓe sawtu maako.

²¹Maŋgte Jawmiraawo, onon honooɓe maako fuu, jagganooɓe mo, huuwooɓe muuyo maako!

²²Maŋgte Jawmiraawo, onon tagle maako fuu, koo toy nder laamu maako! Min boo, sey mi maŋgta Jawmiraawo!