Read Fulfulded Jabuura 105 Bible Online

Jabuura 105 - Fulfulded bible

Jabuura 105

¹Ngette Jawmiraawo, maŋgte innde maako, anndine kuuɗe maako nder ummaatooje.

²Ngime, ngimane mo maŋgtoore, ngeyne kaayeefiiji ɗi o waɗi fuu.

³Ceyore innde maako seniinde, ceye onon ɗowtaniiɓe Jawmiraawo.

⁴Ngaylite heedi Jawmiraawo, tore baawɗe maako, ɗakkotire bee maako koo ndey fuu.

⁵Ciftore kuuɗe maako kayniiɗe e kiitaaji maako,

⁶onon asŋgol Ibrahiima jaggiiɗo maako, onon danygol Yaakubu, cuɓaaɗo maako.

⁷Kaŋko woni Jawmiraawo Allah men, o kiitoowo duniyaaru fuu.

⁸O yejjitittaa alkawal maako haa foroy e ko o umri haa gide ujineere.

⁹Ɗum alkawal maako bee Ibrahiima e hunayeere maako haa Isiyaaku.

¹⁰Jawmiraawo haɓɓi alkawal duumiiŋgal bee Isra'iila, ngal tabitinaama bana umroore ngam Yaakubu.

¹¹O wi'i: “Mi hokkete lesdi Kanaana, ndi laatoto maral ma.”

¹²Saa'i man yimɓe Allah ɗuuɗaayno tawon, ɓe jananɓe nder lesdi.

¹³Kaakiraaɓe mooɗon ngiili diga lesdi haa lesdi, diga laamu haa laamu.

¹⁴Allah accaay koo moy torra ɓe, o feli laamiiɓe ngam daliila maɓɓe.

¹⁵O wi'i: “Taa meeme moytaaɓe am, taa naawne annabi'en am.”

¹⁶Nden Jawmiraawo neldi weelo nder lesdi maɓɓe, majjinani ɓe nyaamdu fuu.

¹⁷Yusufu soorraama, o laati maccuɗo, asee boo Allah neli mo ngam o aarta ɓe haa Misra.

¹⁸Ton ɓe kaɓɓi mo kosɗe bee callalluuji, ɓe kaɓɓi daande maako bee njamndi,

¹⁹haa annabaaku maako gooŋɗi, wolde Jawmiraawo boo gooŋɗini mo.

²⁰Saa'i man laamiiɗo umri ɓe piista mo, laamaniiɗo ummaatooje rimɗini mo,

²¹ardini mo dow saare mum, halfini mo mardi muuɗum fuu.

²²O hokki mo baawɗe ɗowugo saraaki'en maako bana o yiɗi e ekkitingo dawrooɓe maako hikma.

²³Nden Isra'iila wari haa Misra, Yaakubu laati koɗo nder lesdi asŋgol Haamu.

²⁴Allah barkiɗini yimɓe muuɗum haa ɓe ndanyndanytiri masin, o semmbiɗini ɓe dow konne'en maɓɓe.

²⁵O wayli ɓerɗe Misra'en ngam ɓe nganya yimɓe maako, ɓe mbaɗa jaggiiɓe maako rikici.

²⁶Nden o neli jaggiiɗo maako Muusa e Haruna, cuɓaaɗo maako.

²⁷Kamɓe ɓe mbaɗi alaamaaji Allah caka maɓɓe, ɓe mbaɗi kaayeefiiji nder lesdi Misra.

²⁸Allah neldi nyiɓre dow lesdi, ammaa Misra'en kakkilanaay bolle maako.

²⁹O wartiri ndiyam maɓɓe ƴiiƴam, haa liɗɗi maɓɓe mbaati.

³⁰Lesdi maɓɓe heewi paaɓi, ɗi nasti koo cuuɗi laamorde boo.

³¹O umri, buubi e cufi ngari nder lesdi maɓɓe fuu.

³²O neldi ɓe mallimallooje mbattudi iyeende, yiite nyaamooye ukkani lesdi maɓɓe.

³³O wonni inabooje maɓɓe e ibbe maɓɓe, o yewi leɗɗe lesdi maɓɓe.

³⁴O umri, baɓɓatti ngari, ɗi ngalaa limgal.

³⁵Ɗi nyaami haakooji lesdi maɓɓe fuu, ɗi kalki ƴaamle gese maɓɓe.

³⁶O mbari ɓiɓɓe afɓe fuu nder lesdi maɓɓe.

³⁷Nden o wurtini yimɓe Isra'iila, ɓe njahri cardi e kaŋŋeeri, walaa perguɗo koo gooto nder le'i maɓɓe.

³⁸Misra'en ceyori gurtaaki maɓɓe, ngam ɓe kuli Isra'iila'en.

³⁹O faddi ɓe bee ruulde, yiite yaynani ɓe jemma.

⁴⁰Ɓe ƴami mo kusel, o waddani ɓe gerle, o haarni ɓe bee tamseere iwnde diga asama.

⁴¹O seeki tapaare, ndiyam ɓuli, ili nder ladde yoornde bana maayo.

⁴²Ngam o siftori wolde maako seniinde nde o wolwani jaggiiɗo maako Ibrahiima.

⁴³Non o wurtiniri yimɓe maako bee seyo, suɓaaɓe maako ngimi bee welwelo.

⁴⁴O marni ɓe lesɗe ummaatooje goɗɗe, ɓe nyaami nafuuda torra jama'aaje,

⁴⁵ngam haa ɓe njogo farillaaji maako, ɓe ɗowtano umrooje maako. Halleluya!