Read Fulfulded Jabuura 109 Bible Online

Jabuura 109 - Fulfulded bible

Jabuura 109

¹Ngam kaliifaajo gime. Yimre Daawuda. Yaa Allah mo maŋgtanmi, taa jeeɗa!

²Ngam halluɓe e fewooɓe ɗon mbolwa kalluka dow am, ɓe ɗon mbaɗammi tufle.

³Ɓe ɗon kallinammi, ɓe ɗon nganyammi ɓe ɗon konammi meere.

⁴Koo nde mi yiɗi ɓe, ɓe ɗon mbolwa kalluka dow am. Ammaa min kam, sey do'aare tan mbaɗanmi.

⁵Ɓe ɗon mbarjo mbooɗeeŋga am bee halleende, ɓe ɗon mbarjo yiide am boo bee nganyaandi.

⁶Ummin goɗɗo kalluɗo ngam hiitaago konneejo am! Ceettoowo mo wullo mo!

⁷Kiitoowo linya haala maako, do'a mo kiita! Koo tornde maako boo laatano mo daliila aybe!

⁸Ustu balɗe maako! Goɗɗo feere hoosa babal maako.

⁹Ɓikkoy maako laato atiime'en! Debbo maako laato jurumɗo!

¹⁰Ɓikkoy maako laato rookooɓe yiilotooɓe, ɓe ndookoya daayiiɗum bee winnde saare maɓɓe!

¹¹Tokkiiɓe mo nyamaale kooca jawdi maako fuu, jananɓe njaɓta nafuuda kuugal maako!

¹²Taa goɗɗo koo gooto tokko woonango mo, taa goɗɗo enɗa atiime'en maako!

¹³Danygol maako fuu halka, ngam haa yidere warannde yejjita innde maako.

¹⁴Yaa Jawmiraawo, siftor aybeeji kaakiraaɓe maako, taa yaafa hakke daada maako!

¹⁵Taa yejjitit hakkeeji maɓɓe sam, yaa Jawmiraawo, ammaa nattin ciftorki inɗe maɓɓe haa duniyaaru.

¹⁶Ngam konneejo am oo numaay woonango goɗɗo sam, o toonyi laafuɓe e ɓilliiɓe e tampa-ɓerɗe'en haa o mbari ɓe.

¹⁷O yiɗno naalugo woɗɓe— naaloore loro dow maako. O seyaaki barkiɗingo woɗɓe— barka daayo mo.

¹⁸O woowi naalugo bana o woowri ɓornaago, naalooje maako nasta reedu maako bana ndiyam, ɗe nasta i'e maako bana nebbam.

¹⁹Ɗe cudda mo bana limce maako, ɗe taaro mo tum bana taadorgol maako!

²⁰Nii non Jawmiraawo warjorto wullotooɓe yam, hallinanɓe yam.

²¹Ammaa, yaa Jawmiraawo Allah am, yiidam daliila innde ma, mbooɗeeŋga ma seynatam. Hisnam!

²²Mi laafuɗo, mi ɓilliiɗo, ɓernde am ɗon naawa masin.

²³Mi ɗon jinna bana ɗowdi asiri, yimɓe ɗon ndiiwammi bana goɗɗo riiwrata baɓɓatti.

²⁴Mi suumi haa koppi am tampi, ɓanndu am timmi, mi foo'i.

²⁵To yimɓe ngi'i yam, ɓe njancatam, ɓe ndimmban ko'e.

²⁶Wallam, yaa Jawmiraawo Allah am! Hisnam fodde mbooɗeeŋga ma!

²⁷Haa ɓe paama yaa Jawmiraawo, an waɗi ɗum.

²⁸Kamɓe ɓe ɗon naalammi, an a ɗon barkiɗinammi. Ɓe ummi ngam honugo yam, ammaa ɓe toskoto. Min maccuɗo ma kam, mi seyoto!

²⁹Wullotooɓe yam mbusta, toskaare sudda ɓe bana alkibbaare.

³⁰Min mi yettan Jawmiraawo bee sawtu, mi maŋgtan mo nder mooɓre ɗuuɗnde!

³¹Ngam o ɗon dari haa nyaamo ɓilliiɗo, ngam hisnugo mo diga yiɗɓe do'ugo mo kiita.