Read Fulfulded Jabuura 119 Bible Online

Jabuura 119 - Fulfulded bible

Jabuura 119

¹Barka laatanto yimɓe ɓe ngalaa feloore, tokkotooɓe tawreeta Jawmiraawo.

²Barka laatanto hakkilanooɓe seedamkuuji maako, ɗowtaniiɓe mo bee ɓernde woore.

³Ɓe mbaɗataa halleende, ammaa ɓe tokkoto laabi maako.

⁴An a waɗi sarɗiiji, haa min ɗowtano ɗi bee tiinaare.

⁵Mi yiɗi mi laato tabitɗo haa mi ɗowtano farillaaji ma.

⁶Nden to mi ɗowtani umrooje ma fuu, mi toskataako.

⁷Mi ɗon ekkito kiitaaji ma adiliiji, ngam maajum mi yettete bee ɓernde gooŋɗunde.

⁸Mi ɗowtanto farillaaji ma, taa accam sam.

⁹Noy derkeejo senrata laabi mum? Bee jogaago wolde ma.

¹⁰Mi yiɗi ɗakkotirgo bee ma bee ɓernde woore, taa accu mi sela laawol umrooje ma.

¹¹Mi ɗon jogi wolde ma nder ɓernde am, ngam taa mi waɗa hakke dow maaɗa.

¹²Maŋgtoore laatano ma, yaa Jawmiraawo, ekkitinam farillaaji ma.

¹³Bee hunnduko am limtanmi kiitaaji ɗi umruɗa fuu.

¹⁴Mi ɗon seyoro hakkilango seedamkuuji ma, ko ɓuri seyoraago riskuuji koo ɗiye fuu.

¹⁵Mi numtan sarɗiiji ma, mi hakkilanan laabi ma.

¹⁶Mi ɗon seyoro farillaaji ma, mi yejjitittaa wolde ma.

¹⁷Woonan maccuɗo ma, haa mi yeeɗa, mi jogo wolde ma.

¹⁸Maɓɓitu gite am, haa mi yi'a kaayeefiiji nder tawreeta ma.

¹⁹Mi koɗo duniyaaru, taa suuɗam umrooje ma.

²⁰Ngenka anndugo kiitaaji ma ɗon wula ɓernde am tum.

²¹A feli mawnitiiɓe, naaloore ɗon dow selɓe laawol umrooje ma.

²²Ittanam kuudi maɓɓe e jancoore maɓɓe dow am, ngam mi ɗon jogi seedamkuuji ma.

²³Koo to mawɓe ɗon njooɗo kaɓɓa dabareeji dow am, min maccuɗo ma mi numtan farillaaji ma.

²⁴Seedamkuuji ma laatake welwelo am, kanji carwoto yam.

²⁵Mi ɗon waali nder mbulwuldi, mi ɗon daande maayde, yeeɗitinam fodde wolde ma.

²⁶Mi limtani ma ko mbaɗmi fuu, a jaabi yam boo. Ekkitinam farillaaji ma.

²⁷Faamtinam sarɗiiji ma, haa mi numta kaayeefiiji ma.

²⁸Ɓernde am ɗon sakli masin, semmbiɗinam fodde wolde ma.

²⁹Aynam, taa mi tokko laawol fewre, mo'anam fodde tawreeta ma.

³⁰Mi suɓi laawol gooŋga, mi ɗon ɗowtano kiitaaji ma.

³¹Mi jogoto seedamkuuji ma booɗɗum, yaa Jawmiraawo, taa accu yimɓe cemtinammi.

³²Mi ɗon yaawa ɗowtanaago umrooje ma bee tiinaare, ngam a hokki ɓernde am feecaare.

³³Ekkitinam tokkaago farillaaji ma, Jawmiraawo, mi ɗowtanto ɗi haa foroy.

³⁴Hokkam faamu haa mi ɗowtano tawreeta ma, mi tokko ka bee ɓernde woore.

³⁵Ɗowam dow laawol umrooje ma, ngam mi ɗon seyoro ɗe.

³⁶Huusitin ɓernde am dow umrooje ma, naa dow riba kalluka.

³⁷Aynu gite am, taa mi laara kuuje meereeje, Yeeɗitinam nder laawol ma.

³⁸Hebbinan maccuɗo ma iinawol ngol a iinani hulɓe ma.

³⁹Ittanam toskaare nde kulanmi, ngam kiitaaji ma mbooɗi.

⁴⁰Mi yiɗi ɗowtanaago sarɗiiji ma masin, yeeɗitinam fodde adilaaku ma.

⁴¹Accu mbooɗeeŋga ma waranammi, yaa Jawmiraawo, non boo kisndam ma fodde wolde ma,

⁴²haa mi jaabo huɗanɓe yam, ngam mi ɗon hoolo wolde ma.

⁴³Wallam wolwugo gooŋga foroy, ngam mi ɗon tammoro kiitaaji ma.

⁴⁴Mi ɗowtanto tawreeta ma koo ndey, haa abada abadin.

⁴⁵Mi heɓan feecaare, ngam mi ɗowtanake sarɗiiji ma.

⁴⁶Mi wolwanan laamiiɓe seedamkuuji ma, mi semtataa.

⁴⁷Mi ɗon seyoro umrooje ma, ngam mi yiɗi ɗe.

⁴⁸Mi yiɗi umrooje ma, mi ɗon teddina ɗe, mi numtan farillaaji ma.

⁴⁹Siftor wolde nde mbi'ɗa maccuɗo ma, bee maare a hokki yam tammunde.

⁵⁰Mi de'iti koo nder ɓillaare am boo, ngam wolde ma ayni yoŋki am.

⁵¹Mawnitiiɓe njanci yam masin, ammaa mi selataa laawol tawreeta ma.

⁵²Mi ɗon siftora kiitaaji ma ɓooymaaji, ɗi nde'itini yam, yaa Jawmiraawo.

⁵³Mi heewi tikkere saatunde ngam daliila halluɓe, wudinɓe tawreeta ma.

⁵⁴Saa'i mi koɗo nder duniyaaru, farillaaji ma laati daliila gime am.

⁵⁵Jemma fuu mi ɗon siftora innde ma, yaa Jawmiraawo, haa mi tokko tawreeta ma.

⁵⁶Mi ɗon ɗowtano sarɗiiji ma, kanjum woni seyo am.

⁵⁷An woni geɗal am, yaa Jawmiraawo, mi wi'i mi jogoto bolle ma.

⁵⁸Mi yeli fottango ma bee ɓernde woore, hinnam fodde wolde ma.

⁵⁹Mi linyi yahdu am, mi lortanake seedamkuuji ma.

⁶⁰Mi neeɓataa, mi ɗon yaawɗo haa mi ɗowtano umrooje ma.

⁶¹Kaɓɓorli halluɓe ɗon taari yam, ammaa mi yejjitaay tawreeta ma.

⁶²Mi finan caka jemma, haa mi yette ngam kiitaaji ma adiliiji.

⁶³Mi soobri bee hulɓe ma e ɗowtaniiɓe sarɗiiji ma fuu.

⁶⁴Duniyaaru heewi mbooɗeeŋga ma, yaa Jawmiraawo, ekkitinam farillaaji ma.

⁶⁵A waɗi ko mbi'ɗa, yaa Jawmiraawo, a woonani maccuɗo ma.

⁶⁶Hokkam hakkiilo e faamu, ngam mi ɗon hoolo umrooje ma.

⁶⁷Diga mi torraakino tawon, mi ɗonno woofa, ammaa jonta mi ɗon jogo wolde ma.

⁶⁸A booɗɗo, a boonanoowo yimɓe, ekkitinam farillaaji ma.

⁶⁹Mawnitiiɓe ɗon mbaɗa tufle dow am, ɗon toskammi, ammaa min mi ɗon ɗowtano sarɗiiji ma bee ɓernde woore.

⁷⁰Kamɓe ɓe caata ko'e'en, ammaa min mi ɗon seyoro tawreeta ma.

⁷¹Torra am nafi yam, ngam ka ekkitini yam farillaaji ma.

⁷²Tawreeta ma ɓurani yam ceede cardi e kaŋŋeeri ujineeje saman.

⁷³Juuɗe ma tagi yam, ɗon njogo yam, hokkam faamu haa mi ekkito umrooje ma.

⁷⁴To hulɓe ma ngi'i yam, ɓe ceyoto, ngam mi ɗon tammoro wolde ma.

⁷⁵Jawmiraawo, mi anndi kiitaaji ma adiliiji, a yarni yam bone fodde gooŋgaaku ma.

⁷⁶Accu mbooɗeeŋga ma de'itinammi, fodde wolde nde mbi'ɗa maccuɗo ma.

⁷⁷Enɗam haa mi yeeɗa, ngam mi ɗon seyoro tawreeta ma.

⁷⁸Sey mawnitiiɓe tosko, ngam ɓe ɗon mbaɗammi tufle meere. Ammaa min mi ɗon numta sarɗiiji ma.

⁷⁹Hulɓe ma ngara haa am, non boo annduɓe seedamkuuji ma fuu.

⁸⁰Sey mi ɗowtano farillaaji ma bee ɓernde laaɓnde, ngam taa mi tosko.

⁸¹Mi ɗon yenwa kisndam ma haa mi tampi, mi ɗon tammoro wolde ma.

⁸²Mi ɗon reena gooŋɗineeki koŋngol ma haa mi somi. Mi ɗon ƴama: “Ndey nde'itinta mi?”

⁸³Mi laati bana kanyakanyaawu[53] kiiɗŋgu, ammaa mi yejjitaay farillaaji ma.

⁸⁴Balɗe noy luttani maccuɗo ma? Ndey kiitotoɗa toonyooɓe yam?

⁸⁵Mawnitiiɓe ngasani yam gasɗe, ɗum luuti tawreeta ma.

⁸⁶Umrooje ma fuu koolniiɗe. Ɓe ɗon taasnammi bilaa daliila. Wallam!

⁸⁷Lutti seɗɗa ɓe nattinanno yam diga lesdi, ammaa min mi accaay sarɗiiji ma.

⁸⁸Yeeɗitinam bee mbooɗeeŋga ma, haa mi tokko seedamku hunnduko ma.

⁸⁹Yaa Jawmiraawo, haa foroy wolde ma ɗon tabiti haa asama.

⁹⁰Gooŋgaaku ma ɗon tabiti diga yidere haa yidere. An a jo'ini lesdi, ndi ɗon tabiti.

⁹¹Kuuje fuu ɗon ndari haa wargo hannde ngam kiitaaji ma, ɗe fuu ɗe ɗon njaggano ma.

⁹²To tawreeta ma laataakino seyo am, mi halkanno nder ɓillaare am.

⁹³Mi yejjitittaa sarɗiiji ma sam, ngam bee maaji a yeeɗitini yam.

⁹⁴An mari yam, hisnam! Ngam mi ɗowtanake kiitaaji ma.

⁹⁵Halluɓe ɗon ndeena, ngiɗi halkugo yam, ammaa min mi ɗon hakkilana seedamkuuji ma.

⁹⁶Mi yi'i kuuje timmididɗe fuu timman, ammaa umrooje ma, ɗe ngalaa keerol.

⁹⁷Mi yiɗi tawreeta ma masin, mi ɗon nyalla numtugo ka.

⁹⁸Umrooje ma ɗon ngondi bee am foroy, ɗe ndokkatam hikma ko ɓuri konne'en am.

⁹⁹Mi heɓi hakkiilo ko ɓuri ekkitinooɓe yam fuu, ngam mi ɗon numta seedamkuuji ma.

¹⁰⁰Mi ɓurdi ndotti'en hakkiilo, ngam mi ɗon ɗowtano sarɗiiji ma.

¹⁰¹Mi naŋgti kosɗe am, taa mi tokko laawol kalluŋgol, ngam haa mi jogo wolde ma.

¹⁰²Mi selaay laawol kiitaaji ma, ngam an ekkitini yam.

¹⁰³Bolle ma mbelani yam masin! Ɗe ɓuri koo njumri welugo.

¹⁰⁴Bee sarɗiiji ma keɓranmi hakkiilo, ngam maajum mi ɗon wanya laawol fewre fuu.

¹⁰⁵Wolde ma woni pittirla ngam palanɗe am, kayre woni jayŋgol dow laawol am.

¹⁰⁶Mi hunake, mi hebbinan hunayeere am boo, mi ɗowtanto kiitaaji ma adiliiji.

¹⁰⁷Fakat mi torriiɗo masin, yaa Jawmiraawo, yeeɗitinam fodde wolde ma.

¹⁰⁸Yerda gettooje ɗe mi lii'ani ma, yaa Jawmiraawo, ekkitinam kiitaaji ma.

¹⁰⁹Mi ɗon haa daande maayde foroy, ammaa mi yejjitaay tawreeta ma.

¹¹⁰Halluɓe ɗon mbaɗammi tuuforgol, ammaa mi selataa laawol sarɗiiji ma.

¹¹¹Seedamkuuji ma laati ndesaari am haa foroy, ɗi laati daliila welwelo ɓernde am.

¹¹²Mi huucitini ɓernde am dow farillaaji ma haa foroy, haa timmoode balɗe am.

¹¹³Mi ɗon wanya marɓe ɓerɗe ɗiɗi, ammaa mi yiɗi tawreeta ma.

¹¹⁴An woni nyukkorde am e wawarde[54] am, mi ɗon tammoro wolde ma.

¹¹⁵Ndaayeeɗam, onon halluɓe! Min kam mi ɗowtanto umrooje Allah am.

¹¹⁶Semmbiɗinam bana mbi'ɗaami, haa mi yeeɗa, taa accu tammunde am laato meere.

¹¹⁷Tiigam haa mi hisa, nden kam mi hakkilanan farillaaji ma foroy.

¹¹⁸A wudinan luutanɓe farillaaji ma fuu, ngam dabareeji maɓɓe laatoto meere.

¹¹⁹A rufi halluɓe duniyaaru fuu bana mbuuwri, ngam maajum ngiɗmi seedamkuuji ma.

¹²⁰Ɓanndu am fuu surwi ngam kultoreeŋgol ma, mi ɗon hultori daliila kiitaaji ma.

¹²¹Mi waɗi gooŋgaaku e adilaaku, taa hokkam haa juuɗe konne'en am.

¹²²Tabitin hayru maccuɗo ma, ngam taa mawnitiiɓe toonyo yam.

¹²³Mi ɗon reena kisndam ma e gooŋɗineeki iinawol ma adiliiwol haa mi somi.

¹²⁴Waɗan maccuɗo ma fodde mbooɗeeŋga ma, ekkitinam kiitaaji ma.

¹²⁵Mi maccuɗo ma, hokkam hakkiilo, haa mi faama seedamkuuji ma.

¹²⁶Yaa Jawmiraawo, saa'i waɗi a hiito! Ngam yimɓe luuti tawreeta ma.

¹²⁷Ngam maajum mi ɗon samɗina umrooje ma ko ɓuri kaŋŋeeri, koo kaŋŋeeri ɓurndi laaɓugo boo.

¹²⁸Ngam maajum, mi annditi sarɗiiji ma fuu ɗi darnuɗi, ammaa mi ɗon wanya laawol fewre koo ngole.

¹²⁹Seedamkuuji ma ɗi kaayeefiiji, ngam maajum ɓernde am ɗon hakkilana ɗi.

¹³⁰Baŋginaaɗo bolle ma heɓan jayŋgol, ɗe ndokkan humakiijo hakkiilo.

¹³¹Mi ɗon laaha, hunnduko am maɓɓiti jaasɗum, ngam mi ɗon yenwa umrooje ma.

¹³²Waylita heedi am, mo'anam bana a woowri waɗango yiɗɓe innde ma.

¹³³Semmbiɗin palanɗe am bana mbi'ɗaami, taa accu halleende laamano yam.

¹³⁴Hisnam e toonyooɓe yam, ngam haa mi ɗowtano sarɗiiji ma.

¹³⁵Laar jaggiiɗo ma bee yerduye, ekkitinam farillaaji ma.

¹³⁶Gite am ɗon ilna gonɗi bana maayel, ngam yimɓe ɗon luuta tawreeta ma.

¹³⁷Yaa Jawmiraawo, a adiliijo, kiitaaji ma ɗi darnuɗi.

¹³⁸A tabitini seedamkuuji ma bee adilaaku e hoolaare timmunde.

¹³⁹Ɓernuki am saati, ɗon wula nder am bana yiite, ngam konne'en am ngejjiti bolle ma.

¹⁴⁰Wolde ma laaɓi tal bana njamndi laɓɓinaandi, min maccuɗo ma mi yiɗi nde.

¹⁴¹Mi leesɗo, jawaaɗo, ammaa mi yejjitaay sarɗiiji ma.

¹⁴²Adilaaku ma woni adilaaku duumiiŋgu, tawreeta ma woni gooŋga.

¹⁴³Mi keewɗo torra e saklere, ammaa umrooje ma ɗon ceynammi.

¹⁴⁴Seedamkuuji ma ɗi adiliiji haa foroy, hokkam faamu haa mi yeeɗa.

¹⁴⁵Bee ɓernde am fuu mi ɗon toro ma. Jaabam, yaa Jawmiraawo, min boo mi ɗowtanto farillaaji ma.

¹⁴⁶Mi ɗon toro ma, hisnam! Nden kam mi hakkilanan seedamkuuji ma.

¹⁴⁷Diga weetaay mi ɗon toro ballal ma, mi ɗon tammoro wolde ma.

¹⁴⁸Mi finan diga weetaay, ngam haa mi numta wolde ma.

¹⁴⁹Yaa Jawmiraawo, nanam fodde mbooɗeeŋga ma, yeeɗitinam fodde kiitaaji ma.

¹⁵⁰Waɗooɓe halleende ɗon ɓadito, ɓe ndaayi tawreeta ma.

¹⁵¹Ammaa an a ɓadiiɗo, yaa Jawmiraawo, umrooje ma fuu ɗe gooŋɗuɗe.

¹⁵²A tabitini seedamkuuji ma haa foroy. Kanji paamtini yam ɗum diga ɓooyma.

¹⁵³Laar ɓillaare am, hisnam, ngam mi yejjitaay tawreeta ma.

¹⁵⁴Jiŋngam, rimɗinam, yeeɗitinam bana mbi'ɗaami.

¹⁵⁵Halluɓe keɓataa kisndam sam, ngam ɓe kakkilantaa kiitaaji ma.

¹⁵⁶Ammaa enɗam ma ɗuuɗi, yaa Jawmiraawo, ngam maajum yeeɗitinam bee kiitaaji ma.

¹⁵⁷Taasnooɓe yam, konne'en am ɓe ɗuuɗɓe, ammaa mi selataa laawol seedamkuuji ma.

¹⁵⁸To mi yi'i tuurtuɓe dow ma, ɓernde am ɗon metta, ngam ɓe ɗowtantaako wolde ma.

¹⁵⁹Laar no mi yiɗiri sarɗiiji ma, yaa Jawmiraawo, yeeɗitinam fodde mbooɗeeŋga ma.

¹⁶⁰Dubbeere wolde ma ɗum gooŋga, kiitaaji ma adiliiji fuu nduumoto.

¹⁶¹Mawɓe ɗon taasnammi bilaa daliila, ammaa ɓernde am hulataa koo ɗume, sey wolde ma.

¹⁶²Mi ɗon seyoro wolde ma bana keɓɗo jawdi ɗuuɗndi.

¹⁶³Mi ɗon wanya fewre, nde laatani yam nyiddunde. Ammaa mi yiɗi tawreeta ma.

¹⁶⁴Nyalaade fuu, nde joweeɗiɗi maŋgtanmaami ngam daliila kiitaaji ma adiliiji.

¹⁶⁵Salaaman makka woodani yiɗɓe tawreeta ma, walaa ko fergata ɓe.

¹⁶⁶Mi ɗon tammoro kisndam ma, yaa Jawmiraawo, mi ɗon ɗowtano umrooje ma.

¹⁶⁷Mi ɗon hakkilana seedamkuuji ma, mi yiɗi ɗi masin.

¹⁶⁸Mi ɗon ɗowtano sarɗiiji ma e seedamkuuji ma, an a anndi laabi am fuu.

¹⁶⁹Accu wookaandu am yotto ma, yaa Jawmiraawo, hokkam faamu bana mbi'ɗaami.

¹⁷⁰Accu tornde am yotto ma, hisnam bana mbi'ɗaami.

¹⁷¹Sey hunnduko am ɓula maŋgtoore ma, ngam a ɗon ekkitinammi farillaaji ma.

¹⁷²Sey ɗemŋgal am yimnda wolde ma, ngam umrooje ma fuu ɗe adiliije.

¹⁷³Juŋngo ma taaskano wallugo yam, ngam mi waɗi anniya ɗowtanaago sarɗiiji ma.

¹⁷⁴Mi ɗon yenwa kisndam ma, yaa Jawmiraawo, tawreeta ma ɗon seynammi.

¹⁷⁵Accu mi yeeɗa ngam maŋgtugo ma, kiitaaji ma mballammi.

¹⁷⁶Mi ɗon yiilo bana mbaalu majjuŋgu. Ɗaɓɓitit maccuɗo ma, ngam mi yejjitaay umrooje ma.