Read Fulfulded Jabuura 132 Bible Online

Jabuura 132 - Fulfulded bible

Jabuura 132

¹Yimre jahaaŋgal haa Urusaliima. Yaa Jawmiraawo, siftor Daawuda e boneeji muuɗum fuu.

²Siftor ko o hunani Jawmiraawo, ko o togani Allah Yaakubu Baawɗo.

³O wi'i: “Mi nastataa suudu laymaaru am, mi waalataako dow be'itte,

⁴mi siwtataako, mi ɗaanataako,

⁵haa to mi heɓani Jawmiraawo nokkuure, haa to mi heɓani Allah Yaakubu, Baawɗo, jooɗorde.”

⁶En nani haala sundukru alkawal haa Efrata, en keɓti ndu nder gese Ya'ar.

⁷En mbi'i: “Njemmen haa Jawmiraawo jooɗoto, en cujida yeeso jaaɓruɗum kosɗe maako.”

⁸Umma, yaa Jawmiraawo, war haa nokkuure siwtorde ma, an bee sundukru ma marndu baawɗe ma!

⁹Adilaaku taaro liman'en maaɗa bana mojaare, hoolaaɓe ma ngima bee seyo.

¹⁰Ngam daliila jaggiiɗo ma Daawuda taa wudin laamiiɗo mo moytuɗa.

¹¹Jawmiraawo hunani Daawuda hunayeere, o fiistataa nde sam. O wi'i: “Mi jo'inan goɗɗo danygol ma dow leeso laamu ma.

¹²To ɓiɓɓe ma njogake alkawal am, to ɓe ɗowtanake seedamkuuji ɗi mi ekkitini ɓe, nden kam ɓiɓɓe maɓɓe boo njooɗoto dow leeso laamu ma haa foroy.”

¹³Jawmiraawo suɓi hooseere Siyona, o yiɗi nde laato jooɗorde maako.

¹⁴O wi'i: “Haa ɗo njooɗotoomi foroy, haa nokkuure nde'e ngiɗmi jooɗaago.

¹⁵Mi hokkan nde nyaamdu ɗuuɗndu, mi haarnan laafuɓe maare.

¹⁶Mi taarnan liman'en maare bee kisndam bana mojaare, hoolaaɓe maare ngiman bee seyo maŋngo.

¹⁷Haa ɗo umminanmi goɗɗo baawɗo nder danygol Daawuda, mi tabitinan laamu danygol moytaaɗo am.

¹⁸Mi suddan konne'en maako bee mbustu, ammaa kaŋko, laamu maako maran tedduŋgal.”