Read Fulfulded Jabuura 144 Bible Online

Jabuura 144 - Fulfulded bible

Jabuura 144

¹Yimre Daawuda. Yettoore laatano Jawmiraawo mo woni tapaare hisrude am! Kaŋko ekkitini juuɗe am haɓre, o taaskitini yam ngam konu.

²Kaŋko woni giɗɗo yam e suudu am semmbiɗndu, hisrude am townde e kisnoowo yam e wawarde[57] am, haa maako nyukkiimi, o ɗowtinani yam ummaatoore am.

³Yaa Jawmiraawo, neɗɗo o moy haa kakkilana mo? Moy woni ɓii-Aadama haa numta mo?

⁴Neɗɗo nanndi bee foofannde woore, balɗe maako ɗon njinna bana ɗowdi asiri.

⁵Yaa Jawmiraawo, wuur asama, jippa! Meem kooseeje haa ɗe ngurtina cuurka!

⁶Sakkin ma'e, saŋkitit konne'en ma! fiɗ kuri ma, hulnu ɓe!

⁷An jooɗiiɗo haa dow, fortu juŋngo ma! Wurtinam ndiyamji cemmbiɗɗi, hisnam juuɗe jananɓe!

⁸Kamɓe ɓe ɗon pewa foroy, koo to ɓe kunake boo, ɗum fewre.

⁹Yaa Allah, mi yimante yimre hesre! Mi yimante bee hoodu marndu ɓoggi sappo.

¹⁰An hokkata laamiiɓe jaalorgal, an hisnata maccuɗo ma Daawuda boo yeeso kaafahi konne'en saatuɓe.

¹¹Hisnam! Wurtinam juuɗe jananɓe! Kamɓe ɓe ɗon pewa foroy, koo to ɓe kunake boo, ɗum fewre.

¹²Nden kam, derke'en amin worɓe, laatoto bana fuɗŋgooji mawnuɗi booɗɗum. Ɓiɓɓe amin rewɓe boo laatoto bana daŋraŋge cehaaɗe laatiiɗe fawne ngam suudu laamiiɗo.

¹³Beembe amin keewan nyaamle feere feereeje, dammooji amin ɗuuɗan cowi ujineeje ɗuuɗɗe haa durduɗe amin.

¹⁴Na'i amin ndiman, konne'en amin ukkantaako min, ndahataa min. Gookaali boo laatataako haa luuɓe amin.

¹⁵Barka laatanto ummaatoore nde wa'i bana nii! Barka laatanto ummaatoore nde Jawmiraawo woni Allah maare!