Read Fulfulded Jabuura 147 Bible Online

Jabuura 147 - Fulfulded bible

Jabuura 147

¹Halleluya! Yimango Allah men maŋgtoore, ɗum booɗɗum. Maŋgtugo mo, ɗum belɗum.

²Jawmiraawo o nyiɓtoowo Urusaliima, o ɗon mooɓta Isra'iila'en dahaaɓe.

³O hurgan ta'a-ɓerɗe'en, o haɓɓan kuuduuje maɓɓe.

⁴O ɗon lima koode, o ɗon ewno ɗi innde innde.

⁵Jawmiraawo men o mawɗo, o baawɗo masin, anndal maako walaa keerol.

⁶O ummitinan toskaaɓe, ammaa o leesnan halluɓe nder mbulwuldi.

⁷Ngimane Jawmiraawo yettoore, ngimane Allah men bee moolooji.

⁸O ɗon sudda asama bee duule, o ɗon hokka lesdi iyeele, o ɗon fuɗna huɗo dow kooseeje.

⁹O ɗon nyaamna dabbaaji, o ɗon hokka leekuhoy nyaamdu to koy ciiki.

¹⁰O seyortaako semmbe pucci, pargal honooɓe semmbiɗɓe fottantaa mo.

¹¹Ammaa o ɗon seyoro hulɓe mo, hoolotooɓe mbooɗeeŋga maako.

¹²An Urusaliima, maŋgtu Jawmiraawo! An Siyona, maŋgtu Allah maaɗa!

¹³Ngam o semmbiɗini jamɗe palduɗe dammuɗe ma, o barkiɗini jooɗiiɓe nder maaɗa.

¹⁴O tabitini salaaman dow lesdi ma, o ɗon haarne bee alkamaari ɓurndi wooɗugo.

¹⁵O neldan umroore maako haa duniyaaru, law nde yottoto ndu.

¹⁶O saatinan peewol, ngol ranwan, ngol toɓan bana mallimallooje, o suddan lesdi bee peewol bana saawawre, ngol saŋkitan bana ndoondi.

¹⁷O sakkinan mallimallooje bana kaa'e, walaa mo dartoto peewol ngol o waɗi.

¹⁸To o umri, ndiyamji ɗi peewol saatini ɓolwan. To o neldi henndu, ɗi ilan fahin.

¹⁹O anndini danygol Yaakubu wolde maako, o hokki yimɓe Isra'iila farillaaji e kiitaaji maako.

²⁰Irin maajum o waɗanaay ummaatooje goɗɗe, kanje ɗe anndaa kiitaaji maako. Halleluya!