Read Fulfulded Jabuura 37 Bible Online

Jabuura 37 - Fulfulded bible

Jabuura 37

¹Yimre Daawuda. Taa tikkan halluɓe, taa haaju waɗooɓe zunuuba.

²Ngam fakat ɓe njooran law bana huɗo, ɓe ɗaylan bana haakooji kecci.

³Hoola Jawmiraawo, waɗ mbooɗeeŋga, jooɗa nder lesdi, yeeɗu nder de'ere.

⁴Seyora Jawmiraawo, kaŋko o hokkete ko ɓernde ma yiɗi.

⁵Halfin nufayeeje ma haa Jawmiraawo, hoola mo, kaŋko o waɗan ɗum.

⁶O waŋginan adilaaku ma bana annoora, gooŋgaaku ma boo bana naaŋge caka nyalawma.

⁷De'u yeeso Jawmiraawo, hoola mo. Taa tikkan keɓɗo hayru nder nufayeeje mum malla timminɗo dabareeji mum kalluɗi.

⁸Accu tikkere, ɗalu ɓernuki, taa tikku, ɗum nafataa ma.

⁹Ngam halluɓe kalkan, ammaa hooliiɓe Jawmiraawo maran lesdi.

¹⁰Lutti seɗɗa, kalluɗo majjan. To a ɗaɓɓiti mo haa nokkuure maako, a tawataa mo ton.

¹¹Ammaa yaŋkiniiɓe ndonan lesdi, ɓe ceyorto de'ere timmunde.

¹²Kalluɗo ɗon haɓɓa dabareeji dow gooŋgaajo, o ɗon hirƴindira nyii'e dow maako.

¹³Ammaa Jawmiraawo ɗon jala mo, ngam o anndi nyalaade kiita maako ɓaditake.

¹⁴Halluɓe losi kaafahi, tiri lagaaje ngam do'ugo laafuɓe e ɓilliiɓe, ngam mbarugo tokkiiɓe laawol darnuŋgol.

¹⁵Ammaa kaafaaje maɓɓe njuwan ɓerɗe maɓɓe, lagaaje maɓɓe ngewan.

¹⁶Pamarum ko gooŋgaajo mari ɓuri risku halluɓe ɗuuɗɓe saman.

¹⁷Ngam Jawmiraawo ittan baawɗe maɓɓe, ammaa o wallitan adili'en.

¹⁸Jawmiraawo ɗon hakkilana ngeendam timmuɓe, maral maɓɓe tabiti haa foroy.

¹⁹Wakkati sarru ɓe toskataako, nyalɗe weelo boo ɓe kaaran.

²⁰Ammaa halluɓe kalkan, konne'en Jawmiraawo ɗaylan bana pinndi ladde, ɓe majjan, fakat ɓe majjan bana cuurɗe.

²¹Kalluɗo hoo'an nyamaande, nyaaman nde. Ammaa adiliijo saahoto, woonanan yimɓe.

²²Ngam barkiɗinaaɓe Jawmiraawo maran lesdi, ammaa naalaaɓe maako kalkan.

²³To laawol neɗɗo fottani Jawmiraawo, nden kam o tabitinan palanɗe maako.

²⁴Koo to o fergake, o do'ataako, ngam Jawmiraawo ɗon jogi juŋngo maako.

²⁵Diga mi derke haa mi naywi mi meeɗaay yi'ugo adiliijo mo Allah wudini malla mo ɓikkoy mum ndooki nyaamdu.

²⁶Koo ndey fuu o mo'anan yimɓe, o hokkan nyamaale, ɓikkoy maako keɓan barka.

²⁷Daaya halleende, waɗ mbooɗeeŋga, nden kam a jooɗoto nder lesdi ma haa foroy.

²⁸Ngam Jawmiraawo yiɗi ko fotti, o wudintaa hoolaaɓe maako, o ɗon ayna ɓe foroy. Ammaa o wilan danygol halluɓe.

²⁹Adili'en maran lesdi, ɓe njooɗoto nder maari haa foroy.

³⁰Hunnduko adiliijo wolwan bolle hikma, ɗemŋgal maako wolwan bolle darnuɗe.

³¹O ɗon jogi tawreeta Allah nder ɓernde maako, palanɗe maako ndimmbataako.

³²Kalluɗo ɗon hora adiliijo, ɗon ɗaɓɓa mbarugo mo.

³³Ammaa Jawmiraawo accataa mo haa juŋngo maako, to ɓe njahri mo yeeso kiita, o accataa kiita do'a mo.

³⁴Tammora Jawmiraawo, tokka laawol maako. O ɓaŋgtete, a mara lesdi, a yi'a no o riiwrata halluɓe.

³⁵Mi yi'i kalluɗo nder semmbe muuɗum fuu, o ɗon yaha yeeso yeeso bana lekki bilitanki.

³⁶Nde caaliimi nokkuure maako, mi yi'aay mo fahin, mi ɗaɓɓiti mo, ammaa mi tawaay mo sam.

³⁷Hakkilan timmuɗo, laar gooŋgaajo, ngam giɗɗo salaaman heɓan danygol.

³⁸Ammaa tuurtooɓe fuu nattan, danygol halluɓe halkan.

³⁹Kisndam adili'en ɗon haa Jawmiraawo. O hisrude maɓɓe wakkati ɓillaare.

⁴⁰Jawmiraawo wallan ɓe, rimɗinan ɓe. O rimɗinan ɓe diga juuɗe halluɓe. O hisni ɓe ngam ɓe cuuɗi haa maako.