Read Fulfulded Jabuura 39 Bible Online

Jabuura 39 - Fulfulded bible

Jabuura 39

¹Ngam kaliifaajo gime. Yimre Daawuda fodde daande “Yedutuun”[18].

²Mi wi'no: “Sey mi hakkilana yahdu am, ngam taa mi waɗa hakke bee ɗemŋgal am. To kalluɗo ɗon yeeso am, sey mi naŋgta hunnduko am, mi de'a.”

³Mi jeeɗi siriw, mi wolwaay haala hayru sam. Ammaa torra am tulliti.

⁴Ɓernde am metti masin, nde mi numti ɗum, mi tawi ɓernde am wuli bana yiite. Haa mi waawaay naŋgtugo ɗemŋgal am, mi wi'i:

⁵“Yaa Jawmiraawo, anndinam timmoode ngeendam am! Nyalɗe noy luttani yam? Haa mi anndita no balɗe am ndammiri!”

⁶Ndaa, a rammini balɗe am bana njaajirka newre juŋngo, ngeendam am laati bana huunde meere haa yeeso maaɗa, bana foofannde woore, non koo moy neɗɗo geeto.

⁷Fakat nder waancuru maako, o laati bana ɗowdi, o ɗon torro meere boo. O ɗon mooɓta jawdi, ammaa o anndaa mo nyaamata ndi.

⁸Yaa Jawmiraawo, ɗume tammotoomi jonta? Haa maaɗa tammunde am woni.

⁹Hisnam diga kuuɗe sooynde ɗowtaare am, ngam taa faataaɓe njancammi.

¹⁰Mi jeeɗi siriw, mi wolwaay koo ɗume, ngam an ukkani yam kuuje ɗe'e.

¹¹Accu ɓoccugo yam, mi ɓadake maayugo ngam a ɗon honammi.

¹²To goɗɗo waɗi aybe, a felan mo, a eltan mo, a wonnan ko o samɗini, bana mooƴu nyaamrata kuuje. Fakat, neɗɗo koo moye bana foofannde woore tan.

¹³Nan tornde am, yaa Jawmiraawo! Heɗa bojji am! Taa sukku noppi ma to mi woyani ma. Ngam mi koɗo haa saare ma, bana kaakiraaɓe am fuu, mi duurataa.

¹⁴Taa laaram bee tikkere, haa mi mooso hiddeko mi dilla, mi majja.