Read Fulfulded Jabuura 62 Bible Online

Jabuura 62 - Fulfulded bible

Jabuura 62

¹Ngam kaliifaajo gime. Yimre Daawuda fodde daande “Yedutuun”[31].

²Haa kommbi ma tan, yaa Allah, mi heɓi de'ere, kisndam am ɗon iwa haa maako.

³Kaŋko tan woni tapaare am, kisndam am e hisrude am townde. Mi dimmbataako sam.

⁴Ndey accoton ukkanaago goɗɗo gooto? On fuu on ngiɗi do'ugo mo bana mahol guuriiŋgol, bana mahdi ɓadiindi yibbugo na?

⁵On ɗon nufo ittugo daraja maako makka. On ngiɗi pewe, kunnduɗe mon ɗon mbarkiɗina mo, ammaa ɓerɗe mon ɗon naala mo.

⁶Haa kommbi ma tan, yaa Allah keɓmi de'ere, kisndam am ɗon iwa haa maako.

⁷Kaŋko tan woni tapaare am, kisndam am e hisrude am townde. Mi dimmbataako.

⁸Kisndam am e tedduŋgal am iwi haa Allah, kaŋko woni tapaare hisrude am semmbiɗnde e nyukkorde am.

⁹Onon yimɓe am, koole mo koo ndey fuu! Ngecce mo ko woni nder ɓerɗe mon fuu! Ngam kaŋko woni hisrude meeɗen.

¹⁰Ɓiɓɓe Aadama ɗum henndu, ɗum huunde meere, to a waɗi ɓe dow awnorɗum, ɓe ngalaa teddeeŋga, koo henndu boo ɓuran ɓe fuu teddugo.

¹¹Taa tamme toonyaare nafan on, taa tamme kuuje jaɓtaaɗe ndiskinan on. To jawdi mon ɗon ɓesdo, taa ɓerɗe mon ɗakkotira bee maari.

¹²Baawɗe fuu iwi diga Allah, mi nani o wi'i ɗum, naa nde woore tan.

¹³An, yaa Jawmiraawo, a mari mbooɗeeŋga, ngam a warjoto koo moy fodde kuuɗe mum.