Read Fulfulded Jabuura 65 Bible Online

Jabuura 65 - Fulfulded bible

Jabuura 65

¹Ngam kaliifaajo gime. Yimre Daawuda.

²Yaa Allah, sey yimɓe fuu maŋgte haa Siyona! Ɓe kebbinane togayeeje maɓɓe!

³Ngam an a ɗon jaɓa do'aaje maɓɓe. Yimɓe fuu ngaran haa maaɗa.

⁴Aybeeji am ɗuuɗi, ɓuri semmbe am, ammaa an a yaafoto tuurtolji am.

⁵Barka laatani cuɓaaɗo ma mo nduŋaniiɗa ɓaditaago ma haa o jooɗo nder saare maaɗa! Min kaaran barkaaji suudu ma, haykaliiru ma seniindu.

⁶A jaaboto tornde amin, yaa Allah, Kisnoowo min bee kuuɗe kaayeefiije. Jooɗiiɓe haa keeri duniyaaru e beeli ɓurɗi daayaago fuu, kooloto ma.

⁷A tabitini kooseeje bee baawɗe ma, ngam a baawɗo masin.

⁸A de'itini hoolo beeli, hoolo ƴuuge maaji, a de'itini tuurtol ummaatooje.

⁹Jooɗiiɓe haa keeri duniyaaru fuu kultori ngam alaamaaji ma, diga fuunaaŋge haa hiirnaaŋge fuu, a ɗon seyna yimɓe.

¹⁰A ɗon hakkilana lesdi, a ɗon yarna ndi, a ɗon riskina ndi masin, maayo ma ɓeeɓataa. A ɗon taaskitina aawdi maɓɓe. A ɗon taaskitina ɗum bana ni'i:

¹¹A ɗon yarna kaatorooji maari, a ɗon momlita giri maari, a ɗon ɗelmina ndi bee waabiliije, a ɗon barkiɗina ko ndi fuɗnata.

¹²A timminan hitaande bee ƴaamle ɗuuɗɗe ngam daliila mbooɗeeŋga ma, a ɗuɗɗinan jeynitaaje haa njahata fuu.

¹³Durduɗe keewan huɗo hecco, towndiije boo keewan gimi seyo.

¹⁴Durduɗe keewan tokke, waadiiji keewan alkamaari, yimɓe ngiman bee seyo.