Read Fulfulded Jabuura 68 Bible Online

Jabuura 68 - Fulfulded bible

Jabuura 68

¹Ngam kaliifaajo gime. Yimre Daawuda.

²Allah ummo, wolwa, konne'en maako caŋkititto, wanyɓe mo ndoggan diga yeeso maako!

³Bana cuurɗe caakorto nder henndu, bana taari ɓolwirta nder yiite, non halluɓe kalkirta haa yeeso Allah!

⁴Ammaa adili'en ceyoto, ɓe mbelmbeltan yeeso Allah, ɓe ɗon perti, ɓe ɗon keewi seyo e welwelo!

⁵Ngimane Allah, maŋgte innde maako! Taaskitine laawol ngam Allah ba'iiɗo duule! Innde maako Jawmiraawo, ceye yeeso maako!

⁶Allah ɗon jooɗi haa joonde mum seniinde, kaŋko woni baaba atiime'en, gooŋɗinoowo rewɓe yurumɓe.

⁷O hokkan yeewaaɓe saare haa ɓe njooɗodo bee yimɓe, o fiistan haɓɓaaɓe, o hokka ɓe hayru. Ammaa tuurtooɓe njooɗoto nder ladde yoornde.

⁸Yaa Allah, saa'i a ardi ummaatoore ma, a ta'i ladde hamaadaare,

⁹lesdi dimmbi, asamanji toɓni iyeele ngam garki ma, yaa Allah Isra'iila, baŋguɗo dow hooseere Sina.

¹⁰A toɓni iyeele ɗuuɗɗe, yaa Allah, a hesɗitini maral ma tampuŋgal.

¹¹Ummaatoore ma jooɗi nder maagal, nder mbooɗeeŋga ma a taaskitini ngal ngam laafuɓe, yaa Allah.

¹²Jawmiraawo wolwi, nelaaɓe rewɓe ɗuuɗɓe ngooyni habaru jaalorgal:

¹³“Laamiiɓe jama'aaje konu ɗon ndogga bee pargal!” Rewɓe haa saare ɗon cennda keɓal konu.

¹⁴Poola ɗon mari bileeji cardi e liiliiji kaŋŋeeri laaɓndi. Koni ngiɗɗon waalaago nder baalɗe?

¹⁵Saa'i Allah Baawɗo saŋkiti laamiiɓe ton, o toɓni mallimallooje dow hooseere Calmon.

¹⁶Hooseere Baasan woni hooseere Allah[32], nde mari ƴuuge ɗuuɗɗe.

¹⁷Onon kooseeje marɗe ƴuuge ɗuuɗɗe, koni kaajoton hooseere nde Allah seyori jooɗaago ton? Jawmiraawo jooɗoto ton haa foroy!

¹⁸Allah ɗon warda bee mootaaji pucci ujineeje ujineeje, Jawmiraawo ɗon caka maɓɓe dow hooseere Sina, haa nokkuure seniinde.

¹⁹A eeŋgi haa nokkuure townde, a yahri naŋngaaɓe, a jaɓi dokke diga yimɓe, koo tuurtooɓe boo ngaddani ma dokke, ngam haa mbaɗana hoore ma jooɗorde, yaa Jawmiraawo am.

²⁰Yettoore laatano Jawmiraawo nyalaade fuu! O ɗon roondo doŋgle meeɗen! Kaŋko woni Allah kisnoowo en.

²¹Allah meeɗen woni Allah kisnoowo, Jawmiraawo Allah meeɗen ɗon hisna en maayde.

²²Allah fusan ko'e konne'en mum, tabitɓe dow laawol zunuuba.

²³Jawmiraawo wi'i: “Mi lortinan konne'en mon diga Baasan, mi lortinan ɓe diga luggeeŋga mbeela boo,

²⁴ngam haa on njampa ƴiiƴam maɓɓe, dawaaɗi mon boo taha ɗam.”

²⁵Yimɓe fuu ngi'i jahaaŋgal jaalorgal ma, yaa Allah, ɓe ngi'i no a nastiri haykaliiru ma, yaa Laamiiɗo am.

²⁶Yimooɓe ardi, fiyooɓe moolooji cakiti, hakkunde maɓɓe faanyɓe rewɓe bee bawɗi.

²⁷“Ngette Allah nder mooɓtorde yimɓe mum! Ngette mo, onon asŋgol Isra'iila fuu!”

²⁸Lenyol Benyamin, gaajiijo woni arano dow maɓɓe, nden mawɓe Yahuuda bee mooɓre muuɗum'en[33], ɓaawo man mawɓe Zabulon e Neftali.

²⁹Allah maaɗa waɗi anniya laatingo ma cemmbiɗɗo. Waŋgin baawɗe ma yaa Allah, ɗe kuuwtinirɗa ngam wallugo min!

³⁰An jooɗiiɗo nder haykaliiru ma haa Urusaliima, haa laamiiɓe ngaddante dokke,

³¹furkita ndabbaawa mbaaliiŋga caka kewe, tokkere ga'i e nyalbi nder ummaatooje, haa ɓe fuu ɓe ngara ɓe leestane, ɓe lii'ano ma cardi maɓɓe. Saŋkitit ummaatooje giɗɗe haɓre!

³²Mawɓe Misra ngaran haa maaɗa, Etiyopiya'en mbeeɗan juuɗe muuɗum'en law heedi Allah.

³³Onon laamuuji duniyaaru, ngimane Allah! Ngime maŋgtoore Jawmiraawo!

³⁴Ngimane Allah ba'iiɗo moota pucci mum nder asamaawu ɓurŋgu towugo, nder asamaawu duumiiŋgu! Ndaa o ɗon ɓaŋgta sawtu maako cemmbiɗɗo

³⁵Anndite baawɗe Allah, maŋngu maako dow Isra'iila, baawɗe maako nder duule!

³⁶Yaa Allah a kuleteeɗo, a ɗon nder nokkuuje ma ceniiɗe! Kaŋko woni Allah Isra'iila, o ɗon hokka ummaatoore maako semmbe e baawɗe. Yettoore laatano Allah!