Read Fulfulded Jabuura 71 Bible Online

Jabuura 71 - Fulfulded bible

Jabuura 71

¹Yaa Jawmiraawo, haa maaɗa nyukkiimi, taa mi meeɗa toskaare sam.

²Hisnam fodde adilaaku ma, rimɗinam. Heɗitam, hisnam!

³Laatanam tapaare hisnoore e suudu ndu kisanmi koo ndey, ngam a annini hisnugo yam, an woni tapaare suuɗirde am e suudu am semmbiɗndu.

⁴Yaa Allah am, hisnam juuɗe halluɓe, hisnam juuɗe toonyooɓe e waɗooɓe zunuuba.

⁵Ngam yaa Jawmiraawo, haa maaɗa tammunde am woni, mi ɗon hooli ma diga mi derkeejo.

⁶Mi ɗon hooli ma diga danyeeki am, An wurtini yam diga reedu daada am. Mi yettete haa foroy.

⁷Ngeendam am laatani ɗuuɗɓe kaayeefi, an woni aynoowo yam cemmbiɗɗo.

⁸Hunnduko am heewi maŋgtoore ma, mi maŋgtan tedduŋgal ma nyalaade fuu.

⁹Jonta nde naywumi, taa wudinam, taa accam to semmbe am jinni.

¹⁰Ngam konne'en am ɗon mbolwa dow am, ɓe ɗon aynammi, ɓe ɗon tefa dabareeji mbarugo yam.

¹¹Ɓe ɗon mbi'a: “Allah wudini mo! Taasne mo, naaŋge mo! Ngam o walaa kisnoowo.”

¹²Yaa Allah, taa daayam! Yaawɗa wallugo yam, yaa Allah am!

¹³Dartantooɓe yam, semtin ɓe, nattin ɓe! Yiɗɓe naawnugo yam, ɓe cemta, ɓe tosko!

¹⁴Ammaa min mi ɗon tammoro ma foroy, foroy mi tokkoto maŋgtugo ma.

¹⁵Mi anndinan yimɓe adilaaku ma e kisndam ma nyalaade fuu, kuuɗe ma ɗuuɗɗe masin, mi waawataa limugo ɗe.

¹⁶Mi waran maŋgtugo kuuɗe ma mawɗe, yaa Allah Jawmiraawo, mi siftinoran yimɓe adilaaku ma, an feere ma.

¹⁷Yaa Allah, diga mi derkeejo a ekkitini yam, haa wargo hannde mi ɗon waazo kaayeefiiji ma.

¹⁸Jonta nde naywumi, nde mbaɗmi dandanndi, taa accam, yaa Allah, haa mi waazina koo moy nder yidere warannde baawɗe ma.

¹⁹Adilaaku ma, yaa Allah, ɗon yotto asama, a waɗi kuuɗe mawɗe, yaa Allah, moy nanndi bee ma?

²⁰A yarni yam torraaji e boneeji ɗuuɗɗi, ammaa a hesɗitinan semmbe am, fahin a wurtintam ngaska lugguka.

²¹A ɓesdantam maŋngu, a de'itinan ɓernde am.

²²Ngam maajum mi yettete, yaa Allah am, mi maŋgtan gooŋgaaku ma bee hoodu, mi yimante bee moolooru am, yaa Ceniiɗo Isra'iila.

²³Mi welweltan, nde mi yimante gime, ngam a sootti yoŋki am.

²⁴Mi wolwan haala adilaaku ma nyalaade fuu, ngam yiɗɓe naawnugo yam fuu toskake, caklake.