Read Fulfulded Jabuura 74 Bible Online

Jabuura 74 - Fulfulded bible

Jabuura 74

¹Yimre Asaf ekkitinoore. Yaa Allah, ngam ɗume ngudinɗa min haa foroy? Ngam ɗume tikkanta min, minin baali tokkere ma?

²Siftor yimɓe ma ɓe cuɓanɗa hoore ma diga ɓooyma, ɓe coottuɗa, laatiiɓe maral ma. Siftor hooseere Siyona boo nde mbaɗɗa joonde ma.

³War, laar bille ɓooymaaje, konne'en amin mbonni koo ɗume fuu nder suudu seniindu.

⁴Wanyɓe ma ɗon ngooka haa nokkuure fottirde ma, ɓe ndarni tuutaaje maɓɓe ton.

⁵Ɓe nanndi bee fe'ooɓe leɗɗe, nder laynde sukkunde.

⁶Ɓe pusi suuraaji cehaaɗi, takkaaɗi haa mahdi fuu, bee pe'irɗe e ɓoole.

⁷Ɓe nguli suudu ma seniindu, ɓe coɓni jooɗorde innde ma, ɓe mbirgi nde fuu.

⁸Ɓe anninino nattingo min, ɓe nguli nokkuuje haa yimɓe pottanno bee Allah fuu nder lesdi.

⁹Ko hollata diina amin fuu majji, walaa annabiijo lutti, minin boo, walaa annduɗo ndey ɗum haaɗata.

¹⁰Yaa Allah, haa ndey wanyɓe min tokkoto jancugo min? Haa ndey konne'en tokkoto hallingo innde ma?

¹¹Ngam ɗume caliɗa wallugo min, cuuɗuɗa juŋngo ma haa ɓaawo? Nattin ɓe!

¹²Ammaa a laamiiɗo amin diga ɓooyma, yaa Allah, a huuwi kuuɗe dimɗinooje nder duniyaaru.

¹³A seeki maayo bee baawɗe ma, a fusi ko'e kuuje kulniiɗe nder mbeela.

¹⁴A sampiti hoore Lewiyatan[36], a laatini nga nyaamdu kuuje ladde.

¹⁵A ɓulni ceeɓooje e maaje, a ɓeeɓni maaje mawɗe ɗe ɓeeɓataano.

¹⁶A tagi jemma e nyalawma, a jo'ini naaŋge e lewru haa nokkuuje muuɗum'en.

¹⁷A tabitini keeri duniyaaru, a waɗi nduŋngu e ceeɗu.

¹⁸Ammaa siftor, yaa Jawmiraawo, konne'en ma ɗon njance, faataaɓe ɗon kallina innde ma.

¹⁹Taa hokku yimɓe ma tampuɓe haa juuɗe konne'en maɓɓe saatuɓe, taa yejjitit yimɓe ma toskaaɓe haa foroy.

²⁰Hakkilan alkawal ma! Ngam nyukkorɗe lesdi fuu keewi toonyaaɓe.

²¹Taa accu ɓilliiɓe tosko, ammaa toskaaɓe e laafuɓe maŋgta innde ma.

²²Umma, yaa Allah, jiŋngam, siftor no faataaɓe njaworto ma nyalaade fuu!

²³Taa yejjitit haraka wanyɓe ma, fitina dartantooɓe ma ɗon ɓesdo foroy!