Read Fulfulded Jabuura 88 Bible Online

Jabuura 88 - Fulfulded bible

Jabuura 88

¹Yimre nde ɓiɓɓe Koora, fodde daande “mahalat le'annot”[47]. Ngam kaliifaajo gime. Yimre Heman Esrahiijo ekkitinoore.

²Yaa Jawmiraawo Allah, Kisnoowo yam, mi ɗon wookane nyalawma, jemma boo mi ɗon yeeso ma!

³Accu do'aare am yotto ma, heɗita tornde am!

⁴Boneeji ɗuuɗɗi ukkanake yam, haa mi yottake daande maayde.

⁵Mi limdaama bee nastanɓe ngaska lugguka, semmbe am fuu jinni.

⁶Mi gudinaaɗo caka maayɓe, mi nanndi bee mbaraaɓe, maayɓe nder genaale. Kamɓe, a siftortaa ɓe, ɓe keɓataa ballal ma fahin.

⁷A do'i yam nder ngaska lugguka, nder nyiɓre ɓaleere.

⁸Ɓernuki ma teddani yam bana doŋngal, a torri yam bee ƴuuge ɗe umminɗa dow am fuu.

⁹A daayni sooba'en am, a laatini yam nyidduɗo haa maɓɓe. Mi maɓɓaaɗo, mi heɓataa wurtaago.

¹⁰Gite am tampi ngam torra. Nyalaade fuu mi ɗon toro ma, yaa Jawmiraawo, mi ɗon weeɗa juuɗe am gal maaɗa.

¹¹Kadi a waɗanan maayɓe kaayeefiiji na? Malla mbeeluuji ummoto, ɗi teddine?

¹²Wonɓe nder genaale mbolwan haala mbooɗeeŋga ma na? Malla ɓe maŋgtan gooŋgaaku ma haa nokkuure halkere?

¹³Ɓe ngi'an kaayeefiiji ma nder nyiɓre na? Malla adilaaku ma nder joonde maayɓe?

¹⁴Ammaa min, yaa Jawmiraawo, mi ɗon wookane, nde weeti fuu mi ɗon toro ma.

¹⁵Ngam ɗume ngudinɗa mi, yaa Jawmiraawo? Ngam ɗume mbiirnata mi gite ma?

¹⁶Diga mi derkeejo haa wargo hannde mi toskaaɗo, mi ɗon daande maayde, a ɗon hulnammi, mi saklake.

¹⁷Ɓernuki ma caatuki ukkanake yam, masiibooji ma kulniiɗi ɗon nattinammi.

¹⁸Nyalaade fuu ɗi ɗon taari yam bana ndiyam, ɗi ɗon maɓɓammi koo toy fuu.

¹⁹A daayni yam sooba'en am e ngorgiraaɓe am fuu. Ngorgi am, ɗum nyiɓre tan.