Read Fulfulded Jabuura 96 Bible Online

Jabuura 96 - Fulfulded bible

Jabuura 96

¹Ngimane Jawmiraawo yimre hesre, ngimane Jawmiraawo, onon yimɓe duniyaaru fuu.

²Ngimane Jawmiraawo, maŋgte innde maako, ngaazine habaru kisndam maako nyalaade fuu.

³Anndine tedduŋgal maako caka ummaatooje, ngecce jama'aaje fuu kaayeefiiji maako.

⁴Ngam Jawmiraawo o mawɗo, o maŋgteteeɗo masin, o kulniiɗo ɓurɗo ɗowanteeɓe fuu.

⁵Ngam ɗowanteeɓe jama'aaje fuu ɗum labbi meere, ammaa Jawmiraawo tagi asamanji.

⁶Yeeso maako ɗon waŋgina maŋngu e daraja, baawɗe e tedduŋgal ɗon nder suudu maako seniindu.

⁷Onon ummaatooje duniyaaru, maŋgte Jawmiraawo, maŋgte tedduŋgal maako e baawɗe maako.

⁸Teddine innde maako, ngaddane mo dokke, ngare haa babe maako.

⁹Cujidane mo saa'i o waŋginta senaare maako. Ndiwne yeeso maako, onon yimɓe duniyaaru fuu.

¹⁰Maatine ummaatooje: “Jawmiraawo woni laamiiɗo. Duniyaaru tabiti, ndu dimmbataako. O hiitoto ummaatooje fuu kiita ngooŋɗuka.”

¹¹Asama seyo, lesdi boo welwelta! Mbeela e ko woni nder maaga fuu koola!

¹²Gese e ko woni dow maaje fuu ceyo! Koo leɗɗe nder laynde boo ngimana Jawmiraawo bee seyo!

¹³Ngam o ɗon wara! O ɗon wara ngam hiitanaago yimɓe duniyaaru, o hiitanto yimɓe duniyaaru bee adilaaku e jama'aaje bee gooŋgaaku maako.