Read Fulfulded Balndi 1 Bible Online

Balndi 1 - Fulfulded bible

Balndi 1

¹Ndaa balndi Suleymaanu ɓii Daawuda, laamiiɗo Isra'iila,

²ngam anndugo hikma e ne'aare, ngam faamugo bolle kakkilɗe,

³ngam heɓugo anndal laaɓŋgal, ngam waɗugo ko fotti, ko gooŋɗi, ko wooɗi,

⁴ngam hokkugo humaki'en hakkiilo, derke'en boo anndal e kirseeku.

⁵Sey hikmaajo heɗito, ɓesda anndal, bolle ɗe'e ɗowa marɗo anndal,

⁶ngam haa o faama balndi e haala lugguka, bolle hikma'en e annditanamji maɓɓe.

⁷Kulol Jawmiraawo woni fuɗɗam anndal, ammaa faataaɓe ɗon njawo hikma e ne'aare.

⁸Ɓiŋngel am, nan elto baaba ma, taa sala wasuyeeji daada ma.

⁹Anndinol maɓɓe mo'inte bana meetaleewol dow hoore ma, bana koɗoy haa daande ma.

¹⁰Ɓiŋngel am, to waɗooɓe hakke esti ma, taa tokka ɓe.

¹¹Teema ɓe mbi'ete: “Yahdu bee amin, en mbaaltano yimɓe woɗɓe, en mbara ɓe, ngam fijugo tan.

¹²To en tawi ɓe, ɓe yeeɗɓe. Ammaa to en timmini ɓe, ɓe nastan ngaska.

¹³En keɓan kuuje ɗuuɗɗe marɗe saman, en kebbinan cuuɗi men bee keɓal.

¹⁴War, hawtu bee amin, en cennda keɓal, an boo a heɓa geɗal maaɗa.”

¹⁵Ɓiŋngel am, taa yahdu bee maɓɓe, naŋgtu kosɗe ma, taa tokka ɓe.

¹⁶Ngam kosɗe maɓɓe ɗon njaawana halleende, ɓe ɗon njaawɗano rufugo ƴiiƴam.

¹⁷Ɗum nafataa to goɗɗo tuufnake tuuforgol yaake colli ɗon ndaara,

¹⁸ammaa kamɓe ɓe ɗon tuufano ko'e maɓɓe, fakat ɓe maayan nder tuuforgol maɓɓe.

¹⁹Nguyka ɗon halka ngeendam gujjo, irin ɗu'um laatanto marɓe suuno fuu.

²⁰Nane! Hikma ɗon yeeyna haa laabi, ka ɗon towna sawtu maaka haa babe fuu.

²¹Ka ɗon ewno haa nokkuuje hoolo, haa jolɗe berniwol ka ɗon wolwa haala maaka:

²²“Onon humaki'en, ndey on accata humakaaku? Haa ndeye jancooɓe tokkata seyoraago jancuki? Haa ndeye faataaɓe tokkata wanyugo anndal?

²³Kakkilane feloore am, saa'i mi ɗon faamtina on hakkiilo am, mi ɗon anndina on sawari am.

²⁴Mi ewni on, ammaa on cali nootaago. Mi forti juŋngo am heedi mooɗon, ammaa on kakkilaay.

²⁵On ngudini ko mbi'mi on fuu, on ngiɗaano nanugo pelooje am.

²⁶Ngam maajum mi jalan dow sarru mon, mi jancan on to kultoreeŋgol ukkanake on,

²⁷to ngol ukkanake on bana naargewol, to sarru mon wari bana duluuru, to ɓillaare e kulol ngari dow mooɗon.

²⁸Nden kam on ewnoto yam, ammaa mi jaabataako. On ɗaɓɓitittam, ammaa on tawataa yam.

²⁹On meeɗaay naftoraago anndal, on ɗon calo hulugo Jawmiraawo foroy.

³⁰On ngiɗaa mi dawrana on, on kakkilanaay pelooje am.

³¹Ngam maajum on nyaaman nafuuda halleende mon, on kaaran dabareeji mon kalluɗi.

³²Ngam tuurtol humaki'en mbaran ɓe, sooynde deentaaki faataaɓe halkan ɓe.

³³Ammaa koo moy heɗitake yam, jooɗoto jam, o de'itan, o hulataa sarru.”