Read Fulfulded Balndi 15 Bible Online

Balndi 15 - Fulfulded bible

Balndi 15

¹Jaawaabuwol ɗelemŋgol feewtinan tikkere, ammaa wolde saatunde umminan ɓernde.

²Ɗemɗe hikma'en camɗinan anndal, ammaa kunnduɗe faataaɓe ɓulnan faataare.

³Gite Jawmiraawo ɗon koo toy, ɗe ɗon ndaara halluɓe e wooɗɓe.

⁴Ɗemŋgal ɗelemŋgal woni lekki ngeendam, ɗemŋgal pewoowal tampinan ruuhu.

⁵Paataaɗo yawoto elto baaba mum, ammaa kakkilɗo jaɓan feloore.

⁶Ndesaari mawndi ɗon haa saare gooŋgaajo, ammaa torra majjinan ngeenaari kalluɗo.

⁷Kunnduɗe hikma'en caakan anndal, ammaa ɓerɗe faataaɓe mbaɗataa ɗum.

⁸Kirseteeɗi halluɓe laati nyidduɗi haa Jawmiraawo, ammaa tornde gooŋga'en fottani mo.

⁹Jawmiraawo ɗon wanya laawol kalluɗo, ammaa o yiɗi baɗanɗo kuuɗe adiliije.

¹⁰Elto saatuŋgo laatanto celɗo laawol booɗŋgol, ganyanɗo feloore maayan.

¹¹Joonde maayɓe e nokkuure halkere ma ɗon mbaŋgi haa Jawmiraawo, sakko ɓerɗe yimɓe!

¹²Jancoowo yiɗaa feleego, ngam maajum o yahataa haa hikma'en.

¹³Ɓernde seyiinde laɓɓinan yeeso, ammaa to ɓernde naawi, ruuhu tampan.

¹⁴Ɓernde kakkilɗo ɗaɓɓitan anndal, faataaɓe nyaaman faataare.

¹⁵Haa cuniiɗo nyalɗe fuu mbooɗaay, ammaa ɓernde seyiinde ɗon nder juulde foroy.

¹⁶Pamarum bee kulol Jawmiraawo ɓuri jawdi ɗuuɗndi bee torra.

¹⁷Nyaamugo haakooji bee giɗgiɗtiral ɓuri ngaari payndi bee ganyganytiral.

¹⁸Yaawa-tikkereejo umminan jokkirgol, neeɓa-tikkereejo feewtinan haɓre.

¹⁹Laawol mbaateendamjo ɗon maɓɓi bee gi'e, ammaa laawol gooŋga'en ɗon laaɓi tal.

²⁰Ɓiɗɗo kakkilɗo seynan baaba mum, ammaa paataaɗo yawoto daada mum.

²¹Tampa-hakkiiloojo seyorto faataare, ammaa marɗo faamu tokkoto laawol mum cir.

²²To carwootiral woodaa, nufayeeje mbonnoto, ammaa bee dawrooɓe ɗuuɗɓe ɗi laatoto.

²³Goɗɗo seyorto jaawaabu hunnduko mum, wolde woonde nder saa'iire haandunde welan masin.

²⁴Laawol ngeendam jahranŋgol dow laatanto kakkilɗo, haa o daɗa joonde maayɓe haa les.

²⁵Jawmiraawo yibbinan cuuɗi mawnitiiɓe, ammaa o aynan maral rewɓe yurumɓe.

²⁶Jawmiraawo ɗon wanya dabareeji kalluɗo, ammaa bolle ɗelemɗe pottani mo.

²⁷Cuuneteeɗo riba wonnan saare mum, ammaa calotooɗo ngeenaari kallundi yeeɗan.

²⁸Adiliijo numan hiddeko o jaabo, ammaa kunnduɗe halluɓe ɓulnan halleende.

²⁹Jawmiraawo ɗon daayi halluɓe, ammaa o ɗon nana tornde adili'en.

³⁰Gite jaynanɗe ceynan ɓernde, kubaruwol booɗŋgol semmbiɗinan i'e.

³¹Nofru nananndu feloore hisnoore jooɗoto caka hikma'en.

³²Mo sali elto, yawi yoŋki mum, ammaa kakkilananɗo feloore heɓan hakkiilo.

³³Kulol Jawmiraawo woni anndinki hikma, yaŋkinaare aartan tedduŋgal.