Read Fulfulded Balndi 18 Bible Online

Balndi 18 - Fulfulded bible

Balndi 18

¹Jooɗotooɗo feere mum tokkoto suuno mum tan, to goɗɗo yiɗi wallugo mo, o ɓernan.

²Paataaɗo yiɗaa faamugo, sey waŋgingo ko woni haa ɓernde mum tan.

³Halleende yahdan bee yawnaare, mbustu wardan bee kuugal cemtiniiŋgal.

⁴Bolle iwanɗe haa hunnduko neɗɗo nanndi bee ndiyam lugguɗam, bee maayel ilooyel iwŋgel haa seeɓoore hikma.

⁵Ɓurnugo kalluɗo haa kiita e lelnugo haala gooŋgaajo, fottaay.

⁶To paataaɗo fuɗɗi waabaago, o ɗaɓɓan ɓocci.

⁷Hunnduko paataaɗo nastinan mo nder halkere, bolle maako ɗe tuuforgol yoŋki maako.

⁸Bolle tufleejo nanndi bee nyaamdu welndu, ɗe nastan nder teteki.

⁹Mbaateendamjo woni deerɗu bonnoowo.

¹⁰Innde Jawmiraawo woni suudu aynirdu semmbiɗndu, adiliijo doggan haa ton, hisan.

¹¹Diskuɗo tammi jawdi mum hisnan ɗum, bana mahi towɗi aynirta berniwol.

¹²Ɓernde neɗɗo mawnititto hiddeko o do'o, ammaa yaŋkinaare aartan tedduŋgal.

¹³Jaabotooɗo diga siwaa nanugo, o paataaɗo, mbustu laatanto mo.

¹⁴Ruuhu neɗɗo jaaloto nyawu. Ammaa moy dartinta ruuhu tampuŋgu?

¹⁵Ɓernde hakkilnde heɓan anndal, nofru hikmaajo ɗon ɗaɓɓita anndal.

¹⁶Dokkal neɗɗo yaajinanan mo laawol, yottinan mo yeeso mawɓe.

¹⁷To arano wolwi haa kiita, ɓe mbi'an: “Gooŋga!” Ammaa ɗiɗaɓo, konneejo maako, fewnan mo.

¹⁸Kur'u timminan jokkirgol, ngu ta'an haala hakkunde semmbiɗɓe.

¹⁹Ɓernde deerɗiraawo zammbaaɗo ɓuri berniwol cemmbiɗŋgol maɓɓaago, jokkirli nanndi bee jamɗe palduɗe dammugal.

²⁰Goɗɗo haarnan reedu mum bee nafuuda bolle mum, o haaran bee bote hunnduko maako.

²¹Maayde e ngeendam ngoni haa ɗemŋgal, kuuwtinirɗo ngal bee hakkiilo nyaaman nafuuda maagal.

²²Keɓɗo debbo heɓi hayru, o heɓi boo yerduye Jawmiraawo.

²³Talakaajo wolwan bee toraago, ammaa diskuɗo jaaboto bee caatal.

²⁴Woodi sooba'en yahranɓe goɗɗo nder halkere, ammaa soobaajo gooŋgaajo ɗakkoto ko ɓuri deerɗiraawo.