Read Fulfulded Balndi 26 Bible Online

Balndi 26 - Fulfulded bible

Balndi 26

¹Bana mallimallooje nder ceeɗu e iyeende wakkati codol, non tedduŋgal yahdataa bee paataaɗo.

²Bana colli piirdata, non naaloore bilaa daliila wa'i, nde laatataako.

³Labaŋgal ngam puccu, ɓoccol ngam wamnde, sawru boo ngam ɓaawo paataaɗo.

⁴To a jaabake ƴamol paataaŋgol, a laatake paataaɗo bana ƴamɗo ma.

⁵To goɗɗo ƴami ma bee faataare, hokku mo jaawaabuwol paataaŋgol, ngam taa o laara hoore maako o hikmaajo.

⁶Nelanɗo paataaɗo o yahra habaru, ta'an kosɗe mum, yaran bone.

⁷Bana kosɗe boosɗo ɓiliiɗe meere, non balndol haa hunnduko paataaɗo wa'i.

⁸Haɓɓugo hayre haa piwlol e teddingo paataaɗo, foti kal.

⁹Lisal bee gi'e haa juŋngo guykoowo, wooɗaay. Non boo balndol haa hunnduko paataaɗo, fottaay.

¹⁰Bana gawjo jogiiɗo kuri, piɗanɗo koo moy, non mo huuwnata paataaɗo malla saalotooɓe haa laawol wa'i. [12]

¹¹Bana rawaandu loroto, nyaamta tuure mum, non paataaɗo fuɗɗitan faataare mum.

¹²To a yi'i goɗɗo daaranɗo hoore mum o hikmaajo, tammanaago mo ɗuuɗaay, ndikka paataaɗo.

¹³Mbaateendamjo ɗon wi'a: “Huunde ladde ɗon haa laawol! Mbarooga ɗon haa yaasi!”

¹⁴Bana parewal waylitorto dow ɗakke mum, non mbaateendamjo waylitorto dow be'itte mum.

¹⁵Mbaateendamjo nastinan juŋngo mum nder le'al, wartirgo ngo haa hunnduko, caɗɗum haa maako.

¹⁶Mbaateendamjo ɗon laara hoore mum hikmaajo ko ɓuri marɓe hakkiilo njoweeɗiɗo.

¹⁷Caalotooɗo nastanɗo haala ka laaranaay ɗum, nanndi bee giɗɗo naŋngugo noppi rawaandu.

¹⁸Bana ginnaaɗo piɗanɗo kuri giiteleeji, pijanɗo bee balmi mbarooji,

¹⁹non baɗanɗo goɗɗo rikici, nden o wi'a: “Ɗum guusa non!”

²⁰To leɗɗe ngoodaa, yiite nyifan. To nyo'oowo woodaa, jokkirgol jinnan.

²¹Bana ɓesdanɗo ƴulɓe malla leɗɗe haa yiite, non baɗoowo jokkirgol wulnirta haɓre.

²²Bolle tufleejo nanndi bee nyaamdu welndu, ɗe nastan nder teteki.

²³Bana ɗelko yahdataa bee fayannde loopeere, non hunnduko welko yahdataa bee ɓernde hallunde.

²⁴Ganyo suuɗan bolle mum, ammaa nder maako heewi naafikaare.

²⁵To o ɗelmini sawtu maako, taa hoola mo, ngam kuuje nyidduɗe joweeɗiɗi ɗon haa ɓernde maako.

²⁶O suuɗan nganyŋgu maako bee naafikaare, ammaa kuuɗe maako kalluɗe mbaŋgan nder jama'aare.

²⁷Gasanɗo ngaska do'oto nder maaka, hayre loroto dow tallanɗo nde.

²⁸Torrugo goɗɗo bee pewe, ɗum wanyugo mo, hunnduko naafikiho waɗan halkere tan.