Read Fulfulded Balndi 3 Bible Online

Balndi 3 - Fulfulded bible

Balndi 3

¹Ɓiŋngel am, taa yejjitit ekkitinol am, ɓernde ma jogo umrooje am.

²Ngam ɗe njuutinan balɗe ma, ɗe ɗuɗɗinan hayru maaɗa e jam maaɗa boo.

³Taa amaana e gooŋgaaku ndaayo ma, haɓɓu ɗum haa daande ma, winndu ɗum dow alluha ɓernde ma.

⁴Nden kam a heɓan yerduye e innde woonde haa Allah e yimɓe fuu.

⁵Hoola Jawmiraawo bee ɓernde woore, taa tuugta[1] hakkiilo ma.

⁶Siftor mo nder kuuɗe ma fuu, kaŋko boo o darnan laabi ma.

⁷Taa laar hoore ma a hikmaajo, ammaa hul Jawmiraawo, daaya halleende.

⁸Kanjum ɗum yamɗinan ɓanndu ma, ɗum semmbiɗinan i'e ma.

⁹Teddin Jawmiraawo bee jawdi ma, lii'ana mo aranum ko keɓɗa fuu.

¹⁰Nden kam beembe ma keewan haa njuura, ɓiɗɗirde ma boo heewan inaboojam haa rufa.

¹¹Ɓiŋngel, am, taa yawa elto Jawmiraawo, taa ɓernde ma metta ngam feloore maako.

¹²Ngam Jawmiraawo eltan yiɗaaɓe mum, bana baaba eltirta ɓiɗɗo mum giɗaaɗo.

¹³Barka laatanto neɗɗo keɓɗo hikma e koo moy heɓi faamu fuu.

¹⁴Ngam heɓugo hikma ɓuri heɓugo cardi, saman maaka ɓuri saman kaŋŋeeri.

¹⁵Ka ɓuri koo luuluuje boo saman, ko ngiɗɗa fuu nanndataa bee maaka.

¹⁶Juutal balɗe ɗon haa juŋngo maaka nyaamo, risku e daraja boo haa juŋngo maaka nano.

¹⁷Laabi maaka ɗi laabi seyo, ɗi fuu ɗi ngaddante salaaman.

¹⁸Ka lekki ngeendam haa koo moy jaɓɗo ka, barka laatanto jogotooɓe ka fuu.

¹⁹Jawmiraawo jo'ini lesdi bee hikma, o tabitini asamanji bee faamu maako.

²⁰Anndal maako ɓulni ndiyam, ilni maaje, ngam daliila maagal duule ɗon cimtina saawawre.

²¹Ɓiŋngel am, joga hakkiilo e faamu, taa ɗum ndaayo gite ma.

²²Kanji ɗi ndokkete ngeendam, ɗi mo'inan hayru ma, ɗi ceynete boo.

²³Bee maaji kam, a yahan laawol ma jam, kosŋgal ma fergataako.

²⁴To a ɗon waali, a hultorta. To a ɗon ɗaani, ɗoyŋgol ma welan.

²⁵Kultoreeŋgol juhataa ma, ko halkata halluɓe ukkantaako ma.

²⁶Ngam Jawmiraawo woni hoolaare ma, o aynan kosɗe ma ngam taa a nasta tuuforgol.

²⁷Taa sala woonango marɓe haaje, to juŋngo ma woodi baawɗe waɗugo ɗum.

²⁸To a woodi huunde haa maaɗa, taa wi' keeddiɗɗa: “Dillu, sey yeeso, jaŋngo mi hokkete.”

²⁹Taa nufa kalluɗum dow keeddiɗɗa, to o ɗon jooɗi baŋnge maaɗa bee hoolaare.

³⁰Taa jokkir bee goɗɗo bilaa daliila, to o waɗaay ma aybe sam.

³¹Taa haaju toonyooɓe, taa waɗ anniya waɗugo bana maɓɓe.

³²Ngam Jawmiraawo ɗon wanya faasiki'en, ammaa o soobaajo gooŋga'en.

³³Naaloore Jawmiraawo ɗon dow cuuɗi halluɓe, ammaa o barkiɗinan cuuɗi adili'en.

³⁴Jancooɓe, o ɗon janca ɓe, ammaa o ɗon yerdo yaŋkiniiɓe.

³⁵Hikma'en keɓan tedduŋgal, ammaa mbustu laatanto faataaɓe.