Read Fulfulded Balndi 4 Bible Online

Balndi 4 - Fulfulded bible

Balndi 4

¹Onon ɓikkoy, nane ko baaba mon ekkitinta on, keɗite haa keɓon hakkiilo.

²Ngam mi ɗon hokka on anndal booɗŋgal, taa ngudine ekkitinol am.

³Ngam min mi laatino ɓiŋngel haa baaba am, mi bajjel daada am, giɗaaŋgel,

⁴saa'i man baaba am ɗon ekkitinammi, ɗon wi'a: “Sey ɓernde ma jogo bolle am, reen umrooje am haa ngeeɗa.

⁵Sey a heɓa hikma e hakkiilo. Taa yejjitit bolle am, taa wudin ɗe.

⁶Taa accu hikma, ka aynete. Yiɗ ka, ka faddete.

⁷Ndaa ko woni fuɗɗam hikma: Heɓ hikma, huuwtinir ko marɗa fuu haa keɓa hakkiilo.

⁸Samɗin hikma, ka ɓaŋgtete, ka teddinte, to a jogake ka.

⁹Ka jaagnoran hoore ma bana meetaleewol kaŋŋeeri booɗŋgol.”

¹⁰Nan, ɓiŋngel am, jaɓ bolle am, nden duuɓi ngeendam ɗuuɗante.

¹¹Mi anndinte laawol hikma, mi ɗowete dow laabi darnuɗi.

¹²To a ɗon yaha, palanɗe ma ɓillataako, to a doggi boo, a fergataako.

¹³Siftor foroy ko a ekkiti, joga ɗum booɗɗum, kanjum woni ngeendam ma.

¹⁴Taa nastu laawol waɗooɓe zunuuba, taa yah dow laawol halluɓe.

¹⁵Daaya ngol, taa tokka ngol, taa nastu ngol sam, saala.

¹⁶Kamɓe, to ɓe mbaɗaay kalluɗum, ɓe mbaawataa ɗaanaago, to ɓe ndo'aay goɗɗo, ɗoyŋgol maɓɓe sottan.

¹⁷Zunuuba woni nyaamdu maɓɓe, toonyaare boo njaram maɓɓe nguykinoojam.

¹⁸Ammaa laawol adili'en nanndi bee jayŋgol fajiri ɓesdanŋgol yaynugo haa caka nyalawma.

¹⁹Laawol waɗooɓe zunuuba nyiɓɓi bana jemma, ɓe anndaa ko ferginta ɓe.

²⁰Ɓiŋngel am, nan ko mi wi'ete, heɗita bolle am.

²¹Taa accu ɗe ndaayo gite ma, siga ɗe nder ɓernde ma.

²²Ɗe ngeeɗinan koo moy faami ɗe, ɗe njamɗitinan ɓanndu maako fuu.

²³Hakkilan ko a numata, ngam ngeendam ma laatoto bana numooji ma.

²⁴Taa hunnduko ma wolwa fewre, bolle zammba e fewjere fuu, daaynu ɗe.

²⁵Sey gite ma tiito yeeso bee hoolaare, ngam taa a hippa ɗe bee semteende.

²⁶Anndu ko a huuwata, ngam haa kuuɗe ma fuu laato booɗɗe.

²⁷Taa sel haa nyaamo malla haa nano, daaynu kosŋgal ma e halleende.