Read Fulfulded Balndi 5 Bible Online

Balndi 5 - Fulfulded bible

Balndi 5

¹[2] Ɓiŋngel am, hakkilan hikma am, noppi ma keɗito faamu am,

²haa a laato kakkilɗo, haa keɓta ko mbolwata.

³Ngam hunnduko debbo jananno ɗon simtina njumri, bolle maako ɓorwi, ɓuri nebbam.

⁴Ammaa haa ragare o haaɗan rok, o ta'an bana kaafahi ki mbeldiiji ɗiɗi.

⁵Kosɗe maako ɗon ndiirto haa waade, laawol maako ɗon yahra haa joonde maayɓe.

⁶O tabitittaa dow laawol ngeendam, o ɗon tokko laabi leliiɗi, ammaa o anndaa.

⁷Jonta kam, naneeɗam, onon suka'en. Taa cele bolle hunnduko am.

⁸Ndaaye irin debbo oo, taa ɓadite dammugal suudu maako,

⁹ngam taa on ndokka woɗɓe daraja mon malla duuɓi mon haa gorko mo walaa enɗam,

¹⁰ngam taa jananɓe keɓa risku mon, taa kuugal mon nafa saare goɗɗo jananno.

¹¹Haa ragare maajum on uuman, to kusel ɓalli mon jinni.

¹²Nden kam on mbi'an: “Kayya! mi wanyi elto, ɓernde am yawi feloore,

¹³mi nananaay jaŋnginooɓe yam, mi hakkilanaay bolle anndinooɓe yam.

¹⁴Seɗɗa haɗi yam nastugo sarru nder mooɓtorde jama'aare.”

¹⁵Debbo ma nanndi bee seeɓoore ndiyam. Yar haa maare.

¹⁶Taa accu ndiyam maare ila haa yaasi,

¹⁷taa senndu ɗam bee woɗɓe.

¹⁸Seyora debbo mo ɓaŋgɗa nder sukaaku ma.

¹⁹Debbo ma wooɗi bana lelwa, enɗi maako nguykine koo ndey, yiide maako seyne foroy.

²⁰Ɓiŋngel am, koni a wuykanno haa yiide debbo jananno? Koni a harlanno enɗi debbo mo a anndaa?

²¹Siftor: Jawmiraawo ɗon yi'a laabi ma, o ɗon wiɗito kuuɗe ma fuu.

²²Kalluɗo, zunuubaaji mum naŋngan ɗum, o kaɓɓeteeɗo nder kaɓɓorli hakke maako.

²³O maayan ngam sooynde naŋgtaare, o majjan ngam daliila faataare maako mawnde.