Read Fulfulded Balndi 9 Bible Online

Balndi 9 - Fulfulded bible

Balndi 9

¹Debbo mawɗo bi'eteeɗo Hikma sehi daŋraŋge suudu mum joweeɗiɗi, nyiɓi ndu.

²O hirsi dabbaaji maako, o jilli inaboojam maako, o waɗi nyaamduuji maako boo.

³O neli horɓe maako ewnoyaago yimɓe haa nokkuuje wuro towɗe, ɓe mbi'a:

⁴“koo moy sooyi anndal, o wara ɗo!” O ɗon wi'a humaki'en:

⁵“Ngare, nyaame nyaamdu am, njare inaboojam ɗam njillumi ɗum.

⁶Acce humakaaku, ngeeɗe, tokke laawol hakkiilo.”

⁷Mo telɓani jancoowo, mbustu heɓan ɗum. Mo feli kalluɗo, kuudi laatanto ɗum.

⁸Taa fel jancoowo, ngam taa o wanye. Fel hikmaajo, kaŋko o yiɗete.

⁹To a wolwani hikmaajo, o ɓesdan hikma. To a anndini adiliijo, o ɓesdan anndal.

¹⁰Kulol Jawmiraawo woni fuɗɗam hikma, anndugo Allah Ceniiɗo, kanjum woni hakkiilo.

¹¹To a heɓi hikma, balɗe ma ɗuuɗan, duuɓi ngeendam ma ɓesdoto.

¹²To a hikmaajo, a hikmaajo ngam hoore ma. To a jancoowo, an feere ma roondoto ɗum.

¹³Faataare woni debbo nanaro, mo walaa hakkiilo e semteende.

¹⁴O ɗon jooɗi haa dammugal suudu maako, dow koromwal haa nokkuuje wuro towɗe.

¹⁵O ɗon wi'a saalotooɓe, tokkiiɓe laawol muuɗum'en:

¹⁶“koo moy sooyi anndal, o wara haa ɗo!” O ɗon wi'a humakiijo boo:

¹⁷“Ndiyam ngujjaaɗam weli, nyaamdu nyaamaandu bee sirri weli masin.”

¹⁸Jaɓɗo ewnaandu maako anndaa ruuhuuji maayɓe ɗon ton. Koo moy nasti suudu maako, nasti joonde maayɓe.