Read Fulfulded Yimre Suleymaanu 7 Bible Online

Yimre Suleymaanu 7 - Fulfulded bible

Yimre Suleymaanu 7

¹Lorta, lorta, Sulamit, lorta, lorta haa min ndaare! Ko ndaaroton haa Sulamit bana haa wamre mooɓe ɗiɗi[5]?

²Kosɗe maaɗa mbooɗi nder paɗe, an mayramjo! Murli keeci maaɗa bana fawne, bana ko juuɗe goniijo mbaɗi.

³Non jaabuuru ma bana taasawo murlo, ngo sooyataa inaboojam uurɗam. Reedu maaɗa bana jowre alkamaari, nde taarnaama bee gurguli.

⁴Bana ciwtukoy lelwa, non enɗi ma.

⁵Daande maaɗa bana suudu nyii'e nyiibi towndu. Gite maaɗa bana beeli haa Hesbon, baŋnge dammugal Bat-Rabbim. Kine maaɗa bana suudu Libanon towndu tiitotirndu bee berniwol Damas.

⁶Hoore maaɗa ɗon nanndi bee Karmel[6], gaasa hoore maaɗa bana limce boɗeeje, haa nder girli gaasa ma laamiiɗo naŋngaama.

⁷An a ŋarniiɗo, booɗɗo boo, an giɗaaɗo, yiide ma welani yam.

⁸Tagdi ɓanndu ma bana dibinoohi, bana bukki haa maaki, non enɗi ma.

⁹Nden mi wi'i: Dibinoohi man, sey mi wa'o ki, mi naŋnga bukki maaki. Enɗi maaɗa ɗon nanndi bee bukki ɓiɓɓe inabohi, uurdi kine ma nanndi bee ɓenndalooje uurɗe.

¹⁰Inaboojam cuɓaaɗam, non hunnduko ma. Ɗam ila, ɗam nasta cir nder hunnduko giɗaaɗo am, ɗam ila haa kunnduɗe ɗaaniiɓe[7].

¹¹Giɗaaɗo am min jeyi, min ɓernde maako yenwi.

¹²War, njehen haa ladde, an giɗaaɗo am, en mbaaloya haa kawye ton.

¹³Bee fajiri en njaha nder gese inabooje, haa en ndaara to inabooje ton mbilitake, to pinndi maɓɓitake, rummaanooje boo pinniti. Ton haa gese mi hokkete yiide am.

¹⁴Ɓiɓɓe jooɗooje uuran haa kine men, ɓiɓɓe leɗɗe cuɓaaɗe ɗon haa dammuɗe men, ɓiɓɓe leɗɗe ɓennduɗe jontaaje e neeɓɗe, giɗaaɗo am, mi sigi ɗe ngam maaɗa.