Read Fulfulded Hikma 1 Bible Online

Hikma 1 - Fulfulded bible

Hikma 1

¹Onon ardiiɓe lesdi, ngiɗe adilaaku! Kuucitine numooji mon gal Jawmiraawo bee gooŋga, ɓadite mo bee ɓernde laaɓnde.

²Nonnon, ngam ɓen ɓe njarribataako mo kawran bee maako, o ɗon waŋgina hoore maako haa ɓen ɓe ngalaa seko dow maako.

³Numooji leliiɗi daaynan yimɓe bee Allah, faataaɓe jarribotooɓe mo, baawɗe maako nje'inan ɓe.

⁴Hikma nastataa nder ɓernde hallunde, ka weerataa haa neɗɗo marɗo hakke.

⁵Hikma ɗum Ruuhu Ceniiɗo jaŋnginanɗo ɓiɓɓe Aadama, ka ɗon daayto e naafikaare, ka ɗon daayto e yimɓe marɓe numooji kalluɗi, ka wanyan yeeso baɗanɗo faasikaare.

⁶Hikma yiɗi wongo hakkunde yimɓe, ka ɗon elta toonyotooɗo Allah bee boliiɗe mum. Allah ɗon laara ko woni nder teteki neɗɗo, o ɗon linya ɓernde maako, o ɗon nana ko o wi'ata fuu.

⁷Ruuhu Jawmiraawo hebbini duniyaaru, o ɗon tabitina koo ɗume fuu, ngam maajum o anndi kalimawol ngol mbi'eten fuu.

⁸To goɗɗo wolwi kalluɗum, o daɗataa, o hisataa kiita ka haandani mo.

⁹Allah linyan anniyaaji yedduɓe mo, ɓe lornanan Jawmiraawo boliiɗe maɓɓe ngam o hiito bononndaaji maɓɓe.

¹⁰Nofru Allah ɗon heɗito koo ɗume, ndu nanan koo harakaaji ɓurɗi famɗugo.

¹¹Naŋgte kunnduɗe mooɗon, kaɗe ɗemŋgal mon wolwugo bolle kalluɗe, koo kalimawol bi'aaŋgol bee sirri waɗan batte, tufleejo majjinan hoore mum.

¹²Taa ɗaɓɓite waade bee daakaareeku mon, taa pooɗane hoore mon halkere daliila kuuɗe mon kalluɗe.

¹³Annde waade iwaay haa Allah, o seyortaako nattere marɗum yoŋki fuu.

¹⁴O tagi koo ɗume fuu ngam ɗum wuura, ko o tagi haa duniyaaru fuu nafan ngeendam. Walaa tooke mbarooje nder ko o huuwi. Naa ɗum waade laamani lesdi,

¹⁵ngam waade walaa dow adiliijo.

¹⁶Yedduɓe Allah ɗon ewno waade bee kuuɗe e boliiɗe muuɗum'en. Ɓe ɗon ngelo waade ngam ɓe ɗon tammo nde soobri bee maɓɓe, ɓe ɗon kaɓɓootira alkawal bee maare. Fakat ɓe kaandani yeɓre maare.