Read Fulfulded Hikma 10 Bible Online

Hikma 10 - Fulfulded bible

Hikma 10

¹Hikma hisni tagaaɗo arano waato baabiraawo duniyaaru, yaake o ɗonno feere maako. Ɓaawoɗon, nde o do'i nder hakke, ka wurtini mo

²e ka hokki mo semmbe jaalaago tagle goɗɗe fuu.

³Ammaa goɗɗo kalluɗo daaytini hoore mum bee hikma bee ɓernuki, ɗum fooɗani mo halkere bee mbargo deerɗiiko nder mettamɓeram.

⁴Bee aybe maako, ilam tuufana ilni lesdi fuu, ammaa hikma hisni ndi. Ka ɗowi adiliijo nder koommbowal leggal tampuŋgal dow ƴuuge.

⁵Wakkati ummaatooje kawti waɗgo halleende, ɗe kiitaama ngam taa ɗe meeta faamfaamtirgo, hikma tawi adiliijo, jo'ini mo bilaa feloore haa yeeso Allah, hokki mo semmbe ɗowtanaago Allah koo nde o yiɗi ɓiyiiko.

⁶Ka hisni boo adiliijo wakkati mbareeki yimɓe yawiiɓe Allah. Ka daɗni mo haa yiite jippiiŋge dow gure jowi.

⁷En ngi'an batte nganyaandi maɓɓe: Lesdi njoorndi, ngulndi, leɗɗe ɗe ɓenndalooje ɓenndataa sam, lawru mannda ɗisaama ngam siftinorgo goɗɗo caliiɗo nuɗɗingo.

⁸Yimɓe man ndaayti bee hikma. Kanjum waɗi ɓe mbaawataa anndugo ko wooɗi. Ammaa ɓe ɗalani ummaatoore ciftinorki nginnaaku maɓɓe. Ngam man aybeeji maɓɓe ngejjitittaake.

⁹Ammaa hikma hisni huuwooɓe maaka diga sarru fuu.

¹⁰Nyannde feere adiliijo doggi haa o daɗa haaŋaare deerɗiiko. Hikma tokkini mo laawol booɗŋgol, ka holli mo laamorde Allah, ka holli mo boo kuujeeji ceniiɗi. Ka hokki mo jaalorgal nder kuugal maako naawŋgal e ka warji mo semmbe kuugal maako cowi cowi.

¹¹Nde haajooɓe ɗonno tefa zammbaago mo, ka dari haa kommbi maako, ka riskini mo.

¹²Ka faddi mo dow konne'en e ka hisni mo dow waɗananɓe mo tuufnorgol. Ka waŋgini jaalorgal maako nder haɓre saatunde. Nden o faama ɗakkotirgo bee Allah ɓuran koo ɗume.

¹³Nde ɓe coorri adiliijo, ka wudinaay mo, ka hisni mo waɗugo hakke.

¹⁴Ka jippi nder ɓunndu bee maako, ka senndiraay bee maako wakkati nde o sakkina nder daŋngay. Ka hokki mo laamu tedduŋgu, ka leestinani mo yarnuɓe mo bone. Bana nii ka holli haadanɓe mo fuu ɓe fewooɓe e ka hokki mo tedduŋgal duumiiŋgal.

¹⁵Hikma rimɗini jama'aare seniinde, ka rimɗini boo asŋgol ngol walaa aybe diga ummaatoore torrannooɗo nde.

¹⁶Ka nasti nder yoŋki kuuwananɗo Jawmiraawo, ka dari hakkunde maako e laamiiɓe nyaaɗɓe bee kaayeefiiji e hiilaaji.

¹⁷Ka hokkiti hooliiɓe Allah njoɓdi boneeji maɓɓe, ka yahri ɓe dow laawol kaayeefiwol. Ka laati ɗowdi paddanndi ɓe diga naaŋge e njayawri koode jalbitooje jemma boo.

¹⁸Ka taƴtini ɓe bee kosɗe maayo Maaliya, ka saalini ɓe hakkunde ndiyam.

¹⁹Ammaa konne'en maɓɓe kam, ndiyam moɗi ɓe, nden nder lugguɗum maayo ɗam tuuti ɓe haa fomoonde.

²⁰Adili'en ɓorti yedduɓe Allah. Ɓe teddini innde ma seniinde Jawmiraawo, ɓe kawti ɓe fuu ɓe maŋgti kisndam ɗam a hisniri ɓe bee baawɗe ma.

²¹Hikma hokkiti muuka'en wolde e ka hokki ɓikkoy pamaroy daliilaaji wolwugo laaɓɗum tal.