Read Fulfulded Hikma 11 Bible Online

Hikma 11 - Fulfulded bible

Hikma 11

¹Hikma hokki Isra'iila'en jaalorgal nder ko ɓe ngaɗi fuu barka annabiijo ceniiɗo.

²Ɓe taƴti harde hamaadaare e ɓe tiggi laymaaji maɓɓe haa babe haa goɗɗo meeɗaay saalaago ton.

³Ɓe ndarni konne'en maɓɓe, ɓe lorni wanywanyɓe maɓɓe.

⁴Isra'iila'en ɗomɗi, ɓe tori ma walliinde yaa Jawmiraawo, a ɓulnani ɓe ndiyam diga tapaare. Diga hayre saatunde ndiyam wurti, ɓe ɗomɗiti.

⁵Nii non huunde torrunde konne'en maɓɓe laatani ɓe barka, wakkati ɓe ɗon nder ɓillaare.

⁶Ngam eltugo hokkuɓe umroore wargo ɓikkoy ndanyaakoy nder jama'aare ma, a wayliti ndiyam maayo ngo hersataa bee ƴiiƴam nyidduɗam. Nden boo ndokkuɗa Isra'iila'en ndiyam ɗuuɗɗam ɗam ɓe tammaakino.

⁸Bee ɗomka ka ɓe maati, a holli ɓe no njarnirɗa konne'en maɓɓe bone.

⁹Fakat a foondi ɓe bee eltugo ɓe bee mbooɗeeŋga ngam ɓe anndita torra kaye ukkanto yedduɓe ma wakkati a hiiti ɓe bee ɓernuki.

¹⁰A foondi yimɓe ma bana baaba giɗɗo eltugo ɓiɓɓe mum. Luttuɓe boo, a dili ɓe bana laamiiɗo mo yiɗi hiitugo bilaa enɗam.

¹¹Yaake ɓe daayiiɓe malla ɓadiiɓe bee yimɓe ma, kamɓe boo ɓe njari boneeji bana maɓɓe.

¹²Mettamɓeram naŋngi ɓe: Ɓe uumi, ɓe ciftori ko waɗno ɓe.

¹³Nde ɓe paami torraaji paɗɗunooɗi ɓe laatani Isra'iila'en hayru, ɓe annditi an woni Jawmiraawo.

¹⁴Mo ɓe ngudini ɓooyma bee yerɓugo yeeso joote waade, ɓe parti mo ɓe njaanci. Haa timmoode, o hayɗini ɓe yaake ɓe maatino ɗomka feerotirka bee ka adili'en.

¹⁵Yimɓe ɓe'e ɓe halluɓe, numooji maɓɓe bilkiiji yerɓi ɓe rewgo boɗɗe ɗe ngalaa hakkiilo e rewgo dabbaaji ɗi nafataa sam. Ngam maajum Yaa Jawmiraawo, a torri ɓe bee nuldango ɓe dabbaaji ɗuuɗɗi ɗi ngalaa hakkiilo.

¹⁶Ngam haa ɓe paama goɗɗo hiitete bee ɗum o waari hakke.

¹⁷Bee juŋngo ma semmbiɗŋgo ngo tagruɗa duniyaaru pat diga huunde bilaa noonde, a waawanno ukkanaago ɓe masiibooji goɗɗi bana ɓoodi ɗuuɗɗi malla boo barooɗe kulniiɗe.

¹⁸Malla boo a waawanno tagugo irin dabbaaji kesi, nyaaɗɗi e kulniiɗi, dabbaaji tuutanɗi yiite malla caŋkitinanɗi cuurka malla gurtinanɗi diga gite maaji ma'e kulniiɗe.

¹⁹Irin dabbaaji kulniiɗi ɗi'i ngalaa haaje hongo konne'en ma haa ɗi nattina ɓe: Baŋguki maaji hulnan ɓe haa ɓe maaya.

²⁰Koo to naa non, a waawanno mbargo ɓe bee foofaaŋgo wooto, bee yooftugo kiita ma dow maɓɓe, bee wuuwugo ɓe bee foofaaŋgo ma semmbiɗŋgo. Ammaa naa non, an a taaskitini ɗum fodde poondol, limgal e teddeeŋga.

²¹A foti hollugo laamu ma maŋngu wakkati fuu, walaa mo waawataa haɓgo bee juŋngo ma semmbiɗngo?

²²Haa gite ma, teddeeŋga duniyaaru fuu ɗon bana nga jaareengel dow kilo malla bana baadel saawawre toɓannde haa lesdi fajiri.

²³Yaa Jawmiraawo, a ɗon yurmina yimɓe fuu ngam a waawi waɗgo koo ɗume. A ɗon munyani hakkeeji ɓiɓɓe Aadama ngam haa ɓe tuuba.

²⁴A yiɗi tagle fuu, a wanyata ko tagɗa. To a wanyanno koo ɗume, a tagataano ɗum.

²⁵Noy huunde neeɓrata to a yiɗaano? Noy nde yeeɗirta to a tagaay nde?

²⁶A ɗon hisna tagle ma fuu ngam an mari ɗe, an Jawmiraawo giɗɗo ngeendam.