Read Fulfulded Hikma 12 Bible Online

Hikma 12 - Fulfulded bible

Hikma 12

¹Fakat, Ruuhu ma duumiiɗo ɗon nder tagle fuu.

²Ngam maajum a ɗon fela waɗɓe hakke bee hakkiilo. A ɗon barro ɓe, a ɗon siftinora ɓe hakke maɓɓe, ngam ɓe acca halleende, ɓe nuɗɗine an, yaa Jawmiraawo.

³Bana nii kuuwɗa bee yimɓe jooɗiiɓe haa lesdi ceniindi ɓooyma.

⁴A wanyi ɓe ngam kuuɗe maɓɓe kalluɗe. Ɓe ɗonno kuuwda bee mistiraaku e saafi e kuuɗe nyidduɗe.

⁵Ɓe ɗonno kirsa ɓikkoy bilaa enɗam sam, ɓe ɗonno nyaama kusel ɓii-Aadama bee ƴiiƴam e teteki mum. Yimɓe man tawraama nder defe muuɗum'en nyidduɗe.

⁶A waɗi anniya mbargo saaro'en mbarooɓe ɓikkoy muuɗum'en bee juŋngo kaakiraaɓe amin.

⁷A yiɗno lesdi ndi ɓurɗa yiɗgo jaɓɓo yimɓe hesɓe, ɓiɓɓe Allah he'iiɓe jooɗaago ton.

⁸Ammaa kamɓe boo, a enɗi ɓe ngam ɓe ɓiɓɓe Aadama. A nuldi jabatti yeeso honooɓe ma haa ɗi mbara ɓe seɗɗa seɗɗa.

⁹Fakat, haa konu a waawanno hokkititgo yedduɓe haa juuɗe adili'en ma malla boo a foti halkugo ɓe bee dabbaaji kulniiɗi nde woore malla boo bee wolde ma nde walaa enɗam.

¹⁰A waɗi kiita ma bee hakkiilo ngam haa ndokka ɓe daliila tuubugo. Koo to a anndino tagaadi maɓɓe kallundi e ɓe halluɓe diga danyeeki maɓɓe, ɓe cannjataa numooji maɓɓe sam.

¹¹Ngam ɗum asŋgol naalaaŋgol diga fuɗɗam. Naa ngam a huli goɗɗo, a hiitaaki hakkeeji maɓɓe.

¹²Moy foti ƴamgo ma ko kuuwɗa malla waabo kiita ma? Moy foti wullaago ma ngam a nattini ummaatooje ɗe tagɗa? Moy foti yahdugo bee ma yeeso kiita haa o jiŋnga halluɓe?

¹³Walaa deweteeɗo feere sey an, an tan cuklanoowo kuuje pat, walaa goɗɗo mo kollata no kiita ma gooŋɗiri.

¹⁴Walaa laamiiɗo malla toonyoowo foti dartanaago ma e jiŋngugo yimɓe ɓe a hiiti.

¹⁵A adiliijo, yaa Jawmiraawo, ngam maajum a ɗon ɗowa duniyaaru bee adilaaku. Haɓɓugo goɗɗo mo haanaay torreego, ɗum yahdaay bee baawɗe ma.

¹⁶Semmbe ma woni seeɓoore adilaaku maaɗa, nde nii a Jawmu kuuje fuu, a booɗɗo heedi koo moy fuu.

¹⁷A ɗon holla semmbe maaɗa dow sekanɓe baawɗe ma mawɗe, a ɗon maɓɓa hunnduko mantotooɓe anndititɓe baawɗe ma.

¹⁸An boo yaa Jawmiraawo marɗo semmbe, a ɗon hiito bee enɗam, a ɗon ardi min hakkiilo hakkiilo, ngam ko a yiɗi waɗgo fuu waɗoto.

¹⁹Bee waɗgo bana nii a ekkitini ummaatoore maaɗa no adiliijo hollirta yimɓe enɗam. A hokki ɓikkoy maaɗa tammunde bee accango ɓe laawol tuubugo.

²⁰Bee munyal ɗuuɗŋgal a hiiti konne'en ɓikkoy ma, koo to maayde haandanino ɓe. A yiɗno hokkugo ɓe wakkati e daliila accugo halleende.

²¹A hiiti yimɓe ma ɓe a hakkilani jamum, an kaɓɓuɗo alkawal bee tammunde barkaaji ɗuuɗɗi bee kaakiraaɓe maɓɓe.

²²Koo nde a ɗon fiya konne'en amin bee dabareeji ɗuuɗɗi, minin boo a ɗon ekkitina min no min ciftora mbooɗeeŋga ma to min ɗon kiita woɗɓe e min tammoro enɗam maaɗa, to a ɗon hiito min.

²³Ngam maajum a torri wonɓe nder nginnaaku maɓɓe, yeeɗanɓe bana heefeerɓe. A torri ɓe bee tagle nyidduɗe ɗe ɓe ndewata.

²⁴Ɓe eeri daayiiɗum jamum dow laawol majjere haa ɓe ewni ɗowanteeɓe dabbaaji ɓurɓe nyiddugo e hallugo, ɓe kiilaama bana ɓikkoy koy ngalaa hakkiilo.

²⁵Nden kam, bana ɓikkoy koy ngalaa hakkiilo, a ukkani ɓe masiibo ngam jancugo ɓe.

²⁶Ammaa nde ɓe kakkilanaay torraaji ɗi'i ngam ɗi koyɗi, ɓe ngiidi bee kiita iwka diga Allah.

²⁷Dabbaaji torri ɓe, ɗi njarni ɓe bone, dabbaaji ɗi ɓe ndewi torri ɓe. Nden gite maɓɓe maɓɓiti, ɓe annditi Allah bee gooŋga mo ɓe calino anndititgo. Ngam maajum torra makka ukki dow maɓɓe.