Read Fulfulded Hikma 13 Bible Online

Hikma 13 - Fulfulded bible

Hikma 13

¹Yimɓe saliiɓe nuɗɗingo Allah fuu ɓe faataaɓe. Ɓe cuklani risku maɓɓe haa ɓe mbaawaay anndugo mo ɗon, ɓe ndaari kuuɗe maako ammaa ɓe annditaay tagɗo kuuje ɗe'e fuu.

²Ammaa ko ɓe ndaari bana ɗowanteeɓe ardaniiɓe duniyaaru, ɗum yiite, henndu, duluuji, burjuuji, ndiyam cemmbiɗɗam malla boo naaŋge e lewru.

³To ŋarol tagle jarribi ɓe haa ɓe ndaari ɗe bana ɗowanteeɓe, haani ɓe paamano jawmu tagle ɓuran ɗe ngam kaŋko tagi ɗe, haa maako ŋarol fuu iwi.

⁴To baawɗe e kuuɗe labbi deweteeɗi njarribi ɓe, haani ɓe paamano tagɗo ɗi ɓuran ɗi semmbe.

⁵Ngam bee numgo dow maŋngu e ŋarol tagle, en mbaawan faamgo noy tagɗo ɗe wa'i.

⁶Ammaa taa pelen ɓe jamum, teema ɓe ngiɗno ɗakkotirgo bee Allah haa ɓe keɓta mo bee gooŋga, nden ɓe eeri.

⁷Nde tagle maako taari ɓe, ɓe ndaartidi ɗe booɗɗum. Ɓe njarribaama bee tagdi maaje, ngam ko ɓe ndaari wooɗi jamum.

⁸Koo non fuu, ɓe ngalaa hujja.

⁹Nde ɓe keɓi annde seɗɗa deydey no ɓe paamra sirriiji duniyaaru, koni ɓe keɓtaay Jawmu tagle ɗe ɓe ndaari law?

¹⁰Ammaa bone laatanto yurumɓe waɗɓe tammunde muuɗum'en dow kuuje ɗe ngalaa ngeendam! Ɓe ɗon ewno Allah kuuje ɗe yimɓe ngaɗi, kuuje tappaaɗe e kaŋŋeeri e cardi, suura dabbaaji, kaa'e meereeje cuurɗinaaɗe diga ɓooyma.

¹¹Ndaa misaalu pe'oowo leɗɗe: O fe'i leggal koyŋgal roondeego, o ɓolti seɓre maagal, o sehi ngal bee tiinaare, o wartiri ngal huunde huuwtinirteende tum tum.

¹²Leggal luttuŋgal, o defri ngal, o nyaami haa o haari.

¹³Haa yeɓre luttuŋgal ngal nafataa, leeliiŋgal e marŋgal kuuduuje, o hooca o ta'a ngal haa o fijira, o seha ngal bee hakkiilo, o nanndina ngal bee suura goɗɗo

¹⁴malla bee suura ndabbaawa, o mo'itina ngal, o woojina ngal fuu e o suuɗa kuuduuje maagal.

¹⁵Nde o heɓani ngal babal booɗŋgal, o ɓaaro ngal dow mahol, o tappa ngal bee suufuure.

¹⁶O hakkilan taa ngal do'o ngam o anndi leggal nga'al ngal waawataa daraago feere maagal, ɗum lawru marndu haaje tigeego.

¹⁷Ammaa to o yiɗi toraago ngam mardi maako malla ngam teegal maako malla ngam ɓikkoy maako, o semtataa tiitaago leggal ngal walaa ngeendam. O toroto njamu haa ɗum ko walaa semmbe,

¹⁸o toroto ngeendam haa ɗum ko walaa yoŋki. To o mari haaje walliinde, o toroto ɗum ko walaa dabare e ngam jahaale maako, o toro ɗum ko waawataa yahgo koo yaaɓannde.

¹⁹Haa ragare, ngam heɓgo riba maako, yahrugo kuuɗe maako yeeso e heɓgo nasaraaku haa kuugal maako, o toroto semmbe haa ɗum ko walaa semmbe.