Read Fulfulded Hikma 14 Bible Online

Hikma 14 - Fulfulded bible

Hikma 14

¹Ndaa misaalu feere boo: Goɗɗo feere yiɗi waɗgo jahaaŋgal. O nasti koommbowal ngam taƴtugo ƴuuge cemmbiɗɗe. O toroto walliinde haa leggal ngal ɓuri tampugo dow koommbowal jahranŋgal mo.

²Goɗɗo yiɗno koommbowal man ngam haa o naftoro. Cehoowo sehani mo ngal.

³Ammaa ɗum ballal ma, Baabiraawo, laanyata ngal. An taaskani mo laawol dow ndiyam, laawol koolɗiniiŋgol caka ƴuuge.

⁴A holli no a waawan hisnugo goɗɗo diga joote, koo to goɗɗo woowaay nastugo maayo.

⁵A yiɗi kuuɗe kuuwaaɗe bee hikma maaɗa nafa. Kanjum waɗi yimɓe mbaawan hoolaago ngeendam muuɗum'en haa leggel pamarel, ɓe taƴta ƴuuge ndiyamji nder koommbowal jam saliiman.

⁶Nii non ɗum laati nder zamanuuji ɓooymaaji nde maapinndi'en mawnitiiɓe fuu nattinaama. Tammunde duniyaaru suuɗi haa koommbowal pamaral ngal juŋngo ma ɗowi, ɗali dow lesdi aawdi yidere hesre.

⁷Barka woodani leggal baɗanŋgal muuyo maaɗa!

⁸Naaloore woodani lawru e baɗɗo ndu. Kaŋko, ngam o waɗi ndu, kayru boo ngam ɓe ewni ndu Allah.

⁹Ngam Allah wanyi geddo e geddal mum,

¹⁰o hiitan huunde sehaande e cehɗo ɗum.

¹¹Nii non Allah hiitorto labbi yedduɓe, ngam koo ɗi ɗon caka kuuje ɗe o tagi, ɗi laati nyidduɗi haa yeeso maako. Ɗi ɗon majjina ɓiɓɓe Aadama, ɗi laati tuufnorgol haa kosɗe faataaɓe.

¹²Bee numo sehgo labbi, non yeddugo Allah fuɗɗiri. Baŋguki maaji wonni ngeendam yimɓe.

¹³Ɗi ngalaano haa fuɗɗam e ɗi tawataake haa ragare.

¹⁴Ɗi nastiri duniyaaru bee aybe mawnitaare yimɓe, kanjum waɗi ragare maaji neeɓataa.

¹⁵Baaba cuniiɗo bee maayde ɓiŋngel mum juujuure waɗi suura ɓiŋngel ngel koocaaŋgel bee juhuki. Nii non o foondi rewgo maayɗo man bana dewanɗo Allah, o ɗalani yimɓe maako al'aadaaji e kuuɗe cuuɗiiɗe.

¹⁶Nde wakkati juuti, al'aadaaji tabiti, ɗi koociraama bana umroore. Nii no yimɓe ndewri labbi dow umroore laamiiɓe.

¹⁷Nde ɓe mbaawataa rewgo ɗi ngam ɗi daayiiɗi, ɓe cehi ko nanndi bee maaji, ɓe ngaɗi suura mbaŋginanka jaati laamiiɗo ngam rewgo mo bana to o ɗon caka maɓɓe.

¹⁸Koo haa ɓen ɓe anndaa dewal nga'al, suuno cehoowo lawru yaajini ɗum.

¹⁹Kaŋko kam, o yiɗno seynugo laamiiɗo. Ngam man o huuwtiniri anndal maako fuu ngam o waɗa suura mbooɗka ɓurka laamiiɗo.

²⁰Yimɓe ngerdi mbooɗirka kuugal man, haa ɗum yerɓi rewgo goɗɗo mo ɓe korminno ɗum naane.

²¹Ɗum tuufnorgol mbaranŋgol ɓiɓɓe Aadama, ngam sarru malla laamu torri ɓe, ɓe takkani kuuje kuuwraaɗe bee kaa'e malla bee leɗɗe innde nde Allah feere mum mari.

²²Yimɓe sakli ko'e muuɗum'en dow anndal Allah. Ɓe ɗon fahin nder kaɓe caatuɗe ɗe sooynde faamu maɓɓe nastini ɓe, ɓe ndokki innde jam haa kuuɗe maɓɓe kalluɗe.

²³Ɓe lii'an ɓikkoy maɓɓe ngam dewal, ɓe kuuwan al'aadaaji cuuɗiiɗi, ɓe ndokkan ko'e maɓɓe haa pijirle kalluɗe, ɗe paamataake.

²⁴Ɓe kakkilantaa ngeendam ɓiɓɓe Aadama e teegal laaɓŋgal boo. Goɗɗo mbaran goɗɗo bee faasikaare malla o suna mo bee waɗgo njeenu bee debbo maako.

²⁵Jiiɓru maŋngu waɗi: Dufki ƴiiƴam, mbar-hoore, nguyka, rikici, rusiya, faasikaare, tuurtol, seedaago pewe,

²⁶toonyaare heedi adili'en, ngettaru, bonnuki ɗabiyaaji booɗɗi, luuɗu, fitina nder teegal, njeenu e daakaareeku.

²⁷Dewal labbi ɗi ngalaa inɗe, ɗum fuɗɗam kalluɗum fuu. Kanjum woni daliila e timmoode maagal boo.

²⁸Rewanɓe labbi kalki ko'e muuɗum'en nder seyo fantuŋgo, ɓe ɗon mbaɗa annabaakuuji pewooji. Ɓe ɗon ngeeɗa ngeendam leeliiɗam, ɓe ɗon ngewa alkawal bilaa numgo.

²⁹Nde ɓe kooli labbi ɗi ngalaa yoŋki, ɓe tammi ɓe njoɓnataake dow kunayeeje maɓɓe pewooje.

³⁰Ammaa kiita naŋngan ɓe ngam daliilaaji ɗiɗi: Aran ngam ɓe numaay gooŋga dow Allah, ammaa ɓe ɗowtani labbi, ɗiɗi boo ngam ɓe njawi ceniiɗum bee waɗgo rikici e kunayeeje pewooje.

³¹Koo to ɓe kulataa baawɗe labbi ɗi ɓe kunori, kiita do'anka hakke'en do'an ɓe kamɓe ngam foroy kiita do'an waɗɓe irin halleende man.