Read Fulfulded Hikma 15 Bible Online

Hikma 15 - Fulfulded bible

Hikma 15

¹Ammaa an Allah amin, a booɗɗo, gooŋgaajo, munyɗo, a ɗon laamani koo ɗume bee enɗam.

²Koo to min ngaɗi hakke, min ɗon ngondi bee maaɗa, ngam min annditi laamu ma. Ammaa nde min anndi a limi min bana yimɓe ma, min mbaɗataa hakke.

³Nii non, anndugo ma, ɗum caɓɓawal yahdu timmididndu, faamgo baawɗe ma yahran haa ngeendam nduumiiɗam.

⁴Min accaay kuuɗe ɓiɓɓe Aadama malla kuuɗe meereeje ɗe waɗooɓe suura ka noone feere-feere majjina min.

⁵Yi'go kuuɗe ɗe'e umminan welwelo faataaɓe, hebbinan ɓe yiide ngam suura maayɗo, suura ka dimmbataako boo.

⁶Sehooɓe labbi, yiɗanɓe ɗi malla boo sujidanɓe ɗi, ɓe fuu ɓe ngiɗi kalluɗum, ɓe warjeteeɓe fodde ko ɓe ndeenata.

⁷Ndaa mahoowo payanɗe jiiɓi loope bee bone. O mahi kuuje ɗuuɗɗe ɗe kuuwtinirten tum. Bee loope man ɗen e bee laawol gootol o maha kuuwtinirɗe ngam kuuɗe marɗe saman e ngam kuuɗe boowaaɗe boo. Ammaa ɗum mahoowo payanɗe wi'ata no ɗum huuwtinirte.

⁸Ɓaawo man fahin o huuwan kuugal ngal faamataake: Bee loope man ɗen, o maha deweteeɗo kalluɗo. O waɗan ɗum, kaŋko gurtiiɗo diga lesdi neeɓaay, o loroto haa lesdi ndi o wurti e mum yaake ɓe ƴamtoyta mo yoŋki ki ɓe nguƴi mo.

⁹Ammaa o suklantaa ngeendam maako ndammuɗam, o tammi maaygo yeeso seɗɗa. O yiɗi foondugo hoore maako bee huuwanɓe kaŋŋeeri e cardi, nyemmbitgo ɓolinooɓe njamndi mboɗeeri. O tammi o heɓan daraja to o sehi kuuje pewooje.

¹⁰Ɓernde maako laati bana ndoondi non, sollaare lesdi ɓuri tammunde maako saman e ngeendam maako yottaay coggu loope.

¹¹Ngam o yejjiti tagɗo mo, nastinɗo nder maako nafsu marɗo semmbe, dokkuɗo mo ruuhu geeɗinoowo.

¹²O tammi ngeendam meeɗen ɗum fijirde e yeeɗugo boo ɗum luumo ngam heɓgo ceede ɗuuɗɗe. Haa maako sey neɗɗo naftora koo ɗume fuu koo kalluɗum boo.

¹³Goɗɗo oo ɓuran yimɓe fuu faamgo o aybuɗo bee mahgo bee loofre woore payanɗe pusooje e labbi.

¹⁴Ammaa Yaa Jawmiraawo, konne'en jama'aare ma, yarnunooɓe nde bone ɓooyma, laatake faataaɓe, famɗa-hakkiilo'en ko tulli ɓikkoy pamaroy.

¹⁵Ɓe ndarni bana ɗowanteeɓe labbi jama'aaje fuu. Labbi ɗi'i ngoodi gite ammaa ɗi ngi'ataa, ɗi ngoodi kine ammaa ɗi poofataa, ɗi ngoodi noppi ammaa ɗi nanataa, ɗi ngoodi kooli ammaa ɗi meemataa koo ɗume, ɗi ngoodi kosɗe ammaa ɗi njahataa.

¹⁶Ngam ɗum goɗɗo waɗi ɗi, mahɗo ɗi ɗum goɗɗo mo Allah wuƴi ɗum yoŋki. Ammaa walaa innu waawata mahgo ko nanndi bee Allah.

¹⁷O maayoowo bee juuɗe maako ɗe o waari kalluɗum, ko o waɗata fuu ɗum kuugal baatŋgal. Kaŋko maa o ɓuran ko o rewata piw ngam kaŋko kam o yeeɗan wakkati seɗɗa ammaa kanji ɗi meeɗataa margo yoŋki.

¹⁸Yimɓe man ɗon ndewa dabbaaji nyidduɗi, dabbaaji ɓurdanndi luttuɗi bee sooynde hakkiilo.

¹⁹Walaa alaama ŋarol haa maaji, walaa ko waɗata ɗi ngiɗe bana dabbaaji feere. Ɗi keɓaay yerduye e barkaaji Allah.