Read Fulfulded Hikma 16 Bible Online

Hikma 16 - Fulfulded bible

Hikma 16

¹Kanjum waɗi rewooɓe dabbaaji go, dabbaaji goɗɗi torri ɓe bana no ɗum haandani ɓe, koowoowe ɗuuɗɗe njarni ɓe bone.

²Ammaa yimɓe jama'aare ma kam, a hisni ɓe torra, a hokki ɓe barkaaji, a hoynani ɓe weelo, a taaskitani ɓe nyaamdu welndu waato kusel gerle.

³Nii non konne'en maaɗa weelaaɓe mbaawaay nyaamgo daliila nyiddeeŋga dabbaaji nuldaaɗi dow maɓɓe. Ammaa yimɓe ma, ɓaawo maatugo dolo, ɓe keɓi nyaamdu welndu.

⁴Sey toonyotooɓe ngiida bee weelo saatuŋgo ngam ngo anndina jama'aare ma no konne'en maare torrete.

⁵Fakat dabbaaji kulniiɗi kippino yimɓe jama'aare ma, ɗuuɗɓe maayi ɓaawo boɗɗe kalluɗe ŋati ɓe. Ammaa ɓernuki ma nattinaay ɓe fuu.

⁶Ngam haa reentingo ɓe, a hulni ɓe wakkati seɗɗa. Ɓaawo man, a hokki ɓe alaama kisndam ngam ɓe ciftora umrooje maaɗa.

⁷Gaylitiiɗo gal alaama go heɓi kisndam, naa bee huunde nde o laari hisni mo ammaa ngam o laari ma, an kisnoowo ɓiɓɓe Aadama fuu.

⁸Bana nii a holli konne'en amin no an rimɗinta diga kalluɗum fuu.

⁹Ŋatanɗe baɓɓatti e cufi mbari ɓe, ɓe keɓaay kurgun ngam ɗum haandi kuuje ɗe'e ŋata ɓe.

¹⁰Ɓiɓɓe ma kam, koo boɗɗe marɗe tooke mbaawataa naawnugo ɓe ngam nder mbooɗeeŋga ma a walli ɓe, a yamɗitini ɓe.

¹¹Ŋatanɗe ɗe'e ciftinoranno ɓe umrooje maaɗa ammaa a hisni ɓe law ngam taa ɓe ngejjita, taa ɓe ɗawe mbooɗeeŋga ma.

¹²Ɓe keɓti njamu maɓɓe naa bee leɗɗe malla bee nebbam ngujorɗam ammaa bee wolde ma Jawmiraawo, yamɗitinannde koo ɗume fuu.

¹³Ngam an mari baawɗe dow ngeendam e dow waade. An jippinta haa joonde maayɓe e an wa'itinta boo.

¹⁴Bee nganyaandi, fakat goɗɗo foti mbara, ammaa o waawataa wartirgo yoŋki gurtiiki malla rimɗingo nafsu haa joonde maayɓe.

¹⁵Walaa baawanɗo daɗgo baawɗe ma.

¹⁶Nii non a faɗɗi bee juŋngo ma semmbiɗŋgo rewooɓe labbi saliiɓe anndititgo ma. Waabiliire, mallimallooje e henndu semmbiɗndu kippi ɓe, yiite nattini ɓe.

¹⁷Ndaa ko ɓuri hayɗingo fahin: Yiite ɗon ɓurta wulgo nder ndiyam, alhaali boo kanjam nyifata koo ɗume fuu! Ngam tagefo ɗon haɓana adili'en!

¹⁸Haa wakkatiiji feere, ɗemɗe yiite ɗonno usto ngam taa ɗe ngula dabbaaji nulaaɗi kaɓanɗi bee konne'en ma yaa Allah e ngam haa kolla ɓe kiita ma tokkoto ɓe.

¹⁹Ammaa wakkatiiji feere boo yiite go ɗon wula koo haa caka ndiyam bee semmbe, nge wonna ƴaamle lesdi naalaandi.

²⁰Ammaa a hokki jama'aare ma nyaamdu malaa'ika'en bilaa waɗgo koo ɗume, a nuldani ɓe diga asama tamseeje defaaɗe dakamje e ittanɗe suuno e giɗaaɗi koo moy.

²¹Nyaamdu iwndu diga maaɗa ndu'u holli enɗam ma dow ɓikkoy maaɗa. Ndu ɗon fottana koo moy to ɗon nyaama, ndu ɗon yahda bee ko koo moy yiɗi.

²²Koo to ndu nanndi mallimallooje malla saawawre, yiite wulataa ndu e ndu yoosataa. Ummaatoore ma faamanno bana noy yiite nyaamri ƴaamle konne'en, bana noy nge jaɓi, nge ma'i koo caka waabiliire nde mallimallooje e ndiyam.

²³E nii non boo, yiite ngen ɗon usto to wakkati adili'en ma mari haaje nyaamdu.

²⁴Tagefo ɗon taaski haa huuwane, an tagoowo oo fuu mo ɗon saati ngam torrugo halluɓe, mo ɗon feewta ngam waɗango hooliiɓe ma ko wooɗi.

²⁵Kanjum waɗi tagefo jaɓi sannjeego, huuwani caahu iwŋgu diga ma, caahu ngu'u nyaamnan yimɓe fuu deydey haaje maɓɓe.

²⁶Ndaa ko ɓikkoy ma ngiɗaakoy ekkitanno, Jawmiraawo: Naa fuɗnugo ƴaamle nyaamnata ɓiɓɓe Aadama, ammaa ɗum wolde ma jogiinde yoŋki nuɗɗinɓe ma.

²⁷Nyaamdu ndu'u ndu yiite wulataa, nguleeŋga naaŋge he'ino yoosingo ndu.

²⁸A yiɗno ekkitingo min no haani min ummo hiddeko naaŋge fuɗa ngam haa min ngette e min toro ma hiddeko weeta.

²⁹Ammaa tammunde gettaro yoosan bana saawawre yaake peewol, nde simtan bana ndiyam ɗam nafataa.