Read Fulfulded Hikma 17 Bible Online

Hikma 17 - Fulfulded bible

Hikma 17

¹Yaa Jawmiraawo, kiitaaji ma ɗi mawɗi e caɗɗi faameego! Kanjum waɗi jaahili'en fuu majji.

²Nder nganyaandi maɓɓe, ɓe tammino laamanaago jama'aare ma seniinde, ɓe ngarti naŋngaaɓe nyiɓre, naŋngaaɓe nder jemmaare juutnde, maɓɓaaɓe nder calaaje maɓɓe, ɓe ndeppi, ɓe mbaali, ɓe keɓaay yiide ma duumiinde.

³Ɓe tammino aybeeji maɓɓe cuuɗiiɗi mbaŋgataako, ɗi cuuɗete bee wiirndallo tekkungo ngo gejjol. Gooŋga kam, ɓe caŋkitaama, ɓe njollaama nder kultoreeŋgol kulniiŋgol e ɓe sakliiɓe bee koyɗi kulniiɗi.

⁴Koo nder luŋnguuji ɗi ɓe cuuɗi, ɓe kisaay hultorgo, harakaaji kulniiɗi taari ɓe, ginnaaji nyidduɗi bee geese kulniiɗe mbaŋgani ɓe.

⁵Walaa yiite marŋge semmbe ngam haa yaynana ɓe, jayŋgol koode jalbitanŋgol he'aay sekgo jemmaare hulniinde nde'e.

⁶Sey yiite huɓɓanŋge feere mum waŋgani ɓe, hulni ɓe boo. To yiite man majjiti, kultoreeŋgol maɓɓe tullitan dow ko ɓe ngi'ata.

⁷Kuuɗe saafi'en mbaawaay nyifgo nge, laamlaamreeku maɓɓe margo anndal semtini ɓe.

⁸Ɓe ɗonno mbi'a ɓe mbaawan fartugo ko hulnata yimɓe nyawɓe. Alhaali boo kamɓe man maa nyawu kultoreeŋgol man naŋngi ɓe, ɗum jalniiɗum!

⁹Koo to walaa daliila hultorgo, saalaago dabbaaji e luuƴaali boɗɗe ke'i hulnugo ɓe.

¹⁰Ɓe ɗonno kultori kultoreeŋgol kulniiŋgol, ɓe kulanno koo maɓɓititgo gite maɓɓe nder nyiɓre, walaa no ɓe ndoggira.

¹¹Fakat, halluɓe ɗon mbaŋgina ɓe ngalaa cuusal, ɓe ɗon kiita ko'e maɓɓe. Numo ɓerɗe maɓɓe ɗon aybina ɓe, sey caɗeele tan ɓe ngi'ata.

¹²Kulol, ɗum saalaago walliinde iwnde diga ella.

¹³To ɓe tammoraaki ella, ɓe ɓurtan torreego ngam ɓe anndaa daliila torra maɓɓe.

¹⁴Jemmaare man nden, koo ngam nde walaa baawɗe, nde wurti diga nder joonde maayɓe. Kayre boo walaa baawɗe, yimɓe ɓe'e ɗonno ɗoyɗi ɗi mbelanaay ɓe.

¹⁵Ɓe ɗon ngi'a ginnaaji kulniiɗi ɗon tokki ɓe, ɓe ngalaa semmbe dimmbaago ngam kultoreeŋgol ngol ɓe tammaakino juhi ɓe.

¹⁶Nii non, wonɓe ton fuu ɗonno ndo'o haa lesdi, ɓe ɗon bana maɓɓaaɓe nder suudu daŋngay ndu walaa faaɓru.

¹⁷Demoowo, gaynaako, leeburaajo cuklaniiɗo kuuɗe caatuɗe haa kaywe, ɓe fuu masiibo gooto ukkani ɓe, walaa dabare daɗgo azal mum.

¹⁸Ɓe fuu ɓe ɗon nder kaɓɓorgol gootol, ngol nyiɓre. Harakayel ko ngele ɗonno hulna ɓe: Henndu to wifi, gimi colli belɗi nder leɗɗe cukkuɗe, ilam,

¹⁹kaa'e tallaaɗe bee semmbe, diwdiwnugo kuuje laɗɗe, kirbaali dabbaaji laɗɗe kalluɗi malla haraka lortotooka nder kooseeje.

²⁰Koo toy fuu duniyaaru yaynaama bee jayŋgol ɗelkanŋgol, koo moy ɗon suklani cukle mum bee feecaare.

²¹Dow maɓɓe tan, jemmaare teddunde ɗon hippi, misaalu nyiɓre luggunde saawan ɓe nyalaade maayde maɓɓe. Kultoreeŋgol maɓɓe tullan nyiɓre teddugo dow maɓɓe.