Read Fulfulded Hikma 18 Bible Online

Hikma 18 - Fulfulded bible

Hikma 18

¹Wakkati man jayŋgol jalbitanŋgol yaynani seniiɓe ma. Konne'en maɓɓe ɗon nana daaɗe maɓɓe ammaa ɓe mbaawataa laargo ɓe, ɓe ɗon mbi'a ɓe: Seyo woodani ɓe ngam ɓe torraaki bana maɓɓe.

²Ɓe ngettino seniiɓe ma nde ɓe mbaataaki toonyaaŋge nge ɓe toonyi ɓe, ɓe ɗon ƴama ɓe yaafuye ngam ɓe laatino konne'en maɓɓe.

³Mbattudi nyiɓre, a hokki yimɓe ma daŋraŋgal yiite ngam hollugo ɓe laabi ɗi ɓe anndaano. Ngal ɗon bana naaŋge, ngal ɗon ɗofta ɓe nder jahaaŋgal maɓɓe marŋgal tedduŋgal.

⁴Luttuɓe boo ke'i haɗeego jayŋgol e ke'i jo'ineego nder daŋngay nyiɓre, ngam kamɓe boo ɓe maɓɓunooɓe ɓikkoy ma. Alhaali gal maakoy njayawri umroore nduumiindi hokkete duniyaaru.

⁵Konne'en yimɓe ma kaɓɓi anniya mbargo ɓikkoy adili'en keccoy, sey ɓiŋngel gootel daɗi yeeso joote maayde. Ngam hiitaago ɓe, a hoosi ɓikkoy maɓɓe ɗuuɗkoy e kamɓe man boo, a yollidi ɓe fuu nder ndiyam maayo.

⁶Ammaa a maatini kaakiraaɓe amin ko saaloto nder jemmaare man ngam haa ɓe ceyo ngam ɓe anndita fakat alkawal ngal ɓe alkotiri tabiti.

⁷Jama'aare ma anndi no jemmaare nde'e waddanan adili'en kisndam e halkere boo haa konne'en maɓɓe.

⁸Nii non, kuuwtinirɗa dabareeji gooti ngam hiitaago konne'en amin e ngam teddingo min bee ewnaago min haa maaɗa.

⁹Ɓiɓɓe ummaatoore ma seniinde ndokki sadakaaji bee sirri, ɓe narri ngam ɗowtanaago umroore ma umrannde hooliiɓe fuu kawta nder ko wooɗi e nder joote. Ɓe ɗonno ngima gime maŋgtooje.

¹⁰Gookaali konne'en maɓɓe ɗonno nane e koo toy fuu ɓe ɗon nana gookaali woyanɓe ɓikkoy muuɗum'en.

¹¹Sarru ngootu ukkani suka e jawmum fuu, naawɗum gootum ukkani maccuɗo e laamiiɗo.

¹²Ɓe fuu, ɓe ɗon mari maayɓe ɗuuɗɓe, limataako, maayraaɓe waade woore. Luttuɓe ke'ataa uwgo ɓe, ngam ɓiɓɓe maɓɓe yiɗaaɓe maayi wakkatiire woore.

¹³Yimɓe man cali barreego ngam daliila saafiiji muuɗum'en. Ammaa ɓaawoɗon, nde afɓe maɓɓe maayi, ɓe annditi ummaatoore nde'e woni ɓii Allah.

¹⁴Caka jemma jam e de'eende tabiti koo toy fuu.

¹⁵Tippungel, wolde ma teddunde iwi diga asama, diga koromwal laamu ma, bana konoowo mo walaa enɗam, nde yaawɗi caka wuro naalaango ngo'o,

¹⁶nde ɓaŋgti hoddiroore ma bana kaafahi belki. Hoore maaki ɗon meema asama e kosɗe maaki ɗon haa lesdi, ki nasti haɓre e ki mbari yimɓe koo toy fuu.

¹⁷Nden yimɓe koyɗi koyɗi kulniiɗi, ɓe kultori kultoreeŋgol caatuŋgol.

¹⁸Ɓe ndo'i bana maayɓe, ɓe anndini daliila maayde maɓɓe.

¹⁹Koyɗi kulniiɗi ɓe mbaŋginani ɗum ngam taa ɓe maaya bilaa anndugo daliila masiibo maɓɓe.

²⁰Adili'en boo ngiidi bee waade. Haa ladde hamaadaare, masiibo nattinoowo feere mbari ɗuuɗɓe caka maɓɓe. Ammaa ɓernuki ma neeɓaay Jawmiraawo.

²¹Ngam goɗɗo timmuɗo yaawi hisnugo ɓe: O hooci balmi limanku maako waato tornde e dokkal uurdi ngam heɓugo yaafuye hakkeeji. O dartani ɓernuki ma, o darni masiibo ngam hollugo o kuuwanoowo ma.

²²O haɓdi o jaali ɓernuki ma, ammaa naa bee semmbe malla boo bee balmi: Bee wolde o darniri kebbinanɗo kiita ma, o siftori alkawal ngal a haɓɓi bee kaakiraaɓe amin.

²³Maayɓe ɗon njowndindiri goɗɗo dow goɗɗo, o dari hakkunde waade e ummaatoore, o darni masiibo, o ta'i laawol jahranŋgol masiibo man haa yeeɗɓe.

²⁴Duniyaaru fuu hollaama dow jibbeere maako juutnde. Inɗe tedduɗe ɗe kaakiraaɓe Isra'iila ɗonno cuurɗini dow sasɓuuji kaa'e marɗe saman nayi ɗi o ɓorni, alaama laamu ɗon takki dow meetaleewol maako tedduŋgol.

²⁵Nde mbaroowo laari ɗum, o hultori, o lorti. Fakat a yiɗno waŋginango jama'aare ma ɓernuki ma e ɗum he'ino.