Read Fulfulded Hikma 19 Bible Online

Hikma 19 - Fulfulded bible

Hikma 19

¹Ammaa konne'en ngiidi bee ɓernuki ma caatuki haa ragare. A anndino ko ɓe ngiɗi waɗgo.

²A anndino konne'en ɗalanno jama'aare ma dilla e ɓe njaɓɓitanno ɓe bee jaawɗum, ammaa ɓe paasitan, ɓe taasnan ɓe.

³Ngam wakkati ɓe ɗonno nder maayiti, ɓe ɗonno mboya les genaale maayɓe maɓɓe. Nden ɓe kooci anniya kesa, cakliika, ɓe taasni dogganɓe ɓe koo nde ɓe torino ɓe dillugo.

⁴Azal maɓɓe yerɓino ɓe haa taasnuki maajum e ngal yejjitini ɓe ko saalino. Sey ɓe ngiida bee boneeji maɓɓe, walaa ko ŋakkani torra maɓɓe.

⁵Wakkati jama'aare ma waɗata jahaaŋgal kaayeefiiwal, kamɓe kam ɓe ngiidan bee maayde hayɗiniinde.

⁶Tagle fuu ɗon leesnani ma, a waɗi ɗe fahin e a sannji jaati man ngam haa ɓikkoy maaɗa fuu kise e kalluɗum fuu.

⁷Ɓe ɗon ngi'a ruuldere suuɗi laymaaji maɓɓe bee mbeelu mum faddooru e lesdi njoorndi waŋgi haa ndiyam wonno ɓooyma. Caka maayo Maaliya mbaŋginɗa laawol tokketeeŋgol, ƴuuge caatuɗe boo laati yayre marnde huɗo hecco.

⁸Jama'aare ma fuu saaliri ton. Yimɓe ɓe juŋngo ma ayni ngi'i kaayeefiiji kayɗiniiɗi.

⁹Ɓe nanndino bee pucci haa durŋgol, ɓe ɗonno ndiwa bana mborton, ɓe ɗonno ngima maŋgtooje ma yaa Jawmiraawo, an hisnuɓe ɓe.

¹⁰Ɓe ɗonno ciftora ko tawi ɓe yaake ɓe ɗonno haa lesdi njananndi: Lesdi man waɗno cufi naa dabbaaji, maayo boo tuuti paaɓi ɗuuɗɗi naa liɗɗi.

¹¹Yeeso seɗɗa ɓe ngi'i colli tagaaɗi kesi mbaŋgi wakkati dolo naawi ɓe e ɓe ɗonno ƴama nyaamdu wooɗndu:

¹²Ngam seynugo ɓe, gerle ngurti diga maayo.

¹³Nden boo, sarru caatuŋgu ukkani aybinaaɓe ɓaawo ɓe maatinaama bee diggaali. Yimɓe man ɓe njari bone daliila halleende maɓɓe ngam ɓe nganyi hoɗɓe maɓɓe bee nganyŋgu caatuŋgu.

¹⁴Ɓooyma, yimɓe Sodoma cali jaɓɓaago hoɗɓe ɓe ɓe anndaa. Ammaa kamɓe, ɓe macciɗini hoɗɓe ɓe mboonani ɓe.

¹⁵Sarru ɗonno reeni jaɓɓiiɓe hoɗɓe bana konne'en maɓɓe, ammaa kamɓe boo,

¹⁶ɓe njaɓɓi warɓe hesɓe bee seyo, ɓe ndokki ɓe amaana, ammaa ɓaawo man ɓe torri ɓe bee kuuɗe caatuɗe.

¹⁷Kanjum waɗi mbumndam hippi ɓe bana yimɓe Sodoma haa nastirde saare Ludu adiliijo. Ɓe potti bee nyiɓre ɓaleere kurum, koo moy ɗon mama ngam tefgo dammugal saare mum.

¹⁸Bana dow moolooru, kala ɓoggol fuu mari daande mum. To daaɗe ɓoggi man kawti, ɗum ɗon waŋgina daande wonnde. Non wakkati man: Kuuje duniyaaru kawti caka maaje, ngarti huunde hesre. Ɗum waŋgi laaɓɗum tal to en linyi ko saalino:

¹⁹Dabbaaji gaancaanɗi dow lesdi ngarti dabbaaji maayo, ginotooɗi ɗon ngaanca dow lesdi.

²⁰Yiite ɗon sigi semmbe mum nder ndiyam, ndiyam waawaataa nyifgo nge.

²¹Ɗemɗe yiite ngulataa ndabbahon ɗelemkon njahankon e ngarankon caka maaje e nge yoosnataa nyaamdu ndu Allah neldi ɗum, koo ngam ɗum nanndi e mallimallooje joosanɗe law.

²²Bee man fuu yaa Jawmiraawo, a tabitini maŋngu e tedduŋgal jama'aare ma. A meeɗaay yejjititgo nde, koo toy e koo ndey a ɗon dari les maare.