Read Fulfulded Hikma 2 Bible Online

Hikma 2 - Fulfulded bible

Hikma 2

¹Ɓe mbi'mbi'tiri nder numooji maɓɓe leliiɗi: “Ngeendam meeɗen rammi, ɗam ɗon heewi suno, nyawu azal walaa kurgun, walaa mo daɗata waade, en anndaa goɗɗo gartuɗo diga joonde maayɓe.

²En ndanyaama, en anndaa ɗume waɗi ɗum, to en kuuci boo ɗum laatoto bana en ndanyaaka. Poofɗe meeɗen nanndi bee cuurka, numooji meeɗen boo ɗum feetere iwnde haa ɓerɗe meeɗen.

³To nde nyifi, ɓanndu laatoto ndoondi e ruuhu majjan bana henndu meere.

⁴Nii seɗɗa inɗe meeɗen ngejjititte, koo moy siftortaa kuuɗe meeɗen. Ngeendam meeɗen saaloto bana duule, saŋkititto bana budiire nde laasol naaŋge e gulɗum maare parti.

⁵Balɗe men ɗon bana ɗowdi saalotoondi, timmoode men ɗum waajibiijum, haatummeere waɗi walaa lorotooɗo ɓaawo.

⁶Ngare, ceyorooɗen kuuje jontaaje! Bee cuusal nderkaaku naftoren duniyaaru ndu'u.

⁷Nguyken ma bee inaboojam mbelɗam e maaten uureeŋgol uurle caɗɗe, taa en acca sukaaku men saalo meere.

⁸Meeten meetaleewol doɓɓe, hiddeko ɗe ɗayla.

⁹Taa koo gooto amin ƴalɗiraay haa juulɗe ɗe dagaaki, accen koo toy alaamaaji seyo men, ngam kanjum woni geɗal meeɗen, kanjum woni yeɓre men!

¹⁰Ɓiɗɗen adiliijo mo laafuɗo, taa accen debbo jurumɗo, taa kakkilanen dandanndi marɓe duuɓi.

¹¹Haa meeɗen kam marɗo semmbe fuu mari gooŋga, ngam ko tampi nafataa.

¹²Pooɗen adiliijo nder tuuforgol ngam o ɗon waabo en, o ɗon aybina min min tokkaaki umrooje Jawmiraawo e min ngudini al'aadaaji.

¹³O ɗon manta ngam o anndi Allah, o ɗon ewno hoore maako ɓiɗɗo Jawmiraawo.

¹⁴O ɗon fela numooji meeɗen, en ngiɗaa laargo mo sam!

¹⁵Hulɓe Jawmiraawo ndartantaako bolle maako. Yiɗɓe mo ɗon tokko laabi maako.

¹⁶O laari min bana yimɓe halluɓe, o ɗon daayo min bana goɗɗo daayirta jiddere. O ɗon anndina no hayru laatanto adili'en haa timmoode, o ɗon manto ngam Allah woni Baaba maako.

¹⁷Ndaaren to boliiɗe maako gooŋgaaje. Ndaaren haa toy o yottoto.

¹⁸To adiliijo oo o ɓiŋngel Allah, Allah wallan mo, o rimɗinan mo diga juuɗe konne'en maako.

¹⁹Njarnen mo bone, en ndaaran no de'eende e munyal maako foti.

²⁰Timminen mo timmoode hallunde ngam o wi'i o woodi aynoowo.”

²¹Bana nii ɓe numata ammaa ɓe caklake ngam halleende maɓɓe wumni ɓe.

²²Ɓe anndaa sirriiji Allah, ɓe ndenataa mbarjaari ngam senaare, ɓe nuɗɗinaay mbarjaari yimɓe laaɓɓe.

²³Allah tagi neɗɗo ngam ngeendam nduumiiɗam. O tagi mo dow jaati maako,

²⁴waade nasti haa duniyaaru ngam kaajal Sayɗaanu, tokkiiɓe laawol maako kawran bee maare.