Read Fulfulded Hikma 3 Bible Online

Hikma 3 - Fulfulded bible

Hikma 3

¹Yoŋki adili'en ɗon haa juuɗe Allah. Walaa ɓillaare heɓata ɓe.

²Haa gite faataaɓe, ɓe laati bana maayɓe, ɗum masiibo to ɓe acci duniyaaru,

³to ɓe ndaayti min, ɗum majjere mawnde. Ammaa kamɓe ɓe ɗon nder salaaman Allah.

⁴Fodde yimɓe kam, ɓe njari bone, ammaa ɓe mari tammunde heɓgo ngeendam nduumiiɗam.

⁵Ɓaawo bone seɗɗa, ɓe keɓan hayru mawɗo, Allah foondi ɓe, tawi boo, ɓe adili'en.

⁶O foondi ɓe bana ɓe poondirta kaŋŋeeri, o jaɓi ɓe bana o jaɓirta nguleteeŋga dow hirsirde.

⁷Nyannde darŋgal ɓe njalbitan, ɓe nanndan bee pette yiite gulanɗe geene.

⁸Ɓe kiitoto ummaatooje, ɓe njaaloto jama'aaje fuu. Jawmiraawo laamanto ɓe haa foroy.

⁹Hoolotooɓe Allah paaman no nufaye maako gooŋɗi. Jogiiɓe amaana njooɗoto kommbi maako nder yiide, ngam barka e enɗam Allah haanani tokkiiɓe mo, o ɗon hisna suɓaaɓe maako.

¹⁰Yedduɓe Allah keɓan kiita deydey numooji muuɗum'en kalluɗi, ngam ɓe njawi adili'en, ɓe ndokkiti Jawmiraawo ɓaawo.

¹¹Bone ngoodani yawiiɓe hikma e ko hikma jaŋnginta. Walaa ko tammunde maɓɓe e comri maɓɓe e kuuɗe maɓɓe fuu nafata.

¹²Rewɓe maɓɓe ngalaa hakkiilo, ɓikkoy maɓɓe boo kallukoy, naaloore ɗon dow ruutu maɓɓe!

¹³Seyo woodani debbo dimaro laaɓɗo mo waɗaay njeenu, ngam o heɓan mbarjaari nyannde darŋgal.

¹⁴Seyo woodani gorko cortaaɗo mo waɗaay kalluɗum, mo numanaay Jawmiraawo kalluɗum. Daliila amaana maako, o heɓan barka. O heɓan babal marŋgal daraja nder haykaliiru Jawmiraawo.

¹⁵Ngam kuuwanɗo ngam mbooɗeeŋga sodoyan ɓenndalooje booɗɗe, kuuwtiniranɗo hikma ɗon bana lekki marki ɗaɗi ɗi mbaatataa.

¹⁶Njaalu'en keɓataa jaalorgal, ɓikkoy ndanyeteekoy nder teegal ngal dagaaki majjan.

¹⁷Koo to ɓe neeɓi haa duniyaaru, ɓe marataa daraja, to ɓe naywi, ɓe njawoto ɓe.

¹⁸To ɓe maayi nder nderkaaku maɓɓe boo, ɓe keɓataa tammunde, nyannde darŋgal ɓe keɓataa de'eende.

¹⁹Ngam kulniiɗum woni ragare halluɓe.